VOV4.Bahnar - Việt Nam ‘meh vă vang tơbăt ăn trong lăng păng trong jang gơ̆h apŭng plĕnh tĕh lơm hơmet pơ ‘lơ̆ng mŭk drăm-tơpôl rơgŏh ‘lơ̆ng, kơ jăp păng jơ̆p jang, pơtrŭt kơtang iŏk đei jơnei Tơdrong jang hơmet ming păng atŏk tơ iung mŭk drăm-tơpôl lơ̆m khei ‘năr jĭ hơbŭh Covid-19. ‘Nau nơ̆r sơkơ̆t hơdăh đơ̆ng Kơ iĕng Thủ tướng Tĕh đak Phạm Bình Minh tơ̆ hop akŏm Apŭng plĕnh tĕh “Pơtrŭt kơtang Hơmet ming Mŭk drăm rơgŏh păng Jơ̆p jang: Tơdrong hŏk kiơ̆ đơ̆ng bơ̆ jang jơnei kơ apŭng plĕnh tĕh” kơ yuơ tơdrong jang Atŏk tơ iung LHQ (UNDP) hăm Dơnŏ anih tơm jang tơbôl vang pơgơ̆r pơgê năr 25/2 tơ̆ Hà Nội kiơ̆ trong pơgơ̆r kơtă păng trư̆k tuyên. Iung pơma tơ̆ Hop akŏm, Kơ iĕng Thủ tướng Tĕh đak Phạm Bình Minh sơkơ̆t hơdăh: Đơ̆ng ƀô̆h hơdăh lơ̆m Tơplĭh ‘nao, plôih ‘măng păng vang mơ̆t hơdoi lơ̆m hloh 35 sơnăm au ki, dôm hơyak tơplĭh kơ Việt Nam jei iŏk đei đơ̆ng tơplĭh ‘nao đon tơchĕng, lăng trŭh dôm tơdrong đei iŏk yua atŏk tơ iung đunh đai, tôm tong kơ tĕh đak, kơ kon pơlei. Păng hop akŏm ‘măng mă au jing jơ rơvơn vă Việt Nam chă mơ̆ng dôm nơ̆r vang tơbăt ăn đơ̆ng rim bơngai joăt jang, rim hơnĭh jang apŭng plĕnh tĕh, rim bơngai jang chă tơchĕng hơlen lơ̆m tĕh đak păng đơ̆ng tĕh đak đe, găh trong lăng păng tơdrong iŏk đei jơnei apŭng plĕnh tĕh lơ̆m hơmet pơ ‘lơ̆ng mŭk drăm-tơpôl rơgŏh ‘lơ̆ng, kơ jăp păng jơ̆p jang.

Tơblơ̆ nơ̆r: Amazưt