VOV4.Bahnar - Trong jang tơ gŭm, jên khei ưh kơ măh hơ met ăn tơ drong arih sa, kơ hret tơ drong jang lơ pơm ăn dôm kang ƀô̆ vei bri pơ dơh kơ jang, lơ tơ drong jang ŭnh điên kial tơ̆ Gia Lai hlôi jang đang mă lei tam mă drơ̆ng ăn bơ̆ jang mơ dro sa... ‘noh jĭ dôm tơ drong tơ tŏ đei lơ lap bơ ngai tăh hla, bơ ngai jang lơ̆m Jơ nŭm pơ gơ̆r kon pơ lei dêh char Gia Lai bơ ngơ̆t truh, tơ lĕch pơ ma dơ nuh tơ̆ ‘măng hop akŏm Jơ nŭm pơ gơ̆r kon pơ lei dêh char Gia Lai jăl 12 ‘năr (8/7). Tơ̆ jơ apĭnh jet bơ ngai jang lơ̆m Jơ nŭm pơ gơ̆r kon pơ lei dêh char Gia Lai, lơ tơ drong đei bơ ngai tăh hla păng tơ pôl bơ ngơ̆t truh hlôi đei tơ roi tơ̆ ‘măng hop akŏm.

Lơ̆m noh ƀôh hơ dăh ‘noh tơ drong jang vei lăng bri oei đei lơ mơ mat tat, brăh brư jên đơ̆ng tơ drong jang ŭnh điên kial tam mă đei chô̆ tơ goăt, tơ drong chĕng tĕch teh choh jang sa đei ƀôh mơ mat tat. Tơl nơ̆r găh dôm tơ drong mơ mat tat lơ̆m tơ drong jang vei lăng bri, ƀok Lưu Trung Nghĩa, Kơ dră Anih vei lăng choh jang sa păng hơ tŏk tơ iung tơ ring tơ rang, Bơ ngai tang măt Jơ nŭm pơ gơ̆r kon pơ lei dêh char Gia Lai tơ roi: Khei ‘năr âu ki, khŭl joăt jang vei lăng bri lơ̆m dêh char Gia Lai hơ nơ̆ng apĭnh pơ dơh kơ jang pơm ăn bơ ngai jang lơ̆m tơ drong jang ‘nâu ưh kơ măh. Tơ drong tơm pơm ăn ‘noh yua đơ̆ng iŏk yua tŏ sĕt, dôm trong jang tơ gŭm ưh tam mă tơ găl hăm jơ hngơ̆m jang, mă loi ‘noh jĭ tơ drong jang trăp trĭn.

Thuem: Tơ blơ̆