Khei 11/2021, Trung ương Khul drŏ kăn Việt Nam jang hơdoi hăm Anih vei lăng hơdrĕch kon kông pơgơ̆r hŏk pơhrăm, tơlĕch jang tơdrong ‘nâu tơ̆ 51 dêh char, plt ‘nŏh jĭ tơring kon kông păng groi kông. Tơdrong jang “pơm hơtŏ băl kơplăh drŏ kăn hăm drŏ nglo păng sek tơlang dôm tơdrong kăl hăm đe drŏ kăn păng đe hơioh” jĭ 1 lơ̆m 10 tơdrong jang găh Tơdrong jang tơm kơ teh đak atŏk tơiung mŭk drăm tơpôl tơ̆ tơring kon kông păng groi kông đơ̆ng 2021-2030. Tơdrong jang yoa Trung ương Khul drŏ kăn Việt Nam đei pơjao pơgơ̆r bơ̆ jang. ‘Nâu jĭ ‘măng mă blŭng lơ̆m tơdrong jang tơm kơ teh đak atŏk tơiung mŭk drăm, tơpôl tơ̆ tơring kon kông păng groi kông đei 1 tơdrong jang hơdrô̆ vă hơtŏk tơdrong hơtŏ băl kơplăh drŏ kăn hăm drŏ nglo.

Trung ương Khul hlôi hơtŏk dôm tơdrong jang roi tơbăt găh tơdrong jang 8 kiơ̆ đơ̆ng chih tơdrong kơtơ̆ng ang, chă pơma đam lơ̆m radio, tivi. Jang hơdoi hăm dôm anih tơm, anih jang kơpal bơ̆ jang dôm tơdrong hơgăt đơ̆ng tơdrong jang 8 ƀơm truh hơnăp jang, tơdrong jang tơ̆ rim anih jang.

Hơdai hăm dôm tơdrong tơgŭm đơ̆ng Trung ương khul, Khul drŏ kăn jơ̆p tơring oei akŏm jơhngâm bơ̆ jang dôm tơdrong jang tơ̆ 8 xăh đei rơih jang pơlong hơdrol, hlôi pơjing păng vei kơjăp 32 trong jang roi tơbăt lơ̆m tơpôl, 4 Anih hơđơ̆ng, 4 Câu lạc bộ chĕp kơ̆l tơdrong tơplih păng pơgơ̆r đei 4 tơdrong pơma nuh găh trong vă jang. Tơrek, pơgơ̆r pơtâp pơhrăm vă hơtŏk đon rơgei ăn kăn ƀô̆ drŏ kăn kon kông. Pơtâp pơhrăm, pơtho tơƀôh, dăr lăng, hơlen năng tơdrong hơtŏ băl kơplăh drŏ kăn hăm drŏ nglo, hơtŏk đon gơ̆h jang hơdoi găh hơtŏ băl đơ̆ng drŏ kăn hăm drŏ nglo ăn kăn ƀô̆, apŭng, xăh păng pơlei pơla.

Kiơ̆ yă Trần Lan Phương, Phŏ Kơdră vei lăng Khul drŏ kăn Việt Nam, đơ̆ng rŏng 3 sơnăm tơlĕch dôm tơdrong jang roi tơbăt, hơtŏk đon hlôh vao ăn kăn ƀô̆ bơngai kon kông, hơtŏk đon gơ̆h jang hơdoi tơdrong pơm hơtŏk băl đơ̆ng drŏ kăn hăm drŏ nglo ăn kăn ƀô̆ lơ̆m rim anih jang chinh trĭ, đe kră pơlei, ƀok pơgơ̆r pơlei, bơngai đei bưng ai, đei kon pơlei lui yom păng pơgơ̆r pơma nuh găh trong jang tơ̆ xăh păng tơ̆ pơlei pơla hlôi đei tơlĕch, dôm anih jang păng khul drŏ kăn dôm dêh char tơlĕch trong bơ̆ jang hrơ̆ch ‘lơ̆ng, đei trong tơgŭm tơ̆ dôm xăh jang pơlong năng hơdrol.

“Dôm tơdrong pơtho tơƀôh pơgơ̆r jang pơlong năng blŭng a hlôi pơm tơplih ‘lơ̆ng lơ̆m jơhngâm đon, tơdrong vă jang đơ̆ng kon pơlei, vang tơgop pơm tơplih đon tơchĕng, trong bơ̆ jang, sut pơđĭ đon tơchĕng ưh hơiă, đa ‘mĕh jăm joă drŏ kăn, găn ƀiơ̆ dôm tơdrong răm ưh kơ ‘lơ̆ng hăm drŏ kăn păng đe hơioh.”

Yă Lò Thị Thu Thủy, jang lơ̆m Khul kơdră pơgơ̆r, Kơdră Anih vei lăng hơdrĕch kon kông – Tơdrong lui khop, Trung ương Khul drŏ kăn Việt Nam ăn tơbăt: dôm anih jang đơ̆ng Trung ương Khul hlôi chih tơlĕch hla ar pơtho pơjing, tơƀôh trong jang păng pơjao hla ar pơvih ăn dôm khul jang roi tơbăt, pơgơ̆r jang kiơ̆ lơ trong jang. Mă loi jĭ trong jang CLB "Bơngai chĕp kơ̆l tơdrong tơplih". Chih hơdăh lơ tơdrong tơroi kiơ̆ đơ̆ng pơm video, phĭn um rup tôch hơiă, lăp hăm rim bơngai.

“Kiơ̆ đơ̆ng chă pơtâp pơhrăm, pơtho tơƀôh đon hlôh vao ăn kăn ƀô̆ Khul păng kăn ƀô̆ dôm anih jang đei ƀơm truh tơ̆ xăh găh pơjing, pơgơ̆r jang păng hơtŏk tơdrong ‘lơ̆ng đơ̆ng rim trong jang hlôi đei Trung ương Khul năng kăl bơ̆ jang hơnơ̆ng rim sơnăm. Atŭm hăm ‘nŏh hơtŏk tơdrong tơgŭm ki thuơ̆t ăn tơring bơ̆ jang, vei lăng dôm trong jang. Pơgơ̆r roi tơbăt, pơtho tơƀôh mă ‘lơ̆ng lơ̆m tơpôl.”

Kiơ̆ hla ar chih tơroi đơ̆ng Anih vei lăng hơdrĕch kon kông-Tơdrong lui khop, Trung ương Khul drŏ kăn Việt Nam, dôm tơdrong jang đơ̆ng rim khul jang tơ̆ dôm xăh akŏm lơ̆m tơdrong roi tơƀôh, pơhlôh đon vă pơm tơplih đon tơchĕng, trong bơ̆ jang, sut pơđĭ đon tơchĕng ưh kơ ‘lơ̆ng, ưh kơlăp găh drŏ kăn hăm drŏ nglo. Kiơ̆ nơ̆r pơtho đơ̆ng Trung ương, rim khul hlôi krao hơvơn dôm anih jang, khul grŭp vang bơ̆ jang păng iŏk đei lơ tơdrong ‘lơ̆ng./.