Đơ̆ng blŭng xơnăm hŏk 2022-2023 truh dang ei, lơ̆m tơring kơ dêh char Lâm Đồng đei 5 ‘măng teh dong lơ̆m hnam trưng đơ̆ng jăl kơđeh truh jăl THPT pơm hiơ̆r lơ̆m tơpôl. Lơ̆m noh, lơ tơdrong teh tôn kiơ̆ khul pơm rơka hơbur hăm bơngai ƀơm teh dong athei năm ƀĭch hnam pơgang. Hơdăh noh đei 2 ‘nu hŏk tro drăkăn kơ hnam trưng jăl kơđeh tơ̆ phương 2, pơlei tơm Đà Lạt ƀơm bơngai drŏnglo đơ̆ng ‘nguaih dui tơmơ̆t tơ̆ hnam yô chơgaih kơ hnam trưng pơm ƀlal ‘mê̆ ‘mach. Hli hloh noh tơdrong đei ƀôh ăh ‘năr dơ̆ng năr 21/10, minh ‘nu hŏk tro drŏnglo lăm 9 kơ hnam trưng THCS Nam Ban (apŭng Lâm Hà) ƀơm ƀet pơlôch kơtă ăh ‘nao lĕch đơ̆ng hŏk păng tŏk bŏk oei rok trong vih tơ̆ hnam.

Kiơ̆ kơ ƀok Huỳnh Quang Long, Phŏ Kơdră Anih Pơtho Pơhrăm dêh char Lâm Đồng, tơdrong teh tôn lơ̆m hnam trưng tơ̆ dêh char tŏk bŏk đei ƀôh hli hlơt, minh ƀar tơdrong pơrăm hlăm truh đon bơnôh, jơhngơ̆m jăn đe hŏk tro, pơm pơngơ̆t kơ đon lơ̆m tơpôl păng pơjing đei lơ tơdrong blĕch lơ̆m tơpôl kon pơlei: “Cham char hnam trưng hĕl xơ ‘ngon, đơ̆ng bơngai pơtho truht ơ̆ đe hŏk tro, năm tơ̆ yơ nhôn duh ƀôh kơtơ̆ng chă jâu âu to. Đang kơ noh đe oh akŏm jing khul pơma dơnuh dih băl, pơm ăn cham char hnam trưng hŏk hĕl hol tôch dêh. ‘Nguaih kơ noh, hăp duh pơm ăn đe mĕ ƀă hŏk tro hiơ̆r kơ đon, pơm ăn tơdrong pơtho pơhrrăm xơđơ̆ng kơ hnam trưng ưh đei tơnăp bơih. Păng lơ̆m tơpôl adoi tơrĕk truh tơdrong âu păng hăp adoi pơrăm truh tơdrong pơhrrăm đon bơnôh đơ̆ng tơpôl hăm đe hŏk tro. Tơbang hơdăh tơdrong tơjruh găh đon bơnôh tơgăl kơ ming hơmet pơ ‘lơ̆ng”.

Hăm tơdrong teh tôn lơ̆m hnam trưng hŏk đei ƀôh tŏk, Anih vei lăng kon pơlei dêh char Lâm Đồng hlôi tơchơ̆t tơlĕch lơ hla bar pơkăl kơdră Anih Pơtho Pơhrăm pơgơ̆r, jang hadoi hăm kơdră Anih Axong jang, Linh jĭ rơka păng Tơpôl, kơdră Kŏng ang dêh char păng kơdră Anih vei lăng kon pơlei rim apŭng, pơlei tơm, kơdră rim anih jang, jơnŭm tơpôl, anih jang đei tơrĕk lơ̆m dêh char hơtŏk dôm trong jang vă hơmet pơ ‘lơ̆ng. Lơ̆m noh, tơrĕk truh tơdrong hơtŏk hlôh vao, xơnong jang đơ̆ng kang ƀô̆ kơpal, bơngai pơtho, bơngai jang tơ̆ hnam trưng, hŏk tro păng unh hnam hŏk tro lơ̆m tang găn păng tơjră teh dong lơ̆m hnam trưng; kơchăng tơlĕch pơm kiơ̆ dôm tơdrong vei xơđơ̆ng tơpôl tơ̆ ‘măng jang hnam trưng păng dôm tơring tăp dăr, tơtom tang găn dôm bơngai đơ̆ng ‘nguaih mơ̆t pơyoch, teh băl, pơrăm truh đon bơnôh đe hŏk tro, sinh viên.

