VOV4.Bahnar - Đảng bơ̆n đei tơ iung pơjing ăh pơyan puih mak, puih mak kơ teh đak păng hơdrung hơdrĕch bơ̆n hăm lơ tơdrong jơnap păng hơpơi 'moih. 92 pơyan puih mak đei Đảng – anih dơ̆ng kơ teh đak roi năr roi đei xơkơ̆t ưh adrô̆ lơ̆m tơring mă lơ̆m kơpal teh hloi. Tơbăt 'Năr tơ iung pơjing Đảng jing minh năr hnưr erih hram lơ̆m plei nuih kơ trĭu kon pơlei Việt lơ̆m rim 'măng Puih mak vih.

Hnưr erih 92 xơnăm yak hadoi hăm hơdrung hơdrĕch, Đảng CSVN nhen minh hơnglŏng ang hơdăh chơng 'nhăk, tơƀôh ăn trong, hơ 'nhăk teh đak Việt Nam bơ̆n iŏk đei đơ̆ng jơnei âu truh jơnai nai. Tơdrong đei jơnei kăp gĭt noh pơchră ang hơdăh lơ̆m hnưr erih hlôi đei chih răk, lơ̆m dôm tơdrong tơplih rim năr kơ teh đak, kơ rim bơbŭng hnam, jâ̆p pơlei pơla ataih jê̆.

1 - Tơring Nâm Nung, apŭng Krông Nô, dêh char Dak Nông jing tơring kăn kư̆ kĕch mang lơ̆m chăl tơblăh Phalăng păng Ayăt Mi dŏng tĕh đak. Kiơ̆ yok tơdrong joăt nuih mơng, Dơnŏ anĭh Đảng, Khŭl kơdră chĕp pơgơ̆r păng kon pơlei tơring Nam Nung ling lang hơdrin yak hlŏh tơnap tap, atŏk tơ iung kơtang, tơ iung pơjing pơlei pơla atŏk tơ iung ‘lơ̆ng. Pơđĭ lơ̆m tơring hrei au đei 1.900 ŭnh hnam, hăm dang 8.000 ‘nu bơngai (lơ̆m au đei dang 2.000 ‘nu bơngai M’nông). Đei tơdrong lăng ba tơmơ̆t jên jang đơ̆ng Đảng păng Tĕh đak, tơdrong erĭh sa kơ kon pơlei ling lang atŏk ‘lơ̆ng, sơnăm au jang sa iŏk đei jô̆ hơtŏ măt bơngai ‘nŏh 40 trĭu hlak jên. Ƀok Y Sram oei tơ̆ pơlei R’Cập, tơring Nâm Nung tơbăt.“Bơnê kơ Đảng, Tĕh đak hlôi pơjing rơvơn ăn kon pơlei bơngai M’nông pơma hơdrô̆ păng kon pơlei nhôn pơma atŭm. Hrei au, trong, ŭnh hơyŭh, hnam trương, hnam pơgang hlôi đei tôm. Đĭ đăng kôn mon kon hơ ‘lơ̆p đei năm hŏk ngăl, rim ŭnh hnam đei kon hơ ‘lơ̆p tôm sơnăm năm hŏk jei năm hŏk tôm. Sơ̆ tơ̆ au ư̆h kơ đei hnam trương pơmat tat dêh, mă kăl lơ̆m chăl tơblăh vang, ‘nau jing tơring kăn kư̆ kĕch mang, kon pơlei dơnŭh hin mơmat tat dêh. Mă lei hrei au hlôi tơplĭh bơih, tơdrong erĭh sa kơ kon pơlei roi năr roi đei ƀô̆h hlŏh pơtêng hăm sơ̆”.

