VOV4.Bahnar - Tơ̆ Hnam Kuô̆k hô̆i, Anih vei lăng jŏh ayŏ kơ dŏ xoang, pơ tho pơ hrăm kơ Kuô̆k hô̆i jang hơ doi hăm Anih tơm vei lăng tơ drong jang xa, linh jĭ rơ ka păng tơ pôl păng Anih jang kơ tĕh đak găh druh dăm Việt Nam pơ gơ̆r hop akŏm Trong tơ gŭm đơ̆ng tĕh đak hăm druh dăm sơ năm 2022, đei hơ năn “Pơ tho tơ drong jang ăn druh dăm”.

Tơ̆ hop akŏm, dôm bơ ngai tang măt pơ ma truh dôm tơ drong tơm nhen: Dôm trong jang, tơ drong tơ gŭm đơ̆ng Đảng, tĕh đak găh pơ tho tơ drong jang ăn druh dăm; tơ drong pơ tho tơ drong jang ăn druh dăm tơ̆ tơ ring tơ rang, druh dăm công nhân, druh dăm jo jăn, druh dăm bơ ngai kon kông, bơ ngai ‘nao brŏk đơ̆ng pơm ƀô đô̆i, hŏk tro, sinh viên; dôm tơ drong tơ gŭm, nơ̆r tơ tă găh pơ tho tơ drong jang ăn druh dăm lơ̆m khei ‘năr đei jĭ COVID-19 păng tơ drong jang kăch mang kơ măy kơ mŏk ‘măng mă 4, kŭm hăm dôm tơ drong nai đei ƀơm truh.

Hop akŏm oei jing tơ drong ‘lơ̆ng vă druh dăm roi tơ ƀôh dôm tơ drong hơ pơi ‘mĕh hăm anih jang kơ tĕh đak găh tơ drong pơ tho tơ drong jang ăn druh dăm. Đơ̆ng nŏh tơ gŭm ăn anih jang kơ pal băt păng sek tơ lang dôm tơ drong đei ƀơm truh, tơ gop pơm hơ tŏk đon hlôh vao ăn druh dăm păng đĭ đăng tơ pôl găh trong tơ gŭm pơ tho tơ drong jang.

Dơ̆ng: Tơ blơ̆