Trung tá Vương Văn Khoa, Kơdră chĕp pơgơ̆r Kŏng ang tơring Đắk Som, apŭng Đăk Glong, tơbăt, kon jên đơ̆ng tơpôl, tơring pơlăp đei 11 camera vei lăng sơđơ̆ng lơ̆m hơnih kơdrơ̆m, jăl trong tơm, dơnŏk duk chơ tơmang pơ hiơ̆ Tà Đùng. Kmăi kmŏk camera đei pơtrŭh hloi hăm kmăi kơ kŏng ang tơring, Dơnŏ anih vei lăng kon pơlei tơring, kŏng ang viên păng thôn trơng vă chă lăng hơlen dôm tơdrong sơđơ̆ng dơ̆nbg kơ jăp.

Camera sơđơ̆ng dơng kơjăp hlôi tơgop git kăl lơ̆m tang găn hơlau, tơjră phă pơrăm khŭl yoch, vei lăng sơđơ̆ng lơ̆m tơring. Păng tơdrong kơpi iŏk um rup lơ̆m camera, khŭl kŏng ang tơring hlôi tơchă ƀô̆h ƀok kră 73 sơnăm oei tơ̆ tơring Quảng Khê đon ư̆h hơbăng vơ̆l trong ba brŏk vih tơ̆ hnam sơđơ̆ng. Đơ̆ng tơdrong iŏk đei jơnei au, kŏng ang tơring Đắk Som tŏk bŏk hơnơ̆ng lang să chă pơlăp camera vei lăng sơđơ̆ng trŭh rim pơlei pơla koeng ƀôt.“Đơ̆ng mă kŏng ang tơlĕch jang pơlăp camera ‘nŏh dôm tơdrong đei ƀô̆h lơ̆m tơring hlôi ƀô̆h hơdăh. Jei kiơ̆ rim camera au kơna nhôn mă tơchă ƀô̆h ƀok vơl kơ trong đơ̆ng Quảng Khê mơ̆t tơ̆ au”.

Jei nhen tơring Đắk Som, trŭh dang ei tơring Quảng Khê, apŭng Đăk Glong, hlôi pơlăp đei 19 tŏ amera avei lăng sơđơ̆ng tơ̆ rim jăl trong tơm, koang ƀôt kon pơlei oei. Thiếu tá Phạm Ngũ Lạng, Kơdră chĕp pơgơ̆r Kŏng ang tơring Quảng Khê, tơbăt, tơring tŏk bok hơnơ̆ng chă hơvơn kon jên au to vă pơlăp dơ̆ng 13 tŏ camera, trŏ ƀlep ăn tơdrong ‘mĕh vă vei lăng lơ̆m tơring kơdrơ̆m kơ apŭng:“ Khei 10/2022 nhôn tơlĕch jang tơpôl kon pơlei vang iung jang pơlăp rim camera vei lăng sơđơ̆ng, đơ̆ng nŏh trŭh dang ei lơ̆m tơring pă đei đe chă pơm tơdrong au to bơih, rim tơdrong pơm glăi nhen pơm ư̆h sơđơ̆ng tơring, dăh mă đe hơdrŭh tơdăm chă ngôi prăt măng tơ̆ rim hơnih hlôi pă gan đei. Păng mă kăl ‘noh tơdrong đe mon hŏk tro hao gre ư̆h kơyơ̆l môk kŭp, ghao gre rĕnh, toĕnh ga ... pă pă đei nhen sơ̆ bơih”.

Kmăi kmŏk Camera vei lăng sơđơ̆ng hlôi tơgŭm ăn khŭl bơ̆ jang kĕ vei lăng sơđơ̆ng, adoi tơgop lơ̆m pơm ăn tơdrong joăt, pơm kiơ̆ kơ jăp đơ̆ng kon pơlei apŭng Đăk Glong lơ̆m pơm kiơ̆ kơ jăp rim tơdrong tơchơ̆t kơ khôi luơ̆t, mă kăl mư̆h hao gre tơ̆ trong. Tơdrong jơnei ƀôh hơdăh hlŏh ‘nŏh pơm sơđơ̆ng dơ̆ng kơ jăp tơring vă kon pơlei sơđơ̆ng jơhngơ̆m jang sa. Ƀok Trần Đình Hưng, oei tơ̆ thôn 1, tơring Đắk Som, apŭng Đắk Glong, chơt hơ iă pơma:“Tơ̆ au tôch sơđơ̆ng, sơ̆ ngăl đei đe tơtông kŏ. Mă lei đơ̆ng mă đei camera au ‘noh hlôi dă ƀiơ̆ bơih”.

Kiơ̆ đơ̆ng Kŏng ang apŭng Đắk Glong, truh dang ei trong jang Camera vei lăng sơđơ̆ng hlôi đei tơlĕch pơlăp tơ̆ 7 tơring lơ̆m apŭng, hăm hlŏh 100 hơnĭh. Thượng tá Nguyễn Xuân Hùng, Kơdră chĕp pơgơ̆r Kŏng ang Đắk Glong, tơbăt, hăm dôm tơdrong iŏk đei jơnei hơ iă au, kŏng ang apŭng tŏk bŏk chă hơvơn rim tơpôl kon pơlei vang iung jang vă hơnơ̆ng pơlăp dơ̆ng camera.“Nhôn ƀô̆h iŏk đei jơnei hơ iă lơ̆m bơ̆ jang iung tơ jră phă pơrăm khŭl yoch adoi nhen rim trong jang kon pơlei vang vei lăng tĕh đak. Mă đơ̆ng mĭnh apŭng dơnŭh mă lei hăm kơrŭn đĭ jơhngơm iung jang Kŏng ang apŭng pơrô̆ athei kŏng ang rim tơring iung jang hơdoi hăm kơdră tơring jang kiơ̆ trong bơ̆ jang tơpôl vang jang pơlăp camera vei lăng sơđơ̆ng lơ̆m apŭng:.

Tơ̆ tơring atăih yăih Dăk Glong, groi tĕh să, kon pơlei kơ toei, trong jang camera vei lăng sơđơ̆ng đei lăng jing “đon măt” kơ khul kŏng ang, hlôi păng iung jang jơnei lơ̆m bơ̆ jang tang găn hơlau, iung tơ jră phă pơrăm rim khŭl pơm yoch, vei lăng sơđơ̆ng dơ̆ng kơ jăp ... Trong jang au jei pơjing đei jơhngơ̆m pran kơ pơđĭ kon pơlei lơ̆m tơdrong jang pơđĭ kon pơlei vang vei lăng sơđơ̆ng Tĕh đak.