VOV4.Bahnar - Năr ‘nâu (14/2) tơ̆ Hà Nội, Anih tơm vei lăng găh choh jang sa păng hơ tŏk tơ iung tơ ring tơ rang jang hơ dai hăm Anih jang teh đak bơ ngai Việt Nam oei tơ̆ teh đak đe pơ gơ̆r Hop akŏm tơ goăt bơ ngai jang mơ dro sa đơ̆ng teh đak bơ̆n oei tơ̆ teh đak đe, pơ trŭt mơ dro sa păng tơ mơ̆t jên jang ăn tơ drong jang choh jang sa. Hăm tơ drong tơm hơ nơ̆ng pơ trŭt tơ roi tơ ƀôh, tơ goăt tơ mơ̆t jên jang păng mơ dro sa tơ mam đơ̆ng choh jang sa, hơ tŏk loi dơ̆ng mơ̆t jang hơ dai apŭng plĕnh teh tơ drong jang choh jang sa, Hop akŏm gô tơ roi tơ ƀôh hăm kon pơ lei đơ̆ng teh đak bơ̆n oei tơ̆ teh đak đe găh trong vă jang tơ gŭm hơ drol sơng đei tơ mơ̆t jên jang păng jang hơ dai tĕch mơ dro lơ̆m tơ drong jang choh jang sa, ka hơ dang kŭm nhen dôm tơ mam OCOP. Hop akŏm kŭm jing ‘măng pơ ma dơ nuh, răp mơ̆ng, chih răk nơ̆r tơ gop, tơ drong hlôh vao đơ̆ng kon pơ lei teh đak bơ̆n oei tơ̆ teh đak đe vang tơ mơ̆t jên jang, tĕch mơ dro, jang hơ dai hăm anih jang mơ dro sa, kon pơ lei păng hơp tak xăh lơ̆m teh đak, kiơ̆ đơ̆ng noh, pơ jing khŭl jang tơ goăt hăm kon pơ lei teh đak bơ̆n oei tơ̆ teh đak đe lơ̆m răt iŏk păng tơ mơ̆t jên jang dôm tơ mam đơ̆ng choh jang sa.

Thuem: Tơ blơ̆