Pơma pơgơ̆r tơ̆ hop akŏm, Tổng Bí thư, Kơdră teh đak Tô Lâm chih iŏk jơnei ‘lơ̆ng hơiă đơ̆ng Quân uỷ Trung ương, kơdră đảng, kơdră pơgơ̆r rim tơring păng kang ƀô̆, khŭl lĭnh lơ̆m bơ̆jang kiơ̆ hơnăp jang khei ‘năr âu ki; hơdai hăm athei, tơ̆ hơnăp kơnh kơdră đảng, kơdră chĕp kơ̆l rim tơring vei kơjăp ‘lơ̆ng đon tơchĕng pơgơ̆r “Vei lăng teh đak đơ̆ng hrôih, đơ̆ng hơtăih athei pơtơm đơ̆ng tơdrong lăng ƀôh hrôih, tơdra hơtăih păng bơ̆jang hơdrol”.

Ƀok athei anih jang kơpal kơ Quân uỷ Trung ương, Anih tơm vei lăng khŭl lĭnh hơtŏk ‘lơ̆ng tơchĕng hơlen, tơdra hơdrol jang tơgŭm gĭt kăl; kơchăng lăng băt dôm tơdrong krê hơmơt joăt joe păng sơđơ̆ng ưh kơ tam byơh đei, krê hơmơt lơ̆m hơnih mạng. Hơnơ̆ng hơtŏk ‘lơ̆ng pơhrăm, ling lang iung jang, vei lăng kơjăp tơring plĕnh, tơring đak dơsĭ, tơring sơlam, tơ̆ teh, hơnih mạng; khŏm vei lăng kơjăp rơngei, pơm tơm kơdih, jơ nei ‘lơ̆ng hơgăt teh păng đei yua ăn teh đak, hơdrĕch hơdrŭng.