Năr 30/7, Anih jang Tĭnh uy Gia Lai pơgơ̆r Hop akŏm tơroi gah tơdrong đei jơnei đơ̆ng Hop akŏm 'măng 12 Ƀan châ̆p hanh Trung ương Đảng jăl 13 truh hăm khul kang ƀô̆ dơnơm lơ̆m jơ̆p dêh char. Tơ̆ hop akŏm, ƀok Hồ Quốc Dũng, Ƀĭ thư Tĭnh uy Gia Lai ăn tơbăt, đơ̆ng rŏng pơm kiơ̆ pơkăp hơmet anih jang hanh chinh păng tơplih jơnŭm pơgơ̆r 2 tăl, truh dang ei, jơnŭm pơgơ̆r tơring tơ̆ dêh char Gia Lai hlôi pơm jang sơđơ̆ng. Dêh char hlôi pơjao ăn xah 1.065 tơdrong jang. Kon pơlei kăl pơm hla bar hanh chinh noh năm truh tơ̆ xah, mă lơ pơm kiơ̆ trong jang mạng, 'noh ƀônh hiôk păng ưh đei huach lơ jơ nhen hơdrol ki.

Khei năr truh, dêh char gô pơtoi klah asong jơnŭm pơgơ̆r kơtang hloh ăn kơ xah. Mă lei, dang ei duh oei minh ƀar tơdrong tam mă 'lơ̆ng kăl tenh kuăng chă hơmet, mă kăl noh gah tơdrong hŏk, tơdrong hơbĕch lơ̆m pơm jang ăn đe kang ƀô̆ xah. Dang ei, khul kang ƀô̆ xah tơ̆ Gia Lai mă tơm noh đei 3 khul: Kang ƀô̆ đơ̆ng dêh char pơtruh jang; kang ƀô̆ đơ̆ng apŭng pơtruh păng kang ƀô̆ tơ̆ tơring. Minh ƀar kang ƀô̆ tam mă kloh klĕch gah tơdrong jang. Dêh char tŏk bŏk pơih lăm pơhrăm tơgŭm ăn kang ƀô̆ xah tenh kuăng pơtrŏ hăm tơdrong jang 'nao.