VOV4.Bahnar - Atŏk tơ iung mŭk drăm-tơpôl tĕnh koăng, kơ jăp, keh kong ‘moi kiơ̆ akŏm mŭk drăm vă atok tơ iung rim hơnĭh jang, dôm tơdrong đei, kĕ pơjei. Tơ iung pơjing pơlei tơm Buôn Ma Thuột jing hơnĭh kơdrơ̆m tơm kơ tơring Tây Nguyên hăm cham char Rơgŏh ‘lơ̆ng-Gơ̆h hơgei-‘lơ̆ng hơ iă, tơring kơdrơ̆m gơ̆h hơgei - ‘măng jang kơ tơring Tây Nguyên vang mơ̆t lơ̆m tơring păng apŭng plĕnh tĕh. ‘Nau jing trong jang atŏk tơ iung kơ dêh char Dak Lăk đei pơma tơlĕch tơ̆ Hop akŏm tơgop nơ̆r tơbăt hơdăh trong pơ prŏ jang dêh char Dak Lăk jăl jang 2021-2030, lăng trŭh sơnăm 2050 kơ yuơ Dơnŏ anĭh vei lăng kon pơlei dêh char Dak Lăk pơgơ̆r năr 16/3.

Vă pơjing hơyak pran atŏk tơ iung, rim kơdră tang măt akhan: dêh char Dak Lăk kăl atŏk kơtang tơmơ̆t jên jang rim hơnĭh, tơdrong vă jang tơm, gĭt kăl vă atŏk kơtang tơgoăt dih băl klŏh klĕch tơring, mă kăl ‘nŏh Dơnŏ anĭh tơm Đă ƀŏng lŏng tơplŏng kơdau tơring Tây Nguyên, trong glung rĕnh Buôn Ma Thuột - Nha Trang, trong tơ ƀư̆h Tuy Hòa - Buôn Ma Thuột; Akŏm atŏk tơ iung khoa hŏk păng kmăi kmŏk, mă kăl ‘nŏh kmăi kmŏk kơtơ̆ng ang. Atŭm hăm ‘nŏh, dêh char kăl tơ iung pơjing trong jang pơtho pơjing khŭl bơ̆ jang păng trong jang tơgŭm djru hơvơn tơmơ̆t khŭl bơ̆ jang gơ̆h hơgei mơ̆t jang.

Tơblơ̆ nơ̆r: Amazưt