VOV4.Bahnar - Pơ gê ‘năr 7/03, tơ̆ pơ lei tơm Đà Nẵng, pơ gơ̆r Hop akŏm pơ tôch tơ drong jang Jơ nŭm pơ gơ̆r kon pơ lei dôm dêh char, pơ lei tơm tơ ring tŏk bŏk, Tây Nguyên sơ năm 2021 păng tơ lĕch jang tơ drong jang sơ năm 2022. Sơ năm 2021, rim tơ ring hlôi hơ drin yak hloh mơ mat tat, pơ gơ̆r jơ nei tơ drong jang pôk rơ̆ih bơ ngai tang măt Kuôk hô̆i jăl 15 păng bơ ngai tang măt Jơ nŭm pơ gơ̆r kon pơ lei rim tơ ring jăl jang 2021-2026. Phŏ Kơ dră Kuôk hô̆i Trần Thanh Mẫn akhan, Jơ nŭm pơ gơ̆r kon pơ lei dôm dêh char, pơ lei tơm hlôi jang kiơ̆ ‘lơ̆ng tơ drong jang dăr hơ len, tơ plih ‘nao, hơ tŏk ‘lơ̆ng apĭnh jet păng tơl nơ̆r apĭnh jet, pơ gơ̆r lơ tơ drong jang dăr hơ len tơ drong jang. Mă lei, ƀok Trần Thanh Mẫn bơ ngơ̆t găh tơ drong răt tơ mam kơ teh đak, lơ tơ ring jang ‘lơ̆ng, mă lei đei tơ ring ưh kơ jang dăh mă jang ưh kơ ƀlep tơ drong hơ găt hơ nhăk truh đei glăi. Jơ nŭm pơ gơ̆r kon pơ lei jĭ anih jang dăr hơ len mă lei tam mă chă ƀôh đei dôm tơ drong glăi âu. Găh trong vă jang, hơ năp jang păng dôm trong bơ̆ jang sơ năm 2022, Phŏ Kơ dră Kuôk hô̆i Trần Thanh Mẫn athei, Jơ nŭm pơ gơ̆r kon pơ lei kon pơ lei dôm dêh char, pơ lei tơm hơ nơ̆ng dăr hơ len, pơ jing jang pơ keh păng pơ gơ̆r jang kiơ̆ tơ drong jang hơ nơ̆ng tơ plih ‘nao, hơ tŏk ‘lơ̆ng ‘măng hop akŏm, ‘lơ̆ng bơ̆ jang, tơ drong jang tơ ƀơ̆p pơ ma dơ nuh hăm bơ ngai tăh hla, bơ̆ jang dăr hơ len apĭnh jet, tơl nơ̆r apĭnh jet.

Thuem: Tơ blơ̆