‘Năr 10/11, Khŭl mơdro sa mơ lôh dêh char Dak Lak pơgơ̆r Hop akŏm tơlĕch trong jang tĕch mơdro hơdai păng tơmơ̆t jên jang hăm tơdrong vang akŏm đơ̆ng vă jê̆ 40 Khŭl mơ dro sa mơ lôh dôm dêh char, pơlei tơm, anih jang, kâu lak ƀô̆ găh khŭl jang păng vă jê̆ 1.000 ‘nu bơngai tang măt ‘noh bơngai mơdro sa mơ lôh lơ̆m teh đak.

Hop akŏm, akŏm  lơ̆m dôm tơdrong jang “ Tơplih kơ sô̆ hơtŏk tơmam đơ̆ng choh jang sa Việt”; Dak Lak - Hơnih năm truh đơ̆ng bơngai tơmơ̆t jên jang choh jang sa gơh hơgei; Hơnhăk tơmam đơ̆ng choh jang sa lơ̆m trang tĕch mơ dro điện tử păng tơdrong hiôk tĕch tơmam đơ̆ng Dak Lak năm jơ̆p apŭng plĕnh teh. Hop akŏm kŭm roi tơƀôh dôm hơnăn tơdrong jang sơng đei tơmơ̆t jên jang lơ̆m dêh char Dak Lak , pơma đam vang tơroi tơdrong hiôk tơmơ̆t jên jang păng tơmam ‘lơ̆ng hơtŏk tơiung kơ dêh char Dak Lak.

Tơ̆ Hop akŏm đei 22 anih jang kĭ pơkăp dôm biên bản chih tơ ƀlŏk “ Tơlĕch trong jang tĕch mơdro hơdai păng tơmơ̆t jên jang”. ‘Măng âu, Khŭl mơdro sa mơ lôh Việt Nam asong 2 tŏ hnam ‘mêm mơ nat đei kơ jă 110 triệu hlak jên ăn dôm ŭnh hnam đei tơdrong arih sa mơ mat tat tơ̆ apŭng Cư Kuin, dêh char Dak Lak; asong 50 tơpu tơmam ăn bơngai răm đơ̆ng pơgang Dioxin lơ̆m dêh char đei kơ jă 100 triệu hlak jên.