2 – Dêh char Đăk Lăk dang ei đei 4 tơdrong khop tơm noh Kŏng yăo, Tin lành, Phâ̆t yăo păng khop Cao đài, hăm hloh 600.000 bơngai kiơ̆ lui, đei 32% kơsô̆ măt kon pơlei. Lơ̆m dôm xơnăm kơ âu, hăm tơdrong pơgơ̆r đơ̆ng Đảng, kon pơlei kiơ̆ khop adoi hăt hot jang hơtŏk mŭk drăm tơpôl, pơjing pơlei pơla, erih tơnăp ƀlep kiơ̆ êbiang. Mŭk sư Y Ky Êban, Kơdră Jơnŭm Khop Tin lanh Ea Tul, xăh Ea Tul, apŭng Cư M’gar, Đăk Lăk tơroi: Đon lui đơ̆ng kon pơlei noh tih tên, trŏ hăm pơkăp hăm tơdrong khop, lui ngeh hăm tơdrong pơgơ̆r đơ̆ng Đảng. Hop akŏm jâ̆p teh đak 'măng mă 13 kơ Đảng đei pơgơ̆r keh kong 'lơ̆ng rŏ lơ̆m xơnăm âu ki duh nhen tơdrong hơ iă lui ngeh đơ̆ng rim kon pơlei găh dôm tơdrong tơchơ̆t trŏ ƀlep, hơ 'nhăk teh đak hơtŏk găh rim tơdrong. Duh kiơ̆ mŭk sư Y Ky Êban, lơ̆m tơdrong tơjră pơrang jĭ Covid-19, xơnong pơgơ̆r đơ̆ng Đảng oei tơbang hơdăh ăh anih kơ 'nôh vă ƀet tôm vaccine ăn kon pơlei: Lơ̆m xơnăm âu ki noh Đảng păng teh đak tơrĕk tơgŭm vă kon pơlei gơh đei ƀet vaccine tôm bơ̆ng jĭ Covid-19. 'Meh vă lơ̆m xơnăm 'nao gô pă đei pơrang jĭ, pơngot hin dơnuh păng dôm tơdrong đei ƀôh, rim kon pơlei drơ̆ng minh hơtŏk mŭk drăm, hơtŏk tơguăt tơguăl kon pơlei Việt Nam nhen 'nhŏng oh minh hnam.

3- Jĭ mĭnh ‘nu Đảng viên sơnăm mơlôh, ‘nhŏng Đinh Văn Phới, kang ƀô̆ Dơnŏ anĭh bơ̆ jang vei lăng kon kông apŭng Đak Pơ, dêh char Gia Lai tôch chơt hơ iă ‘nă hal păng hưch hanh đei mơ̆t jang lơ̆m khŭl Đảng păng đŏk nơ̆r pơkăp kăl kơrŭn đĭ jơhngơ̆m vang iung jang lơ hlŏh dơ̆ng rim tơdrong jang tơgŭm ăn tơpôl, năm iung jang trŭh tơ̆ tơring atăih yăih, tơnap tap. Gơnơm trong bơ̆ jang ‘lơ̆ng hơ iă đơ̆ng Đảng păng Tĕh đak, tơdrong erĭh sa kơ kon pơlei, kon pơlei rim pơlei pơla roi năr roi phĭ tơtŏ dơnŏ ‘lơ̆ng dơ̆ng kơ jăp, mŭk drăm roi atŏk tơ iung, tơgop lơ̆m tơdrong atŏk tơ iung kơ tơpôl. Đảng viên Đinh Văn Phới pơma:“Kon pơlei bơ̆n jang kiơ̆ ‘lơ̆ng trong bơ̆ jang đơ̆ng Đảng păng Tĕh đak, hơdrin jang sa vă mŭk drăm ŭnh hnam roi đei ƀô̆h. Jĭ mĭnh ‘nu đảng viên sơnăm mơlôh, khei năr au ki ĭnh jei hlôi, tŏk bŏk păng hơnơ̆ng hơdrin chă pơrô̆ pơrôp, pơtho khan ăn kon pơlei pơm kiơ̆ ‘lơ̆ng trong bơ̆ jang đơ̆ng Đảng, khôi luơ̆t kơ Tĕh đak, chă hơvơn kon pơlei pơm kiơ̆ ‘lơ̆ng trong tang găn jĭ hơbuh Covid-19 păng kobn pơlei jei vang iung jang kiơ̆ tôch kơ ‘lơ̆ng”.

