Hop akŏm ‘nŏh tơdrong jang kơ yuơ Việt Nam pơm tơm lơ̆m Trong bơ̆ jang jăl jang 2021-2025 kơ Dơnŏ anĭh ASEAN găh Pơtrŭt kơtang păng Vei lăng tơdrong pơm tơm kơ dĭh kơ drŏ kăn păng Hơ iŏh.

Tơ̆ Hop akŏm, tang măt ăn rim tĕh đak lơ̆m ASEAN hơlen găh iung jang kiơ̆ rim nơ̆r athei jang đei tơlĕch lơ̆m Hla bơar chĭh tơbăt tơdrong bơ̆ jang tơring găh Pơtrŭt kơtang vang mơ̆t hơdoi kơ jăp kơ Tơpôl ASEAN, ‘moi kiơ̆ tơdrong trŏ lăp kơ drŏ kăn păng hơ iŏh ASEAN kơ yuơ Việt Nam chĕp pơgơ̆r pơjing lơ̆m Pơprŏ Bơ̆ jang kơ Dơnŏ anĭh bơ̆ jang ASEAN găh Pơtrŭt kơtang tơdrong pơm tơm kơ Đe drŏ kăn păng Hơ iŏh jăl jang 2016-2020. ‘Ngoăih kơ ‘nŏh, rim kơdră tang măt hlôi tơbăt dĭh băl dôm tơdrong hơdrin đơ̆ng Việt Nam lơ̆m tơdrong xek tơlang pơm hla bơar pơm kon pơlei kơ tĕh đak, pơm hla bơar ŭnh hnam găh tĕh đak ayơ ăn dôm bơngai ư̆h kơ đei hơnăn lơ̆m tĕh đak ayơ, bơngai erĭh sa nông nôt lơ̆m khei năr au ki păng tơlĕch dôm nơ̆r athei, bơ̆ jang hơdoi trŭh sơnăm 2025.

5- Ƀlep lơ̆m năr tơbăt 100 sơnăm Năr rơnĕh ƀok Võ Văn Kiệt (23/11/1922- 23/11/2022), pơgê năr 21/11, tơ̆ pơlei tơm HCM, Dơnŏ anĭh bơ̆ jang pơgơ̆r tơbăt rim năr lêh tĭh pơlei tơm HCM pơgơ̆r blŭng a pơdă “Ƀok Võ Văn Kiệt kơdră chĕp pơgơ̆r gơ̆h hơgei-bơngai kŏng san mĭnh jơhngơ̆m đon hăm tĕh đak, yom bơnê hăm kon pơlei”. ‘Măng pơdă tơpŏh tơbăt um rup, hla bơar git kăl tơbăt găh “Erĭh sa păng tơdrong jang kĕch mang kơ ƀok Võ Văn Kiệt". Mă kăl um rup ƀok lơ̆m mă bơ̆ jang Kơdră chĕp pơgơ̆r Dơnŏ anĭh vei lăng kon pơlei păng Ƀĭ thư Đảng pơlei tơm HCM. Hăm trong bơ̆ jang gơ̆h hơgei, hơbĕch hơbal, trŏ lăp hăm chăl hle, ƀok hlôi hơmet pơ ‘lơ̆ng tơnap tap, ba pơlei tơm yak truư̆h sơđơ̆ng dơ̆ng, đơ̆ng rŏng ‘nŏh đei jing hơnĭh tơm jang mŭk drăm pơdrŏng hlŏh lơ̆m tĕh đak.