VOV4.Bahnar - Hơnĭh bơ̆ jang ăn Dơnŏ anĭh chĕp pơgơ̆r tang găn tŏ ‘mi kial păng tơchă dŏng tơgŭm ‘nao chĭh pơtrŭh hla bơar ăn Dơnŏ anĭh chĕp pơgơ̆r tang găn tŏ ‘mi kial păng tơchă dŏng rim dêh char, pơlei tơm đơ̆ng Thừa Thiên Huế trŭh Khánh Hòa păng Tây Nguyên găh iung jang tang găn  hăm ‘mi tĭh, kial hơbŭt phut huơ̆r, grơ̆m grăih, đak lŏk jrŏh, đak lip, tĕh hơlĭh. Nơ̆r chĭh tơbăt lơ̆m hla bơar athei rim dêh char, pơlei tơm kơpal akŏm hơmet pơ ‘lơ̆ng ‘mi kial pơrăm tơ̆ tơring Tŏk bŏk kiơ̆ nơ̆r pơrô̆ jang đơ̆ng Thủ tướng tĕh đak lơ̆m Tơdrong tơchơ̆t kơsô̆ 298. Hơnơ̆ng pơgơ̆r lăng hơlen kơ jăp vă pơm dă ƀiơ̆ hiong răm, lơ̆m au akŏm iung jang. Ăn khŭl jang năm dăr lăng, lăng hơlen rim pơlei pơla oei tơ jê̆ thoong đak kroong, hơbong thoong đak đei hơmơt đei đak lip, đak lŏk jrŏh, tĕh tơdrŭt hơlĭh vă iung jang yông năm oei tơ̆ hơnĭh sơđơ̆ng tơdăh đei tơdrong. Dăr lăng, iung jang pơchŏh đak vă vei lăng chŏh jang sa.

Tơblơ̆ nơ̆r: Amazưt