Pơgê 26/3, Thủ tướng Phạm Minh Chính păng Khŭl tang măt gĭt kăl kơ Việt Nam hlôi truh tơ̆ Hà Nội, pơtôch ‘lơ̆ng hơiă ‘măng năm ngôi bơ̆jang tơ̆ Liên bang Nga hăm jơ bơ̆jang tôch kơ kiĕr vă jê̆ 30 tơdrong jang lơ̆m 3 năr. ‘Moi kiơ̆ dôm ‘măng pơma đam, pơma dơnuh hăm kơdră chĕp kơ̆l gĭt kăl Nga, 2 păh iŏk đei drơ̆ng nơ̆r ‘lơ̆ng găh tơdrong hơnơ̆ng pơm ‘lơ̆ng hloh dơ̆ng đon lui chĭnh trĭ, hơtŏk loi dơ̆ng hlôh băt dĭh băl lơ̆m tơdrong pơvei tơbôl joăt joe.

Tơdrong hơiă gĭt kăl đơ̆ng ‘măng năm ngôi, bơ̆jang ‘noh jĭ tơdrong Thủ tướng Phạm Minh Chính păng Thủ tướng Mikhail Mishustin vang dơ̆ng lăng lêh kĭ Tơdrong tơchơ̆t jang hơdai pơm Hnam kơmăy ŭnh điên hạt nhân tơ̆ Việt Nam. ‘Nâu đei lăng jĭ tơdrong tơm ‘lơ̆ng gĭt kăl, tơƀôh tơdrong pơgơ̆r dơ̆ng tơdrong jang ŭnh điên hạt nhân teh đak, pơih ăn trong jang hơdai ‘nao lơ̆m tơdrong jang ŭnh hơyuh gĭt kăl. ‘Măng năm ngôi, bơ̆jang iŏk đei lơ jơnei ‘lơ̆ng, tơgop băt hơdăh dơ̆ng păng hơtŏk tơdrong pơvei Jang hơdai gĭt kăl tôm tông Việt Nam - Liên bang Nga lơ̆m jăl jang ‘nao.