Pơma tơ̆ hop akŏm, Phó Thủ tướng Lê Minh Khái akhan, tơ̆ hơnăp kơnh anih tĕch mơdro lơ̆m apŭng plenh tĕh roi iĕ ƀiơ̆; tơdrong jang xa, tĕch mơdro tơƀâp lơ mơmat tat, ƀơm ưh ‘lơ̆ng tơdrong jang, jên khei đei iŏk yoa đơ̆ng bơngai jang, tơdrong răm đơ̆ng jĭ COVID-19 pơdui đunh, tơdrong sarbar, tŏ ‘mi kial kơnê̆ nhen ‘mi kial hơbŭt ưh trŏ pơyan, hơnat vă gơ̆h tơdra hơdrol… yoa thoi nŏh tơdrong jang “ưh đei hŭt hơchăng bu tơ̆ rŏng” đei tơlĕch lơ̆m tơdrong jang tơjur tơnuh hin kơ jăp ‘lơ̆ng ‘nŏh tôch trăp trĭn.

Đơ̆ng nŏh, Phó Thủ tướng athei, Anih mong jên tĕh đak Việt Nam pơtho ăn Anih mong jên tơgŭm tơpôl akŏm jơhngâm hơlen năng, hơmet ming, chih pơ ‘lơng dôm tơdrong hơgăt đơ̆ng luơ̆t; trong pơgơ̆r jang, tơdrong tơgŭm đei ƀơm truh tơdrong asong tŏk iŏk jên tơgŭm tơpôl nhen mong akŏm, vei lăng păng iŏk yoa mă ‘lơ̆ng dôm kơsô̆ jên asong tŏk iŏk tơgŭm tơpôl.