Plei Ka Líp păng tơring oei xa Kai Ya, Ya Mâu, xăh Phan Sơn, dêh char Lâm Đồng đei hlŏh 700 unh hnam hăm vă jê̆ 3000 ‘nu bơngai, mă lơ ‘nŏh jĭ kon pơlei bơngai K’Ho, Raglai, Chăm, Nùng. Khei ‘năr  âu ki, kon pơlei lơ̆m xăh adrin jang kiơ̆ Tơdrong krao hơvơn "Đĭ đăng kon pơlei mât 1 ƀơ̆r đon pơjing tơring tơrang ‘nao, tơring kơdrâm rơgei". Đơ̆ng blŭng sơnăm truh dang ei, dôm unh hnam tơ̆ tơring âu vang tơgop hlŏh 180 năr jang, bơ̆ hơmet dơnâu, kôch hơbong đak, pơm hơmet trong pơyoa ăn tơdrong choh jang xa; vei lăng cham char, thu mong râm rĕk păng hơmet ming trong pơlei, kueng ƀôt đei bơ̆ jang hơnơ̆ng; hlŏh 550 unh hnam iŏk đei hơnăn unh hnam arih xa ‘lơ̆ng rơgei (đei hlŏh 90%)…

‘Nao  âu, kon pơlei pơgơ̆r đang ‘lơ̆ng Năr tơguăt đĭ đăng hơdrĕch hơdrung, pơjing jơhngâm  pran vă kŭm hăm băl vang pơjing tơdrong arih xa phĭ tơtŏ dơnŏ ‘lơ̆ng. Tơdrong hơiă đơ̆ng năr âu ‘nŏh jĭ dôm tơdrong hơri hơxoang, tơplŏng kơdâu păng tơmam xa ‘lơ̆ng đơ̆ng bơngai K'Ho, Raglai tơ̆ âu. Mŏ Đặng Thị Thái Thuận, bơngai Chăm, oei tơ̆ plei Ya Mâu, xăh Phan Sơn chơt hơiă tơroi, mŏ vang truh hăm tơdrong pơm ngôi nhen plŏng ƀao ƀô̆, dui băl, chô̆ măt teh bô̆i, mă lei hơiă hlŏh jĭ tơdrong thi pai tơmam xa, yoa khul iŏk đei yaih tơmam ‘lơ̆ng hlŏh.

“Năr tơguăt đĭ đăng hơdrĕch hơdrung chơt tơpă, mih ma duch nă đơ̆ng jơ̆p pơlei truh tơ̆ âu chĕp ba lơ tơdrong pơm ngôi, hơmet kơjăp tơdrong pơvei tơ̆ pơlei pơla. Ƀôh rim bơngai bu bu kŭm chơt hơiă ‘nă hal mưh truh tơ̆ âu. Khul nhôn iŏk đei yaih như̆k lơ̆m tơdrong thi pai tơmam xa, dôm tơdrong thi nai kŭm iŏk đei tơmam hơpăh ngăl.”

Ƀlep ƀât ‘măng mă âu, kon pơlei đơ̆ng dôm pơlei Ka Líp, Kai Ya, Ya Mâu vang tơgop lơ nơ̆r ‘lơ̆ng hơiă vă pơjing tơring oei xa roi đunh roi tŏk ‘lơ̆ng. Ƀok Mang Ngọc Văn, bơngai đei kon pơlei lui yom tơroi, năr pơchơt sơnăm ‘nâu đei pơgơ̆r ƀât mă lơ̆m teh đak oei bơ̆ jang kiơ̆ trong Khul kơdră pơgơ̆r tơring 2 tăl. Adrol ki, xăh Phan Sơn păng Phan Lâm so jĭ 2 xăh pha ra băl, dang ei đei tơmât hơdai jing mĭnh, kơna đơ̆ng dang ei truh đĭ sơnăm oei đei lơ tơdrong kăl bơ̆ jang, yoa thoi noh, kon pơlei tơ̆ dôm tơring atghei hơtŏk đon ‘mêm băl, vang yak hơdai hăm khul kơdră tơring lơ̆m rim tơdrong.

“Khul kơdră tơring oei tơlĕch lơ tơdrong jang kơna mih ma duch nă bơ̆n athei mât 1 ƀơ̆r đon vang tơgŭm ăn. Bơ̆n oei pơjing tơdrong arih xa ‘nao ‘lơ̆ng hơiă  tơ̆ tơring oei yoa thoi noh athei hŭt lê̆ dôm tơdrong juăt so, ưh kơ ‘lơ̆ng; athei băt ‘mơ ‘met lơ̆m tơdrong pơgơ̆r pơdong bơngai lôch, et pơkong, jô̆ hloi găh jên hu, mŭk mam păng jơ năr, đei thoi nŏh bơ̆n gơ̆h kĕ jang tŏk.”

Ƀok Mai Hồng Đăng, Kơdră vei lăng kon pơlei xăh Phan Sơn, dêh char Lâm Đồng tơroi, tơ̆ hơnăp kơnh, tơring hơnơ̆ng hơtŏk tơdrong ‘lơ̆ng mưh krao hơvơn “Đĭ đăng kon pơlei mât 1 ƀơ̆r đon pơjing tơring tơrang ‘nao, tơring kơdrâm rơgei”, tơklep hăm dôm tơdrong jang atŏk tơiung mŭk drăm, tơpôl tơ̆ tơring. Lơ̆m noh, athei atŏk tơiung mŭk drăm unh hnam, tơplih ming trong choh jang xa mă lăp, pơm hơtŏk iŏk yoa păng tơjur tơnuh hin. Tơring kŭm oei tơlĕch trong jang mă lăp vă atŏk tơiung tĕch mơdro, chă tơmang lăng.

“Tơring oei jĭ trong gre 28B kơjung truh 37 km, lơ̆m khei ‘năr truh tơring vă tơchĕng hơlen dôm tơdrong hơgăt vă hơtŏk tơdrong pơvih pơvăn, tĕch mơdro kiơ̆ trong gre ‘nâu păng tơ̆ tơring kŭm đei dơnâu Sông Luỹ tôch xă păng ‘lơ̆ng, ‘nâu kŭm jing 1 lơ̆m dôm tơdrong ‘lơ̆ng vă sơng tơmoi chă tơmang lăng tơdăh bơ̆n băt trong iŏk yoa ‘lơ̆ng dôm anih ‘lơ̆ng hơiă âu.”

Dêh char Lâm Đồng đơ̆ng rŏng kơ tơmât hơdai jing dêh char đei teh xă hlŏh lơ̆m teh đak, hăm 49 hơdrĕch hơdrung arih xa hơdai, đơ̆ng bri kông Tây Nguyên truh tơ̆ dôm xăh tơter đak dơsĭ, đei lơ tơdrong juăt ‘lơ̆ng hơiă, ƀĕnh um ai hơdrĕch hơdrung.