VOV4. Bahnar - Tơ̆ Hà Nội, Khŭl vei lăng sơđơ̆ng găh Dơnŏ anĭh chĕp pơgơ̆r Đă ƀŏng lŏng tơplŏng kơdau Đông Nam Á ‘măng mă 31 (SEA Games 31) păng Khŭl vei lăng sơđơ̆ng SEA Games 31 kơ Dơnŏ anĭh tơm Kŏng ang pơgơ̆r ‘Măng hop akŏm pơtôch bơ̆ jang vă lăng hơlen dôm tơdrong jang vei lăng sơđơ̆ng dơ̆ng kơ jăp SEA Games 31. Jang kiơ̆ trong hơmet vă jang vei lăng sơđơ̆ng dơ̆ng kơ jăp SEA Games 31, Dơnŏ anĭh tơm Kŏng ang hlôi tơlĕch lơ trong vă jang găh vei lăng sơđơ̆ng ‘lơ̆ng hơ iă ‘măng pơgơ̆r pơlong; pơjing Khŭl vei lăng sơđơ̆ng dơ̆ng kơ jăp SEA Games 31; tơlĕch lơ trong jang, ‘măng hop akŏm vei lăng sơđơ̆ng pơm lêh blŭng a, pơm lêh pơtôch păng rim ‘măng Pơlong tuch luch đă ƀŏng lŏng khŭl drŏ nglo, khŭl drŏ kăn; pơgơ̆r dăr lăng, lăng hơlen bơ̆ jang vei lăng sơđơ̆ng tơ̆ 6 tơring pơgơ̆r tơm. Tơ̆ hop akŏm, Kơ iĕng Kơdră chĕp pơgơ̆r Dơnŏ anĭh tơm Kŏng ang Lương Tam Quang athei rim hơnĭh tơm, hơnĭh bơ̆ jang, tơring hơnơ̆ng lăng ba kơ jăp, tơgŭm djru, pơjing rơvơn, iung jang hơdoi kơ jăp hăm Dơnŏ anĭh tơm Kŏng ang lơ̆m bơ̆ jang vei lăng sơđơ̆ng dơ̆ng kơ jăp pơma atŭm, vei lăng sơđơ̆ng dơ̆ng kơ jăp rim tơdrong pơgơ̆r chĭnh trĭ, jŏh ayŏ kơdŏ soang đă ƀŏng lŏng tơplŏng kơdau kơ tĕh đak pơma hơdrô̆; lăng ba kơ jăp tơ iung pơjing khŭl Kŏng ang kon pơlei tơpă rơgŏh ‘lơ̆ng, pran kơtang, gơ̆h hơgei, hơbĕch hơbal, trŏ lăp ăn tơdrong jang lơ̆m chăl hle.

Tơblơ̆ nơ̆r: Amazưt