Hop akŏm ‘noh jĭ 1 trong jang pơma dơnuh hơnơ̆ng păng kơjăp đơ̆ng Khŭl kơdră teh đak Việt Nam hăm tơpôl anih mơdro sa vă hơmet ‘lơ̆ng dôm tơdrong tĕch mơdro kăl hloh vă pơtrŭt hơtŏk tơiung đơ̆ng grŭp mơdro sa kơdih, pơm hiôk ‘lơ̆ng anih tơmơ̆t jên jang, tơgop lơ̆m tơdrong mŭk drăm tŏk kơjăp kơ Việt Nam. Tơ̆ hop akŏm, dôm anih mơdro sa hôn bơnê dôm tơdrong tơplih găh trĕng lăng hơtŏk tơiung đơ̆ng Việt Nam păng akhan, tơdrong tơlĕch ăn dôm tơdrong tơchơ̆t nhen: Tơchơ̆t 57 găh pơtrŭt khoa hŏk, kơmăy kơmŏk păng tơplih ‘nao pơcheh hơgei; Tơchơ̆t 59 găh kơchăng mơ̆t jang hơdai lơ̆m apŭng plĕnh teh; Tơchơ̆t 68 găh hơtŏk tơiung mŭk drăm kơdih; păng Tơchơ̆t 66 găh hơmet ming tơdrong jang pơjing păng pơm kiơ̆ khôi luơ̆t...

Dôm nơ̆r tơgop apĭnh Khŭl kơdră teh đak tơlĕch ăn pơtho păng trong jang rơđăh vă pơm tơ jê̆ tơdrong hơtăih đơ̆ng trung ương păng tơring, vei sơđơ̆ng tơdrong nơ̆r nơ̆r lơ̆m vei lăng lơ̆m teh đak. Pơma tơ̆ Hop akŏm, Thủ tướng Phạm Minh Chính roi tơbăt tơdrong mŭk drăm, tơpôl kơ Việt Nam păng pơma hơdăh: Việt Nam băt hơdăh tơdrong hơgăt jang tŏk 8% lơ̆m sơnăm 2025 păng 2 kơsô̆ lơ̆m dôm jăl jang pơtăl dơ̆ng, lơ̆m noh pơtrŭt pran hơtŏk tơiung mŭk drăm rơgoh, mŭk drăm kơsô̆ ‘noh athei jang mă đei, lăp hăm trong jang hơtŏk tơiung. Khŭl kơdră teh đak gô akŏm athei rim anih tơm, anih jang, tơring tơtĕnh bơ̆jang, hơdrin hơmet pơ ‘lơ̆ng rim tơdrong pơmat tat, pôm nơ̆r ƀơ̆r đon, kơchăng pơm lăp, hơbĕch hơbal, khoa hŏk, đei yua, hơdrin tơplih ‘nao, pơcheh hơgei. Thủ tướng lui ngeh tơpôl mơdro sa FDI gô hơnơ̆ng vang yak hơdai hăm Việt Nam, vang hơdai băl pơjing 1 teh đak mŭk drăm rơgoh, pơjei băl păng kơjăp, yua kơ tơdrong hơnŭk hơnoa atŭm kơ pơ đĭ lơ̆m tơring păng apŭng plĕnh teh.