4 – Ƀok Ksor Jar,  Phŏ ƀĭ thư Chi ƀô̆ pơlei Châm Prông, xăh Ia Băng, apŭng Đăk Đoa, dêh char Gia Lai  xơkơ̆t: Xơnăm 2021 âu ki, pơrang jĭ COVID-19 hlôi pơm tơplih rim tơdrong erih kon pơlei. Hăm xơnong yuk trong hơlâu đơ̆ng đe đảng viên, ƀok Ksor Jar hơnơ̆ng tơroi tơbăt ăn kon pơlei hlôh vao păng lui ngeh hăm trong pơkăp tang găn păng tơjră pơrang jĭ đơ̆ng Đảng păng teh đak bơ̆n kiơ̆ rim jăl pơkăp jang: “Xơnăm 2021 âu ki, Đảng păng Teh đak bơ̆n pơgơ̆r kơjăp lơ̆m pơkăp tơring hơmet jĭ. Truh khei 9/2021, kon pơlei đei ƀet 2 jrŭm vaccine, Đảng păng Teh đak pơkăp trong erih atŭm, tơjră xơđơ̆ng, hơbĕch, hơlen kơjăp pơrang jĭ. Tơdrong mă âu tơgŭm ăn kơ nhôn xơđơ̆ng hloh, păng gơh pơtoi jang hơtŏk mŭk drăm unh hnam. Dang ei, jing bơngai đảng viên, inh hơnơ̆ng hơvơn kon pơlei pơm kiơ̆ ƀlep pơkăp 5K păng lui ngeh kiơ̆ tơdrong pơgơ̆r đơ̆ng Đảng păng Teh đak”.

5- Lơ̆m tơdrong jang tơ iung pơjing pơlei pơla ‘nao, nơ̆r Đảng jơhngơ̆m đon kon pơlei sa roi ƀô̆h hơdăh hlŏh dơ̆ng. Kon pơlei tơring ayơ jei drơ̆ng nơ̆r plang ăn tĕh, vang iung jang pơm trong, ming man hnam trương hŏk au to kơ pơlei pơla. ‘Nŏh ư̆h khan lăp tơdrong hơdrin, kơrŭn đĭ jơhngơ̆m mă lei oei tơƀô̆h hơdăh jơhngơ̆m đon lui kơ jăp hăm Đảng, kơdră chĕp pơgơ̆r tơring. Ƀok Điểu Khuyên – Thôn trơng ƀon Bu Bir, tơring Quảng Tín, apŭng Dak Rlâp, dêh char Dak Nông tơbăt jơhngơ̆m đon chơt hơ iă găh pơlei pơla ‘nao: “Đơ̆ng mă đei trong nơnăm, kon pơlei tôch bơnê kơ Đảng, kơdră chĕp pơgơ̆r tơring hlôi tơ iung pơjing trong ‘lơ̆ng ăn kon pơlei chă yak hiôk hian. Đơ̆ng au tơdrong chă yơ yak, chơ bơ̆n phŏng, ƀa hơƀo jang sa kơ kon pơlei đơ̆ng mir vĭh tơ̆ hnam jĭ tôch kơ hiôk. ‘Nŏh gơnơm đơ̆ng đei Tơdrong jang 135 pơm 400 met trong păng kon pơlei vang chă tơra pơm pơkeh hloi đĭ đăng trong lơ̆m pơlei vă jê̆ 1km; đei 20 ŭnh hnam vang iung jang hơdoi hăm tĕh đak. Trong au jei đei tơdrong vang tơgop đơ̆ng rim ŭnh hnam plang ăn tĕh, kŏh rô̆ ‘long găr sơlơ̆k, dơnơm chehphe vă pơm trong ‘nao chă yak hiôk hian hlŏh, kon pơlei jei băt đei trong ‘nŏh mă kĕ atŏk tơ iung mŭk drăm”.

