Kiơ̆ Jơnŭm pơgơ̆r ming man tơdrong kăl yua ăn kon pơlei păng kŏng ngĭp dêh char Đăk Lăk, 3 tơdrong jang tơ̆ dôm xah Buôn Đôn, Ia Rvê păng Ia Lốp hlôi keh đang đei  80% tơdrong pơjao jang. Rim hơnih iŏk ming man keh đang tơđrong pơkăp ki thuơ̆t, tơmam drăm kăl păng hơdrin keh đang hơdrol kơ năr 6/8. Vă vei sơđơ̆ng pơkăp jang, Jơnŭm pơgơ̆r jang pơtơm tơdrong jang "70 măng năr ưh đei pơdơh pơdei", pơtruh kang ƀô̆ hơlen lăng tơdrong ming man; Hơnih vei lăng Khul linh dêh char Đăk Lăk adoi pơtruh khŭl jang kơtă vă tơgŭm ăn tơdrong ming man. Atŭm hăm 'noh, Jơnŭm pơgơ̆r tơdrong jang tŏk bŏk chih pơkeh hla bơ-ar pơkăp ming man Hnam trưng hŏk oei hơdoi teh đak rong 'me tơ̆ xah Ea Bung. Ƀok Võ Văn Lợi, Phŏ Kơdră Jơnŭm pơgơ̆r ming man tơdỏng kăl yua ăn kon pơlei păng kŏng ngĭp dêh char Đăk Lăk ăn tơbăt: “Hăm tôm hơnih jang, hlôi găn hloh tơdrong tơnap gah bơngai jang, tơnap tap gah tŏ 'mi kial, tơnap gah chơ tơmam drăm vă pơtrŏ hăm tơlĕch jang atŭm. Dang ei, 3 hnam trưng hlôi keh đang hloh 80% tơdrong tơlĕch jang. Hăm tơdrong jang thoi ou, 'noh gô đei minh ƀar tơdrong jang ah năr 15 khei 7 gô keh đang tôm tơchơ̆t tơlĕch, đei hloi pơlăp kơmăi kơmŏk ăn tơdrong pơtho pơhrăm. Vei sơđơ̆ng trŏ kiơ̆ tơchơ̆t đơ̆ng Hơnih tơm Chinh trĭ adoi nhen đơ̆ng Hơnih jang dêh char, Jơnŭm vei lăng kon pơlei păng Hơnih jang vei lăng kon pơlei”.

Dêh char Lâm Đồng adoi tơlĕch man 5 hnam trưng hŏk oei hơdoi teh đak rong 'me tơ̆ dôm xah sơlam đei Quảng Trực, Thuận An, Tuy Đức, Thuận Hạnh păng Đắk Wil, hăm kơsô̆ jên asong jang hloh 1.140 ti hlj. Rim tơring tŏk bŏk khŏm mă keh đang dôm tơdrong tơlĕch jang trŏ pơkăp dah mă hrôih hloh tơchơ̆t tơlĕch, vei sơđơ̆ng ăn tơdrong pơtho pơhrăm đơ̆ng blŭng sơnăm hŏk 'nao.

Lơ̆m noh, 2 tơdrong ming man Hnam trưng hŏk oei hơdoi teh đak rong 'me tơ̆ dôm xah sơlam Quảng Trực păng Thuận An tŏk bŏk oei hơtŏk tenh tơchơ̆t ming man. Truh dang ei, dôm tơdrong ming man vă jê̆ keh đang; rim hơnih iŏk ming man pơtruh bơngai jang, kơmăi kơmŏk, hơtŏk jơ jang vă dah ming man keh đang hơdrol kơ năr 15/8, hrôih hloh 15 năr pơtêng hăm tơchơ̆t pơjao jang. Yă Lê Thị Bích Liên, Kơdră Hơnih Pơtho Pơhrăm dêh char Lâm Đồng ăn tơbăt: “Hơnih Pơtho Pơhrăm hlôi pơm jang kơtă hăm xah lơ 'măng bơih păng hlôi pơdrơ̆ng hăm xah gah trong asong hŏk tro năm hŏk, păng hơnih pơtho pơhrăm hlôi keh đang tơdrong asong hŏk tro năm hŏk. Gah bơngai pơtho 'noh, Hơnih Pơtho Pơhrăm hlôi tơgŭm keh đang ăn tơdrong iŏk bơngai pơtho đơ̆ng dôm hnam trưng kơ tơring Bình Thuận păng Lâm Đồng vă asong ăn kơ 2 hnam trưng sơlam teh”.

Tơdrong hăt hot keh đang ming man dôm hnam trưng hŏk oei hơdoi teh đak rong 'me tơ̆ dôm xah sơlam kơ tơring Tây Nguyên ưh hơdrô̆ pơtrŏ hăm tơdrong kăl tơ̆ hơnăp gah hơnih pơtho hŏk pơhrăm ăn sơnăm hŏk 'nao, mă oei tơƀôh hơdah tơdrong tơgŭm đơ̆ng Đảng păng Teh đak hăm tơdrong jang pơtho pơhrăm tơ̆ tơring sơlam teh.