VOV4.Bahnar - Kơ sơ̆ 22/4, Phó Thủ tướng Vũ Đức Đam pơ gơ̆r hop akŏm găh tơ drong hơ met ăn tơ drong pơ gơ̆r thi đă ƀŏng lŏng, tơ plŏng kơ dâu Đông Nam Á ‘măng mă 31 (SEA Games 31). Kiơ̆ anih pơ gơ̆r, truh dang ei, dôm tơ drong hơ met ăn tơ drong thi pơ long hlôi jang đang bơih, kơ chăng pơ gơ̆r ‘lơ̆ng ăn tơ drong tơ plŏng kơ dâu tih hlŏh tơ̆ tơ ring.

 Anih pơ gơ̆r SEA Games 31 kĭ pơ kăp păng pơ tho tơ lĕch lơ trong jang vă vei lăng ‘lơ̆ng tơ drong sơ đơ̆ng; jang pơ gang păng hơ len năng doping; tang găn jĭ COVID-19; pơ vih pơ văn ăn tơ pôl; trong yak; pơ tho bơ ngai jang tơ gŭm; hơ met ăn lêh pơih blŭng păng lêh pơ tôch…

Phó Thủ tướng Vũ Đức Đam pơ tho athei hơ met pơ ‘lơ̆ng dôm tơ drong mơ mat tat oei tơ hlăk tăk vă hơ met ‘lơ̆ng ăn SEA Games 31. Mă hơ dăh ‘nŏh jĭ tơ drong hơ met ăn lêh pơih blŭng, lêh pơ tôch; pơ gơ̆r ăn gre kơ dâu vih vât pơ vih ăn dôm khul tơ plŏng kơ dâu.  

Phó Thủ tướng athei dôm anih tơm, anih jang kơ pal, tơ ring hơ nơ̆ng jang hơ doi mă kơ jăp, đei yoa vă sek tơ lang hloi dôm tơ drong mơ mat tat kiơ̆ hơ năp jang đei pơ jao, mă loi jĭ tơ drong pơm hla ar, jăh jang kĕh rim tơ drong, pơ gơ̆r mă ‘lơ̆ng ăn SEA Games 31. 

Dơ̆ng: Tơ blơ̆