Lui ngeh hăm tơdrong pơgơ̆r đơ̆ng Đảng, tơdrong erih tơplih tơ̆ Tây Nguyên adoi hơtŏk, kơlih đon pơkăp, hơpơi hơtŏk tơ iung đơ̆ng rim kon pơlei, rim đảng viên:

6 –Tơ̆ Kon Tum, dôm xơnăm kơ âu đei lơ bơngai kon kông pơm pơdrŏng đơ̆ng pơtăm hơdrĕch 'long pơm pơgang kăp gĭt. A Chung tơ̆ pơlei Đăk Dơn, xăh Măng Ri, apŭng Tu Mơ Rông, dêh char Kon Tum  jing minh tơdrong bơ̆ng pang. Hăm pơhlom 5.000 tơm sâm Ngọc Linh, kơjă tĕch đơ̆ng 120 truh 260 trĭu hlj minh kĭ hơdrih hăm hla nhen dang ei, ƀok A Chung hlôi jing bơngai pơdrŏng gơnơm đơ̆ng tơm sâm Ngọc Linh. Ƀok ăn tơbăt ưh adrô̆ unh hnam ƀok đei tơmam răk 'măn, mă hloh 100 unh hnam kon pơlei tơ̆ Đăk Dơn adoi đei tơdrong erih brăm ƀiơ̆. Erih tơ̆ tơring kăng kư̆ kăch mạng, đei tơdrong erih jơnap, lơ̆m tơdrong hơ iă kơ xơnăm 'nao A Chung tơroi, Đảng hlôi hơ 'nhăk ăn kon pơlei lơ pơyan Puih mak phĭ tơtŏ:  “Gơnơm Đảng, Teh đak tơrĕk tơgŭm ăn kon pơlei noh tôm kon pơlei tơ̆ âu đei pơtăm tơm Sâm Ngọc Linh vă hơtŏk mŭk drăm. Đảng, Teh đak oei tơrĕkt ơgŭm kon pơlei găh unh hơyuht ơ̆k ang hơdăh, trong nơnăm hiôk hian, lơ unh hnam hlôi adrin yak tŏk pơm pơdrŏng, lơ bơngai đei điê̆n thoăi cảm ư̆ng, hnam đei mạng wifi, tivi thŏng minh vă mơ̆ng lăng kơtơ̆ng ang lơ̆m teh đak păng đơ̆ng teh đak đe. Kon pơlei Đăk Dơn chơt hơ iă lui ngeh lơ̆m tơdrong pơgơ̆r đơ̆ng Đảng. Xơnăm ‘nao, jơnŭm pơgơ̆r tơring tơrĕk tơgŭm dôm unh hnam tơnap tap tơ̆ xăh Măng Ri âu”.

7- Đảng viên Lơ Mu Ha Dzô, oei tơ̆ thôn 6, tơring Dạ Sar, apŭng Lạc Dương, dêh char Lâm Đồng sơkơ̆t hơdăh, gơnơm tơdrong lăng ba kơ jăp đơ̆ng Đảng, kơdră chĕp pơgơ̆r tơring, kơna kĕ tang găn ƀiơ̆ jĭ hơbŭh Covid-19, tĕh đak tơplĭh oei sa ‘lơ̆ng sơđơ̆ng hle, pơjing đei jơhngơ̆m đon lui kơ jăp lơ̆m kon pơlei:“Đảng păng Tĕh đak lăng ba kon pơlei tôch kơ lơ, tơmơ̆t jên jang tôm tơdrong kơna tơdrong erĭh sa kơ kon pơlei roi năr roi sơđơ̆ng hlŏh kơ sơ̆. Mư̆h jĭ hơbŭh Covid-19 pơrăm, rim kơdră chĕp pơgơ̆r tơring hlôi tơtom pơrô̆ pơrôp, chă pơtho khan ăn kon pơlei băt kơchăng, vang iung jang tang găn jĭ hơbŭh Covid-19 păng hơnhăk đei jơnei hơ iă. Hrei au pơlei bơ̆n oei vei kơ jăp tơdrong sơđơ̆ng ‘lơ̆ng, tơdrong erĭh sa kơ kon pơlei đei sơđơ̆ng dơ̆ng kơ jăp păng atŏk tơ iung kơ yuơ chehphe măt ƀiơ̆. Sơnăm ‘nao jei đei lơ tơdrong chơt hơ iă ‘nă hal, hơnŭk hơnoa”.