Lơ̆m khei 9 păng khei 10 âu ki, lơ̆m tơring kơ dêh char Đăk Lăk hlôi đei lơ tơdrong teh tôn lơ̆m hnam trưng. Lơ̆m noh đei 2 tơdrong hli hlơt đei ƀôh tơ̆ hnam trưng THPT Krông Ana păng hnam trưng THCS Nguyễn Du, thĭ xăh Buôn Hồ.  Ƀok Phạm Đăng Khoa, Kơdră Anih Pơtho Pơhrăm Đăk Lăk ăn tơbăt, dôm tơdrong teh tôn băl đơ̆ng đe hŏk tro hơnơ̆ng đei tơ̆ ‘nguaih hnam trưng, đơ̆ng rŏng kơ jơ hŏk. Tơdrong tơm noh kơyươ kơƀah tơdrong pơtho akhan đơ̆ng unh hnam, ƀơm tơrĕk đơ̆ng dôm kơtơ̆ng ang păng tơdrong pơm kơnê̆ ưh đei hơlen kơjăp đơ̆ng mạng tơpôl. Vă hơmet pơ ‘lơ̆ng, Anih Pơtho Pơhrrăm Đăk Lăk pơkăl rim hnam trưng hơtŏk vei hơlen đe hŏk tro, pơih lăm hŏk tơroi tơbăt găh khôi lươ̆t, akŏm ‘năr hŏk hơlen găh tơdrong kăl vă pơhlôh ăn đe hŏk tro lơ̆m tơdrong “pơma ưh hăm tơdrong teh dong păng pơm kơnê̆ lơ̆m tơpôl”. Ƀok Phạm Đăng Khoa akhan: “Nhôn hlôi pơjao xơnong jang ăn hnam trưng, ăn bơngai pơtho pơgơ̆r lăm, ăn dôm khul đoan đô̆i lơ̆m hnam trưng hơnơ̆ng tơrĕk truh dôm bơngai ƀơm tơnap tap găh mŭk drăm dăh mă đei tơdrong tơnap adrô̆ găh unh hnam vă tơgŭm đe oh tang găn tơdrong teh tôn băl lơ̆m hnam trưng”.

Tơdrong teh tôn băl lơ̆m hnam trưng dang ei noh hiơ̆r kơ đon ăh mă đe hŏk tro teh tôn băl roi năr roi hli hlơt, pơrăm truh jơhngơ̆m jăn, đon bơnôh đe hŏk tro. ‘Nguaih kơ hop akŏm Kuôk hô̆i, minh ƀar bơngai tang măt akhan, unh hnam, hnam trưng păng tơpôl kăl atŭm jơhngơ̆m vă pơtho akhan đe oh trŏ ƀlep hloh. Tơ̆ ‘măng hop akŏm mă 4, Kuôk hô̆i jăl 15, lơ bơngai tang măt hlôi tơroi găh tơdrong đei ƀôh âu. Kiơ̆ bơngai tang măt Đặng Bích Ngọc, tang măt ăn khul jang Kuôk hô̆i dêh char Hòa Bình: hŏk tro dang ei ƀơm răm găh đon bơnôh đơ̆ng lơ păh, lơ̆m noh đei hrat đơ̆ng tơdrong hŏk pơhrăm, đơ̆ng tơdrong erih kơdih po hŏk tro păng tơrĕk đơ̆ng mạng tơpôl. Kơyươ noh kăl đei tơdrong jang hadoi kơjăp đơ̆ng hnam trưng păng unh hnam lơ̆m pơtho pơ ‘lơ̆ng đon bơnôh: “Athei đei tơdrong jang hadoi kăp gĭt đơ̆ng unh hnam păng hnam trưng, duh athei đei tơdrong akŏm hŏk hôp, vă tơroi kơ dôm đei ƀôh lơ̆m tơpôl, dôm tơdrong đei ƀôh kơnê̆ găh đon bơnôh, găh pơtho pơ ‘lơ̆ng đon bơnôh kon bơngai, vă pơm thoi yơ ăn đe mon gơh hram tôm tơdrong ‘lơ̆ng. Unh hnam duh ưh gơh pơjao đĭ ăn bơngai pơtho tơ̆ hnam trưng, mă athei hơnơ̆ng đei tơdrong tơroi tơbăt dih băl. Đe mĕ ƀă hŏk tro duh athei tơrĕkt ơjê̆ hăm hnam trưng hloh, hăm bơngai pơtho kon hơ ioh po hloh”.

Minh ƀar bơngai tang măt ăn Kuôk hô̆i duh akhan, hnam trưng kăl tơrĕk tơdrong pơtho minh ƀar môn hŏk nhen hlôh vao găh erih oei xa, pơtho pơ ‘lơ̆ng đon bơnôh, hơmet pơhlôh tơdrong trŏ ăn đe hŏk tro găh tơdrong jang tơnăp ‘lơ̆ng, hơtŏk xơnong jang duh nhen tơdrong tơjră kơnê̆ vă tang găn păng tơpuh lê̆ tơdrong teh tôn lơ̆m hnam trưng hŏk.