VOV4.Bahnar - Vă tơ chă dôm trong jang hơ tŏk đei yua tơ drong ‘lơ̆ng, tơ drong pran ăn tơ drong hơ tŏk tơ iung tơ mang lăng Kon Tum pơ ma hơ drô̆ păng tơ ring Tây Nguyên pơ ma atŭm, tơ̆ pơ lei tơm Kon Tum lơ̆m giĕng âu ki, Anih tơm vei lăng joh ayŏ, tơ plŏng kơ dâu păng tơ mang lăng jang hơ dai hăm Anih vei lăng kon pơ lei dêh char Kon Tum pơ gơ̆r Hop akŏm “ Tơ mang lăng Kon Tum- Tơ drong ‘lơ̆ng păng hơ mĕng”.

Hop akŏm "Tơ mang lăng Kon Tum- Tơ drong ‘lơ̆ng păng hơ mĕng” sơ năm 2022 sơng đei tơ drong vang akŏm đơ̆ng vă jê̆ 500 ‘nu bơ ngai tang măt ‘noh jĭ dôm bơ ngai vei lăng, joăt jang kơ anih jang; Khŭl jang, grŭp jang mơ dro sa tơ mang lăng, hnam tơ moi chă ƀĭch pơ dơh, gre chơ vih vơ̆t; bơ ngai tang măt truh đơ̆ng 1,2 dêh char găh pơ băh teh đak Lào, Hơ lĕch tu Campuchia đei atŭm trong sơ lam hăm dêh char Kon Tum.

Bơ ngai tang măt vang hop akŏm

 Pơ ma tơ̆ hop akŏm, Kơ dră Anih tơm vei lăng găh joh ayŏ, tơ plŏng kơ dâu păng tơ mang lăng Nguyễn Văn Hùng pơ ma hơ dăh, Anih tơm păng rim tơ ring lơ̆m teh đak tŏk bŏk đei lơ trong jang, hơ drin pơ gơ̆r dôm tơ drong jang vă tơ iung ming dơ̆ng tơ drong jang tơ mang lăng đơ̆ng rŏng jĭ hơ buh COVID-19. Hop akŏm “ Tơ mang lăng Kon Tum- Tơ drong ‘lơ̆ng păng hơ mĕng” jĭ tơ drong hiôk vă anih jang mơ dro sa tơ ƀơ̆p băl, kĭ pơ kăp jang hơ dai lơ̆m tơ drong jang tơ mang lăng. Kiơ̆ Kơ dră tơm, dêh char Kon Tum hlôi đei 2 tơ drong tơm gĭt kăl vă hơ tŏk tơ iung tơ mang lăng:

 “Nhôn lăng ƀôh 2 tơ drong mă Kon Tum hlôi păng akŏm đei vă bơ̆n hơ tŏk tơ iung tơ mang lăng. Tơ drong mă mônh ‘noh jĭ Kon Tum đei tôm dôm tơ drong kăl găh tơ mam drăm bri brăh păng tơ mam drăm joh ayŏ vă bơ̆n jang tơ mang lăng ưh kơ jei kiơ mŏ oh. Tơ drong mă 2 ‘noh jĭ kon bơ ngai Kon Tum hăm jơ hngơ̆m đon tơ păt, pơ nam jang sa, rơ hou păng đei đon ‘mêm. Kơ dih đe sư jĭ dôm tơ ‘ngla vă dui jơ̆ng tơ moi tơ mang lăng”.

Kơ dră tơm Nguyễn Văn Hùng pơ ma tơ̆ hop akŏm

Tơ̆ hop akŏm, dôm bơ ngai tang măt hlôi pơ ma dơ nuh, sơ kơ̆t hơ dăh tơ drong ‘lơ̆ng păng hơ mĕng hơ tŏk tơ iung tơ mang lăng kơ dêh char Kon Tum hăm ƀôh hơ dăh ‘noh jĭ tơ drong ‘lơ̆ng hơ iă joh ayŏ, lơ hơ nih ‘lơ̆ng rŏ, nhen: kông Ngọc Linh găh Hơ nih vei lăng cham char bri brăh Ngọc Linh; trong tơ klăh 3 tơ ring sơ lam Việt Nam- Lào- Campuchia; hơ nih tơ mang lăng cham char bri brăh kơ teh đak Măng Đen- Kon Plông… Mă lei vă hơ tŏk tơ iung đei tơ mang lăng, kiơ̆ kơ Phŏ Giáo sư- Tiến sỹ Trần Đình Nguyên, bơ ngai joăt jang mŭk drăm, sơ̆ kơ dră Anih jang Mŭk drăm Việt Nam ‘noh kŭm hăm vei lăng tơ drong gĭt, lơ, hơ tŏk ‘lơ̆ng tơ mam, Kon Tum kăl băt hơ dăh đei tơ drong tŏk vă ‘măn tơ gŭm hơ drol ăn hơ tŏk tơ iung tơ mang lăng:

