Phŏ Thủ tướng akhan, athei hơtŏk tenh tơdrong ming man, hơdrin asong gre vih vơ̆t hơdrol kơ năr 2/9 păng keh đang tôm jăl trong lơ̆m sơnăm ou. Tơdrong min gman pơkăp 2 găn tơring teh kông kơ 2 dêh char, yuơ Hơnih tơm Ming man pơgơ̆r ming man, Jơnŭm jang Vei lăng tơdrong ming man Trong gre treng iŏk ming man, hăm jăl trong hơtaih 37,5km. Kiơ̆ hơnih iŏk ming man, 'mi kial đak hơbông đunh năr lơ̆m sơnăm 2025, teh noh kông krang, đei lơ gơng trong trôm 'noh kơjă tơmam drăm ming man pơm tơhlăk truh tơdrong ming man, dang ei pơtơm man đei pơhlom 65% tơdrong jang. Puăn trong trôm đei  Ea Trang 1, Ea Trang 2, Phượng Hoàng păng Chư Te hăm trong hơtaih 5.550m hlôi sir kôch đang, tŏk bŏk oei man bê tông pơnơ̆ păng pơkăp kơmăi hơlen ki thuơ̆t. Hăm tơdrong adar ou, Phŏ Thủ tướng Hồ Quốc Dũng pơgơ̆r, dah tenh kuăng hơtŏk ming man, hrôih asong ăn gre vih vơ̆t lơ̆m tôm jăl trong.

Tơ̆ jơ dăr hơlen, kơdră dêh char Đăk Lăk pơtruh nơ̆r hăm Trung ương asong ming man atăm pơhlom 5km trong dơ̆ng vă pơtoi hăm trong kơdou hrĕnh Khánh Hòa - Buôn Ma Thuột pơtoi hăm trong Đại lộ Đông Tây, jăl trong yak găn tơring cham gre păr Buôn Ma Thuột vă hơtŏk tơdrong tơnăp pơyua ah mă asong gre kơdou kiơ̆ jăl trong 'nao ou.