Ngôi pơchơt hơdai hăm kon pơlei tơ̆ Tơring Thắng Kiên, xăh Đề Gi, Thủ tướng Phạm Minh Chính pơma hơdăh, năr Tơguăt đĭ đăng hơdrĕch hơdrung đei ƀât mă ‘mi kial kơsô̆ 13 ‘nao phă pơrăm tôch dêh. Kơplăh đei tơdrong pơmat tat ‘nŏh oei hơnơ̆ng đei anih gơnang ‘nŏh jĭ tơdrong chĕp kơl pơgơ̆r tôch trŏ, gơ̆h hơgei đơ̆ng Đảng; tơdrong vang jang đơ̆ng rim anih jang chinh trĭ, kon pơlei, tơdrong chĕp kơ̆l đơ̆ng dôm Khul kơdră tơring; jơhngâm đon băt ‘mêm băl, pôm nơ̆r ƀơ̆r đon đơ̆ng đĭ đăng hơdrĕch hơdrung.

Pôk pơ ư, tơchĕng ‘lơ̆ng dôm tơdrong jơnei mă Đảng ƀô̆, khul kơdră pơgơ̆r păng kon pơlei dêh char Gia Lai pơma atŭm, xăh Đề Gi pơma hơdrô̆ iŏk đei khei ‘năr âu ki, vang tơgop ăn tơdrong jơnei atŭm kơ teh đak, Thủ tướng oei athei khul kơdră chĕp kơl Đảng, khŭl kơdră pơgơ̆r tơring akŏm jơhngâm hơmet pơ ‘lơ̆ng hiong răm đơ̆ng ‘mi kial kơsô̆ 13: "Blŭng a athei pơm ming hnam ăn dôm unh hnam đei hnam păk, pơchăh đơ̆ng dang ei truh ‘năr 15/12 âm; pơm hơmet ming hnam hư; anih jang trong nơnăm, hnam pơgang, hnam hŏk; chô̆ hơmet unh điên, kơmăy roi tơbăt; jăh hơmet pơ ‘lơ̆ng cham char; tơiung ming dơ̆ng tơdrong jang xa, tĕch mơdro, chă tơdrong jang ăn kon pơlei. Athei khul linh, công an, druh dăm vang bơ̆ jang tơgŭm, tơgŭm ăn kon pơlei hơmet pơ ‘lơ̆ng hiong răm đơ̆ng ‘mi kial; bơ̆ jang ‘lơ̆ng kiơ̆ trong khul kơdră pơgơ̆r tơring 2 tăl; jang atŏk tơiung mŭk drăm, tơpôl, chă tơdrong jang ăn kon pơlei.

Thủ tướng oei athei dêh char Gia Lai hơmet ming dơ̆ng tơring oei xa, anih pơvih pơvăn, tĕch mơdro tơ̆ ‘ngoăih; kon pơlei athei oei xa tơ̆ lăm vă gơ̆h vei lăng sơđơ̆ng ‘lơ̆ng. Tơlĕch trong pơjing tơring oei xa ‘nao ăn kon pơlei; athei hơmet mă ‘lơ̆ng Têt ăn kon pơlei. Hơnơ̆ng năng kăl tơdrong hơtŏk đon hlôh vao, đon kơchăng ăn kon pơlei tơ̆ hơnăp rim tơdrong phă ngơ̆r, pơm che re đơ̆ng khul hơyăt. Vei kơjăp tơdrong sơđơ̆ng tehđak, vei lăng ‘lơ̆ng vă "xăh ưh đei ma túy", "xăh ưh đei tơdrong yoch", "xăh ưh đei bơngai tơnuh".  

