VOV4.Bahnar - Hơnơ̆ng bơ̆ jang ‘măng hop akom mă 14, pơgê năr 11/8 kơ yuơ Kơdră chĕp pơgơ̆r Kuô̆k hô̆i Vương Đình Huệ pơm tơm, 100% ‘nu kơdră jang lơ̆m Dơnŏ anĭh chĕp pơgơ̆r Kuô̆k hô̆i hlôi drơ̆ng mĭnh nơ̆r pơdrơ̆ng kiơ̆ 2 Tơdrong tơchơ̆t găh: Pơjing thĭ trân Bình Phú, apŭng Cai Lậy, dêh char Tiền Giang; pơjing thĭ xah Chơn Thành păng pơjing rim phương găh thĭ xah Chơn Thành, dêh char Bình Phước. Drơ̆ng mĭnh nơ̆r 2 Tơdrong tơchơ̆t, mă lei Dơnŏ anĭh chĕp pơgơ̆r Kuô̆k hô̆i athei, hăm thĭ xah Chơn Thành kăl tơƀô̆h hơdăh khŭl bơ̆ jang chĕp pơgơ̆r kơ rim khŭl jang chĭnh trĭ lơ̆m tơring trŏ lăp hăm tơdrong chĕp pơgơ̆r kiơ̆ Tơdrong tơchơ̆t. Lơ̆m khei ‘năr jang kiơ̆ Tơdrong tơchơt 06 đơ̆ng Dơnŏ anĭh tơm Chĭnh trĭ găh hơmet ăn tơ iung pơjing păng atŏk tơ iung kơ jăp ‘lơ̆ng tơring kơdrơ̆m Việt Nam trŭh sơnăm 2030, lăng trŭh sơnăm 2045, Dơnŏ anĭh chep pơgơ̆r Kuô̆k hô̆i athei Khŭl kơdră tĕh đak dăr lăng đĭ đăng rim apŭng lơm tĕh đak, apŭng ayơ tim mă đei thĭ trân, apŭng so ‘nŏh kăl chĭh tơbăt, đei trong pơ prŏ lăng ba tơmơ̆t jên jang păng tơgŭm djru tơring vă pơm pơkeh hla bơar pơtrŭh ăn Dơnŏ anĭh chĕp pơgơ̆r Kuô̆k hô̆i, sơđơ̆ng hrôih iok đei nơ̆r athei 100% rim apŭng lơ̆m tĕh đak đei thĭ trân, hơnĭh bơ̆ jang apŭng so.

Tơblơ̆ nơ̆r: Amazưt