Năm akŏm păng pơma ah Hop akŏm, Phŏ Kơdră teh đak bơ̆n Võ Thị Ánh Xuân sơkơ̆t hơdah păng hmach bơnê kơ dôm tơdrong jang đei jơnei đơ̆ng bơngai jang lơ̆m Anih jang ngar – tơmo gĭt Việt Nam (TKV). Atŭm hăm dôm tơdrong đei jơnei, Anih jang ngar – tơmo gĭt athei lăng tơpăt dôm tơdrong oei tơjruh nhen: tơdrong tam mă hơtŏ băl lơ̆m pơm jang tơ̆ minh ƀar anih jang, dah mă iŏk yua kŏng ngê̆ thŏng tin oei adar.

Phŏ Kơdră teh đak bơ̆n Võ Thị Ánh Xuân pơgơ̆r Anih jang ngar – tơmo gĭt lơ̆m jăl sơnăm 2025-2030 pơtoi iŏk yua tơdrong juăt jue kăp gĭt “Tơchơ̆t minh jơhngơ̆m đon”, pơm jang đei jơnei dôm Tơchơ̆t Hop akŏm Đảng ƀô̆ kơ Anih jang ngar – tơmo gĭt 'măng mă 4 hlôi tơlĕch. Anih jang akŏm lơ̆m dôm tơdrong pơlong jang tơguăt hăm tơplih kơsô̆, pơm jang kiơ̆ trong 'nao, vei sơđơ̆ng tơdrong pơm jang păng hơtŏk tơdrong hơrih ăn bơngai jang. Mă kăl, athei tơrĕk truh tơdrong pơhrăm bơngai jang 'nao, pôk hơpah athei tơtom trŏ ƀlep, asong bơngai jang kơtă, hơdrin tŏk đơ̆ng 5-10% anih jang, bơngai jang đei pôk hơpah pơtêng hăm jăl jang hơdrol.