VOV4.Bahnar - Pơ gê 10/5, tơ̆ plt HCM pơ gơ̆r Hop akŏm tơ drong tĕch mơ dro hăm điên tư Việt Nam 2022 đei hơ năn “Tĕch mơ dro hăm điên tư tưk tơ iung mŭk drăm đơ̆ng rŏng kơ jĭ”. Tơ̆ hop akŏm, dôm bơngai tang măt akhan: Tĕch mơ dro điên tư hlôi pơm tơ plih tơ drong tĕch mơ dro xa đơ̆ng anih tĕch mơ dro păng tơ drong juăt răt yoa tơ mam đơ̆ng kon pơ lei, mă loi đơ̆ng rŏng kơ jĭ COVID-19.

Dôm bơ ngai tang măt pơ ma nuh lơ̆m hop akŏm

Tĕch mơ dro hăm điên tư tŏk pran đơ̆ng sơ năm 2020-2021 păng tơ chĕng adrol gô iŏk đei dang 39 ti USD lơ̆m sơ năm 2025. ‘Nâu kŭm jing trong jang tô̆ch kơ jăp lơ̆m tơ drong tơ lĕch lơ trong tĕch tơ mam tơ̆ hơ năp kơnh, mă đơ̆ng đei jĭ dăh mă ưh. Jô̆ truh ƀât tŏk bŏk sơ năm 2021, Việt Nam đei hlŏh 8 triu ‘nu bơ ngai răt tơ mam trư̆k tuyê̆n. Hrei ‘nâu, dôm anih tĕch mơ dro tơ mam hăm điên tư akŏm tơ̆ Hà Nội păng plt HCM. Đơ̆ng sơ năm 2021 truh dang ei, tơ mam tĕch kiơ̆ kơ măy điên tư tŏk đơ̆ng 1,5-2 ‘măng pơ têng hăm adrol kơ đei jĭ. 

Dơ̆ng: Tơ blơ̆