VOV4.Bahnar - ‘Năr 8/4, tơ̆ pơ lei tơm Pleiku, Anih tơm vei lăng găh choh jang sa păng hơ tŏk tơ iung tơ ring tơ rang jang hơ dai hăm Anih vei lăng kon pơ lei dêh char Gia Lai pơ gơ̆r Hop akŏm tơ drong jang dang ei păng tơ drong jang vă hơ tŏk tơ iung ƀum ƀlang tơ̆ Việt Nam. Hrei ‘nâu, teh đak bơ̆n đei hloh 528.000 hek tar ƀum ƀlang, pơm tơ lĕch lơ tơ̆ tŏk bŏk tơ ring groi kông găh tu, tu tŏk bŏk, tơ ring đak dơ sĭ pơ băh tŏk bŏk, Tây Nguyên păng hơ lĕch pơ băh. Sơ năm 2021, kơ sô̆ ƀum ƀlang lơ̆m teh đak đei vă jê̆ 10,7 triệu tấn, lơ̆m noh đei 2,9 triệu tấn đei tĕch ăn tơ̆ teh đak đe, jên đơ̆ng tĕch đei vă jê̆ 1,2 ti USD. 

Tơ̆ Hop akŏm, Phŏ kơ dră Anih tơm vei lăng găh choh jang păng hơ tŏk tơ iung tơ ring tơ rang Lê Quốc Doanh tơ băt, tơ̆ hơ năp kơnh, rim anih jang kơ Anih tơm vei lăng găh choh jang sa păng hơ tŏk tơ iung tơ ring tơ rang gô hơ tŏk loi dơ̆ng tơ chĕng hơ len dôm hơ drĕch ƀum ƀlang ‘nao đei ƀŭm lơ, ‘lơ̆ng, kĕ tơ jră jĭ. Phŏ kơ dră tơm athei rim tơ ring păng anih jang mơ dro sa hơ tŏk loi dơ̆ng pơ gơ̆r pơm tơ lĕch kiơ̆ trong tơ jur jên jang, hơ tŏk iŏk yua, hơ tŏk tơ drong ‘lơ̆ng tơ mam; tơ plih ‘nao kơ măy kơ mŏk, tŭn pran pơm tơ lĕch ‘lơ̆ng, vei lăng cham char păng jang hơ dai pơm tơ lĕch kơ jăp ‘lơ̆ng.

Thuem: Tơ blơ̆