Hop akŏm hlôi akŏm hơlen pơtôch jang kiơ̆ Tơdrong tơchơ̆t jăl jang 2020 – 2025, sơkơ̆t hơdăh trong tơlĕch jang, trong jang ăn jăl jang 2025 – 2030; adoi tơgop nơ̆r lơ̆m trong vă pơjing tơdrong tơchơ̆t Hop akŏm tih ‘măng mă XIV kơ Đảng. Mă kăl, Hop akŏm tih ‘măng mă ou, ưh kơ pôk tơmơ̆t Khul kơdră chĕp pơgơ̆r jăl ‘nao mă lei kơ yuơ Hơnih tơm Chinh trĭ pôk hơtŏk ăn. Hăm hơnăn: “Tơ iung pơjing Đang ƀô̆ păng khul jang chinh trĭ rơgoh ‘lơ̆ng, pran kơtang; atŏk kơtang tơdrong joăt ‘lơ̆ng hơ iă, jơhngơ̆m pran tơgoăt tơgoăl lơ̆m pơ đĭ kon pơlei; vei kơjăp teh đak, sơđơ̆ng tơring; atŏk kơtang khoa hŏk, kmăi kmŏk; hơvơn rim khul tơ iung pơjing Gia Lai atŏk tơ iung ‘lơ̆ng”, dêh char tơlĕch trong jang GRDP tŏk 10–10,5% lơ̆m sơnăm, GRDP jô̆ hơtŏ măt bơngai iŏk đei 6.300 – 6.500 USD; truh sơnăm 2030, thuê̆ ăn hơnih mong jên bơ̆ jang teh đak đei hloh 41.000 ti hlak jên.