“Kon Tum kăl tơ ƀưh trong vă rơ hơi jơ hngơ̆m ƀiơ̆. Tơ̆ âu pơ tih gia nhen Bờ Y. ‘Meh Bờ Y tŏk đei Bờ Y athei tơ ƀưh trong tơ̆ Lào, athei tơ ƀưh trong tơ̆ Campuchia kiơ̆ ƀlep tơ drong pơ̆ih ‘măng mơ̆t jang hơ dai. Ƀơ̆t doh Bờ Y mă tơ plih dôm tơ drong ‘lơ̆ng kơ tơ ring buăl jing tơ drong ‘lơ̆ng đơ̆ng kơ dih vă hơ tŏk tơ drong arih ăn tơ mang lăng. Kăl kơ tơ drong jang akŏm tơ gŭm păng jên ăn dôm tơ drong jang tơ gŭm hơ drol ‘noh jĭ băt akŏm lơ̆m 2,3 tơ drong jang tŏk. 1 ‘noh jĭ pơ lei tơm Kon Tum, 2 ‘noh jĭ Măng Đen păng mă 3 ‘noh jĭ đei 1 trong năm tơ̆ trong tơ klăh 3 tơ ring sơ lam”.

Vang pơ ma pơ dŭh tơ gŭm băl hơ tŏk tơ iung tơ mang lăng Kon Tum

Tơ păt tơ jră hăm tơ drong ưh kơ hiôk mă lei ưh kơ tơ hiong đon lui, yă Trần Nguyện, Kơ dră Anih jang tĕch mơ dro Grŭp jang Sun Group akhan, lơ̆m tơ drong jang tơ mang lăng Kon Tum pơ ma hơ drô̆ păng Tây Nguyên pơ ma atŭm đei lơ tơ drong ưh kơ ‘lơ̆ng păng ưh kơ đei lơ tơ drong, nhen anih jang kăl, ưh kơ đei bơ ngai tơ mơ̆t jên jang tih; tơ drong vă jang chĕng hơ met teh; ưh kơ đei lơ găh bơ ngai jang hơ gei lơ̆m tơ drong jang tơ mang lăng... Tơ dăh ‘meh hơ tŏk tơ iung tơ mang lăng athei hơ met pơ ‘lơ̆ng đei dôm long nol âu:

 “‘Nâu jĭ dôm tơ drong mă tôch kơ kal. Tơ dăh ‘meh hơ tŏk tơ iung kăl athei năm hơ met pơ ‘lơ̆ng dôm long nol âu păng nhôn kŭm hơ mĕng hăm nơ̆r tơ gop đơ̆ng nhôn păng tơ drong yak hơ dai đơ̆ng dôm anih jang mơ dro sa nai kŭm gô tơ gop ăn hơ nih năm truh Kon Tum ƀrư̆ ƀrư̆ hơ met pơ ‘lơ̆ng đei dôm long nol păng bơ̆n gô tơ tom iŏk tơ drong hiôk, năm đơ̆ng rŏng mă lei gô năm tôch hrĕnh.”

Kĭ pơ kăp drơ̆ng nơ̆r jang hơ dai hơ tŏk tơ iung tơ mang lăng

Tơ̆ hop akŏm “ Tơ mang lăng Kon Tum- Tơ drong ‘lơ̆ng păng hơ mĕng”  sơnăm 2022, Anih tơm vei lăng găh joh ayŏ, tơ plŏng kơ dâu păng tơ mang lăng tơ băt hơ dăh Trong tơ lĕch jang hơ tŏk tơ iung tơ mang lăng tơ ring 3 teh đak hơ tŏk tơ iung Campuchia- Lào- Việt Nam jăl jang 2021-2025, lăng truh sơ năm 2030; Anih vei lăng găh joh ayŏ, tơ plŏng kơ dâu păng tơ mang lăng Kon Tum tơ băt hơ dăh, roi tơ ƀôh Logo păng slogan tơ mang lăng dêh char Kon Tum “Lăng vă kơ băt joh ayŏ - chă lăng cham char bri brăh”; Kĭ pơ kăp drơ̆ng nơ̆r jang hơ dai găh tơ gŭm tơ iung ming tơ drong jang dôm anih jang mơ dro sa tơ mang lăng đơ̆ng dêh char Kon Tum hăm Khŭl jang tơ mang lăng 3 pơ lei tơm: Hà Nội, Đà Nẵng păng pơ lei tơm Hồ Chí Minh; Anih vei lăng găh joh ayŏ, tơ plŏng kơ dâu păng tơ mang lăng dêh char Kon Tum kŭm kĭ pơ kăp drơ̆ng nơ̆r hăm Khŭl jang vei lăng tơ mang lăng Việt Nam vă hơ tŏk tơ moi tơ mang lăng truh tơ̆ dêh char.

Khoa Điềm: Chih

Thuem: Tơ blơ̆