VOV4.Bahnar - Pơ gê ‘năr (11/10), Jơ nŭm pơ gơ̆r kon pơ lei pơ lei tơm Hồ Chí Minh jăl X pơ gơ̆r hôp ‘măng mă 7 (‘măng hôp tơ drong jang) vă set hơ len, tơ chơ̆t 1,2 tơ drong gơh jang, đei tơ drong kăl vă jang kiơ̆ ‘lơ̆ng hơ năp jang hơ tŏk tơ iung mŭk drăm - tơ pôl sơ năm 2022 păng dôm sơ năm đơ̆ng rŏng dơ̆ng. Tơ̆ ‘măng hôp âu, Jơ nŭm pơ gơ̆r kon pơ lei pơ lei tơm Hồ Chí Minh tơ gop nơ̆r, pơ ma dơ nuh vă set hơ len pơ drơ̆ng kiơ̆ 13 hla ar chih tơ chơ̆t nhen: Trong jang tơ gŭm hơ drô̆ tơ gŭm jên nôp hŏk ăn hơ ioh mầm non, hŏk tro; hơ găt kơ sô̆ jên hŏk sơ năm 2022-2023 păng dôm sơ năm đơ̆ng rŏng dơ̆ng lơ̆m tơ ring; trong jang tơ mơ̆t jên jang, tơ chơ̆t hơ met ming trong jang tơ mơ̆t jên jang dôm tơ drong jang tơ mơ̆t jên jang teh đak; hơ met ming Trong tơ lĕch jang tơ mơ̆t jên jang teh đak păh lăp khei ‘năr jăl jang 2021-2025 păng sơ năm 2022; hơ met ming jên jang teh đak sơ năm 2022.

Ƀok Bùi Xuân Cường, Phŏ kơ dră ‘nao Anih vei lăng kon pơ lei pơ lei tơm Hồ Chí Minh

Kŭm tơ̆ ‘măng hôp tơ drong jang âu, dôm bơ ngai tang măt Jơ nŭm pơ gơ̆r kon pơ lei pơ lei tơm hlôi pôk ƀok Bùi Xuân Cường, Kơ dră anih vei lăng trong gre treng anih kơdrơ̆m pơ lei tơm Hồ Chí Minh pơm phŏ Kơ dră Anih vei lăng kon pơ lei pơ lei tơm Hồ Chí minh, jăl jang 2021 - 2026.

VOV/Thuem tơ blơ̆