8 – Găn ga dôm tơdrong tơnap tap kơ xơnăm 2021 kơyuơ pơrang jĭ covid 19 pơm đei, ‘nhŏng Myet- oei tơ̆ pơlei Tiêng, xăh Tân Sơn, plei tơm Pleiku, dêh char Gia Lai kơchăng yak ăh jăl ‘nao jang hadoi xơđơ̆ng, hơbĕch vă tang găn păng tơjră răh pơrang jĭ păng hơtŏk răh mŭk drăm. ‘Nhŏng Myet xơkơ̆t, lơ̆m xơnăm ‘nao 2022, ‘nhŏng păng kon pơlei gô pơm kiơ̆ pơkăp đơ̆ng anih jang y tê̆, vă vei xơđơ̆ng jơhngơ̆m jăn păng hơtŏk mŭk drăm unh hnam:  “Nhôn hơnơ̆ng ‘meh vă unh hnam hơtŏk hloh vă hơ ‘nhăk tơdrong chơt hơ iă lơ̆m tơdrong erih. Xơnăm 2021 pơrang jĭ covid-19 hơbuh hli hlôi pơm ăn pơlei pơla hiơ̆r kơ đon, ƀơm lơ tơnap tap. ‘Meh vă đơ̆ng dang ei khĕ ning mônh kơnh bơ̆n tơplih lơ hloh. Bơ̆n athei adrin pơm jang. Atŭm băl pơm kiơ̆ ƀlep tơdrong pơgơ̆r đơ̆ng kơdră kơpal, vă atŭm erih tơnăp hloh. Thơ thâu ăn xơnăm ‘nao kon pơlei jang xa đei jơnei, hơtŏk mŭk drăm, băt vei vêr dơh po, vă xơnăm ‘nao âu pơrang jĭ hloh hlăng, pơlei pơla chôt vih hăm tơdrong erih xơđơ̆ng nhen adrol ki”

Tĕh đak Việt Nam kơ yuơ Đảng chĕp pơgơ̆r, hlôi iŏk đei Kĕch mang Khei Tơhngam jơnei, pơjing đei tĕh đak Việt Nam Dân chủ cộng hòa, tĕh đak rơngei keh kong păng iŏk đei lơ tơdrong jơnei lơ̆m bơ̆ jang tơplĭh ‘nao. Hăm tơdrong iŏk đei jơnei tĭh tên ‘nŏh Đảng bơ̆n jing pơyan puih mak kơ Tĕh đak, kơ kon bơngai Việt Nam. Mĭnh pơyan puih mak trŭh! Rim răih bơngai Việt Nam lơ̆m tĕh đak ƀlŏk hơdơ̆r dơ̆ng găh 92 sơnăm năr pơjing Đảng Cộng sản Việt Nam păng Ƀok Hô ‘mêm kơ eng kơ bơ̆n, rim kang ƀô̆, đảng viên, rim răih kon pơlei jơhngơ̆m đon lui kiơ̆ kơ jăp yak trŭh sơnăm 2022 hăm lơ tơdrong hơpơi ‘mĕh vă.

Lan – Zưt chih păng pơre nơ̆r