VOV4.Bahnar – Kơsơ̆ năr 5/10, tơ̆ Hnam Kuôk hô̆i, bơngai jang lơ̆m Anih tơm Chĭnh trĭ Phŏ Kơdră juăt jang kơ Kuôk hô̆i Trần Thanh Mẫn hlôi xơng pơma dơnuh hăm Phŏ Kơdră Kuôk hô̆i teh đak Cộng hòa Dân chủ Nhân dân Lào, Kơdră Anih jang Rơngei păng Tơguăt tơguăl Lào Sommad Pholsena atŭm hăm Khul kơpal tang măt ăn Anih jang âu truh tơmang păng bơ̆ jang tơ̆ Việt Nam.

 Pơma ăh jơ xơng, Phŏ Kơdră Kuôk hô̆i Trần Thanh Mẫn ăn tơbăt, Khul kơpal Đảng, Khul kơpal teh đak, Kuôk hô̆i Việt Nam hơnơ̆ng tơgŭm, pơm trong hiôk vă dôm anih jang kon pơlei Việt Nam hơnơ̆ng hơtŏk tơ iung, hơtŏk tơbôl păng jang hadoi hăm dôm anih jang kon pơlei Lào. Drơ̆ng nơ̆r găh dôm tơdrong pơtruh đơ̆ng Phŏ Kơdră Kuôk hô̆i Trần Thanh Mẫn, Phŏ Kơdră Kuôk hô̆i Lào Sommad Pholsena ăn tơbăt, găh Lào gô pơtoi tơroi, pơtho păng vei răk tơdrong tơguăt tơbôl kăp gĭt kơ 2 teh đak; hơtŏk pran akŏm joh ayŏ, tĕch pơdro, tơmang pơhiơ̆.

VOV/Lan tơblơ̆ nơ̆r