‘Mi tih đak lơ̆p phă hư tơ̆ 5 jăl trong gre teh đak, trong krang Prenn, 3 jăl trong dêh char păng lơ trong tơ̆ tơring lơ̆m dêh char Lâm Đồng, hăm jên hơmet ming jô̆ pơhlom truh 361 ti. Tơ̆ trong krang Mimosa, Anih vei lăng tơdrong jang 85 oei pơih trong pơgia, tơchĕng adrol gô jang đang lơ̆m ‘năr 29/11/2025; trong jang man gơng kơpal kông xă 9m hlôi đei kĭ ăn păng vă tơlĕch jang đơ̆ng ‘năr 10/12, tơchĕng adrol vă man đơ̆ng 3 truh 4 khei.

Tơ̆ trong krang D’ran, anih teh hơlih oei đei chưk hơmet vă pơih trong ăn gre kơdâu, adrin jang đang adrol kơ ‘năr 10/12 truh; krang Gia Bắc hlôi hơmet đang bơih. Tơ̆ hop akŏm, ƀok Nguyễn Hồng Hải, Phŏ Kơdră Anih vei lăng kon pơlei dêh char Lâm Đồng đei nơ̆r hil hăm tơdrong vei lăng dôm jăl trong tơm gĭt kăl khei ‘năr  âu ki, mă loi ‘nŏh trong krang Prenn – ‘măng mât lĕch tơm kơ Đà Lạt. Ƀok athei Anih vei lăng ming man păng Anih vei lăng trong gre dêh char iŏk vei lăng, hơmet ming mă ‘lơ̆ng adrol kơ Têt âm lĭch, pơm ‘lơ̆ng ăn gre kơdâu vih vât ƀât hơtuch sơnăm.