VOV4.Bahnar - ‘Năr 27/9, tơ̆ Hnam Kuô̆k hô̆i, Kơ dră Kuô̆k hô̆i Vương Đình Huệ pơ gơ̆r Hop akŏm tơ lĕch tơ drong jang Dăr lăng đơ̆ng Kuô̆k hô̆i sơ năm 2023, pơih pơ dăh tơ păt hăm 49 Khul tang măt Kuô̆k hô̆i dôm dêh char, plt. Pơ ma lơ̆m hop akŏm, dôm bơ ngai tang măt akhan, lơ̆m khei ‘năr âu ki, tơ drong jang dăr lăng đơ̆ng Kuô̆k hô̆i đei hơ tŏk roi pran păng đei lơ tơ drong tơ plih ‘nao, roi đunh roi đei yoa, iŏk đei lơ tơ drong gĭt kăl, đei bơ ngai tăh hla păng kon pơ lei tơ chĕng ‘lơ̆ng.

Vă tơ lĕch jang ‘lơ̆ng tơ drong Dăr lăng đơ̆ng Kuô̆k hô̆i, đơ̆ng Anih chĕp kơ̆l pơ gơ̆r Kuô̆k hô̆i sơ năm 2023, Kơ dră Kuô̆k hô̆i Vương Đình Huệ athei, dôm anih jang kơ Kuô̆k hô̆i, anih jang kơ pal chih hơ dăh tơ drong pơm hơ tŏk đei yoa mưh bơ̆ jang dăr lăng ‘nŏh jĭ 1 tơ drong jang gĭt kăl vă tơ plih ming trong pơ gơ̆r păng bơ̆ jang đơ̆ng Kuô̆k hô̆i Việt Nam kiơ̆ đon tơ chĕng, trong jang đơ̆ng Đảng găh pơ jing Tĕh đak chĕp kơ̆l pơ gơ̆r kiơ̆ khôi luơ̆t XHCN kơ Kon pơ lei, đơ̆ng kon pơ lei păng yoa kon pơ lei.

VOV-Dơ̆ng: Tơ blơ̆