Jơ pơ gơ̆r Hop akŏm

‘Năr 20/10, tơ̆ plt Buôn Ma Thuột, dêh char Dak Lak, Anih tơm vei lăng choh jang xa păng atŏk tơ iung tơ ring tơ rang pơ gơ̆r “Hop akŏm choh jang xa rơ gŏh: Trong tơ jur kơ chơ̆t kơ nê̆ păng atŏk tơ iung choh jang xa kơ jăp ‘lơ̆ng”.

Ƀât blŭng sơ năm ‘nâu, Thủ tướng tĕh đak kĭ ăn “Trong jang gĭt kăl atŏk tơ iung choh jang xa păng tơ ring tơ rang kơ jăp ‘lơ̆ng, đơ̆ng 2021-2030, trong jang truh sơ năm 2050” đei kĭ lơ̆m khei 1/2022, hăm tơ drong tơm ‘nŏh “Pơ jing tơ drong choh jang xa, pơm tơ lĕch tơ mam drăm, vei lăng kơ jăp ‘lơ̆ng phe ƀa tơ mam xa kơ tĕh đak, tơ gop gĭt kăl ăn tơ drong vei sơ đơ̆ng mŭk drăm, tơ pôl, vei lăng cham char, tơ jră hăm tŏ ‘mi kial tơ plih. 

Vă jang đei trong jang gĭt kăl păng dôm nơ̆r pơ kăp hăm apŭng plenh tĕh, tơ drong pơm tơ jur kơ chơ̆t kơ nê̆ mưh choh jang ‘nŏh tôch gĭt kăl. Tơ̆ hop akŏm, đei lơ nơ̆r pơ ma truh trong tơ gŭm vă tưk tơ iung choh jang xa rơ gŏh. Tơ̆ hơ năp kơnh, kơ dră chĕp kơ̆l Anih tơm vei lăng choh jang xa păng atŏk tơ iung tơ ring tơ rang hơ pơi ‘mĕh đei lơ tơ dỏng jang tơ pă tơ̆ yăn âu năm truh 1 tơ drong choh jang xa rơ gŏh ‘lơ̆ng tơ̆ tơ ring tơ rang, kon pơ lei jang chŭn mir gơ̆h hơ gei.