Anih jang MTTQ Việt Nam pơlei tơm HCM ăn tơbăt, tơdrong jang hơvơn păng pơtruh tơmam tơgŭm ăn kon pơlei dôm dêh char tơring Tŏk bŏk ƀơm 'mi kial đak hơbông pơrăm hlôi đei jơnei tih tên. Jơnŭm jang hơvơn Tơgŭm dŏng pơlei tơm hlôi sơng đei hloh 32.400 tơdrong tơgŭm hăm kơsô̆ pơhlom 245 tih hlj.

Atŭm hăm noh pơhlom 30.000 kơdŭng pơgang ăn unh hnam, 70 tơ̆n phe păng jê̆ 1.400 tơ̆n tơmam drăm kăl đei kơjă hloh 140 tih hlj. Pơlei tơm HCM adoi hơvơn gre ou to, bơngai jang vă tơgŭm ăn Khánh Hòa hơmet 'mi kial đak hơbông pơrăm, lơ̆m noh đei tơdrong pơjao 50 tih hlj tơgŭm tenh kuăng, tơgŭm hơmet 23 hnam trưng hŏk ƀơm răm păng pơtruh 650 bơngai năm jang pơ-'nguaih cham char tơ̆ dôm anih răm kơtang hloh.

Năr 24/11, Hơnih tơm chĕp pơgơ̆r Tơring 4 Ƀô̆ đô̆i vei lăng đak dơsĭ hơnơ̆ng ăn vă jê̆ 1.000 ‘nu kang ƀô̆, ƀô̆ đô̆i atŭm hăm lơ gre duk, tơmam drăm truh tơ̆ tơring răm kơtang đơ̆ng ‘mi kial đak lip pơrăm tơ̆ Khánh Hòa păng Đắk Lắk. Khul Ƀô̆ đô̆i vei lăng đak dơsĭ klăh asong lơ khul iung jang chă hyum rơgoh rơ̆m rĕk, hơmet pơ ‘lơ̆ng kơ mơjĭt kilômet trong nơnăm; tơgŭm djru pơm rơgoh, kôch hơmet dơ̆k vĭ tơ̆ 12 hnam trương hŏk, 3 hơnih bơ̆ jang vei lăng kon pơlei, 1 hnam pơgang tơring păng vă jê̆ 100 pơbŭng hnam kon pơlei găh rim tơring Đông Hòa, Tuy Hòa, Bình Kiến, Bắc Nha Trang păng tơring Diên Điền. Atŭm hăm ‘noh, rim hơnih lơ̆m tơring hlôi chơ ba ăn kon pơlei vă jê̆ 100 khô̆i đak sŏ nhă rơgoh, 5.000 kơthŭng mỳ tôm păng lơ tơmam drăm yoa kăl nhen phe, đak toh rơmo, hơbĕn ao, khăn. Hơnih tơm chĕp pơgơ̆r Tơring 4 tơbăt tơbăt, găh tơdrong vă jang hơmet ming oei tôch kơ lơ păng khul Ƀô̆ đô̆i đak dơsĭ gô hơnơ̆ng tơgŭm djru rim tơring lơ̆m dôm năr truh ou kơnh.

Tơ̆ dêh char Lâm Đồng, 'mi tih lơ̆m dôm năr ou ki pơm teh tơhlŭn, hơlih hli hlơt, pơm tơhlăk tơhlĭn gah trong nơnăm. Anih tơm Ming man jang atŭm hăm dêh char hơvơn khul jang, gre ou to vă kôch hơmet teh tơmo hơlih, hơmet ming taluy, chor thong pơchoh đak păng hơlen tơnăp gah tŏ 'mi kial vă vei sơđơ̆ng tơdrong hơrih ăn kon pơlei. Thứ trưởng Anih tơm Ming man Lê Anh Tuấn ăn tơbăt, anih jang tŏk bŏk hăt hot hơmet ming vă dah hrôih ăn gre kơdou chơ tơmam drăm păng sơđơ̆ng tơdrong pơm jang. Tơ̆ Jăl trong 20 trong hơ̆ng Mimosa, lơ khul jang tơchơ̆t lơ̆m 10 năr gô pơ-'nguaih ăn gre kơdou păng keh đang hơmet ming lơ̆m 1 khei. Lâm Đồng adoi pơgơ̆r hăm rim tơring kơchăng gah trong tơjră, chih akŏm tơring răm hli hlơt vă yông 'nhăk kon pơlei oei tơ̆ nai mưh đei tơdrong kăl.