Lơ̆m giĕng âu ki mơ̆n, Phó Thủ tướng Mai Văn Chính truh akŏm lơ̆m Năr tơguăt đĭ đăng hơdrĕch hơdrung tơ̆ tơring oei xa hơdai kơ dôm pơlei Suối Cau - Suối Sâu - Bến Khế, xăh Bắc Khánh Vĩnh, dêh char Khánh Hòa. ‘Nâu jĭ tơring groi kông đei lơ kon pơlei Raglay, kŭm hăm 9 hơdrĕch hơdrung arih xa hơdai, dar deh tơplih ‘nao um ai roi ‘lơ̆ng rŏ tơ̆ tơring groi kông. Tơring oei xa đei hlŏh 1.100 unh hnam, hlŏh 4.600 ‘nu bơngai đei Yoăn, Raglay, Rađe, Tày, Nùng, Dao, Mường, Hoa, T’Rin… Dôm sơnăm âu ki, kon pơlei tơplih ming hơdrĕch ‘long, kon yŏng vă jang xa; hăm lơ trong jang pơgar nhen pơtăm sầu riêng, krô̆i, hơdai hăm rong kon tơrong, hơnhăk ăn iŏk yoa sơđơ̆ng.  

Pơma tơ̆ năr lêh, Phó Thủ tướng Mai Văn Chính pơma hơdăh, Năr Tơguăt đĭ đăng hơdrĕch hơdrung ‘nŏh vă pôk pơ ư tơdrong mât 1 ƀơ̆r đon, tơiung jơhngâm đon adrin, khŏm jang tŏk; jĭ jơhngâm pran vă “tơplih ‘nao đon tơchĕng, tơplih ‘nao trong jang, pơ̆n tơchĕng, pơ̆n jang, pơ̆n chĭu pŭ”, pơjing jơhngâm pran vă jang tŏk ăn tơring groi kông. Xăh athei rơih trong jang ‘lơ̆ng vă chă pơma nuh, jang pơlong năng tơdrong vei sơđơ̆ng arih xa tơpôl, pơgơ̆r “Khei mơ̆ng nơ̆r kon pơlei pơma”, bơ̆ jang kiơ̆ trong tơgŭm ăn kon pơlei, pơngơ̆t truh dôm unh hnam tơnuh, vă jê̆ tơnuh.

Phó Thủ tướng Mai Văn Chính pơma hơdăh: “Athei hơtŏk đon pơnam, hơbĕch hơbal, gơ̆h hơgei đơ̆ng kon pơlei dôm hơdrĕch hơdrung, iŏk yoa tơdrong ‘lơ̆ng đơ̆ng tơdrong juăt pha ra băl, tơdrong ‘lơ̆ng đei hơdrô̆ tơ̆ tơring, tŏ ‘mi kial, tơmam bri brăh păng teh vă atŏk tơiung choh jang xa kơjăp ‘lơ̆ng, choh jang xa rơgŏh ‘lơ̆ng, hơdai hăm chă tơmang lăng tơpôl, tơmang lăng tơ̆ anih oei xa, choh jang. Năng kăl truh tơdrong vei lăng bri, vei lăng kơtu đak, vei lăng cham char bri brăh – ‘nŏh jĭ tơdrong kăl hlŏh vă gơ̆h jang tŏk đunh đai. Khul kơdră tơring, Mặt trận Tổ quốc păng dôm khul grŭp tơpôl athei kơchăng tơgŭm ăn kon pơlei găh jên jang, ki thuơ̆t, khoa hŏk kơmăy kơmŏk, jang kiơ̆ kơmăy sô̆ lơ̆m tơdrong choh jang xa, tĕch mơdro tơmam, vă “kon pơlei băt iŏk yoa kơmăy sô̆, tơring tơrang jang hăm kơmăy sô̆” jing đei tơpă tơ̆ groi teh Bắc Khánh Vĩnh”.

Ƀlep ƀât ‘măng mă âu, Phó Thủ tướng Mai Văn Chính hơpăh tơmam ăn 2 unh hnam đei grih tih, jang rơgei, pơlung kon pơlei hơnơ̆ng mât 1 ƀơ̆r đon, jang tŏk mŭk drăm, pơjing tơring oei xa rơgŏh ‘lơ̆ng, sơđơ̆ng hiôk hian păng ƀĕnh jơhngâm đon ‘mêm băl.