VOV4.Bahnar -  Hăm đon pơ hnŏng ưh đei lê̆ 1 ‘nu kon pơ lei yơ ưh đei têt, rim khul kơ dră tơ ring, khul grŭp tơ pôl tơ̆ dêh char Kon Tum đơ̆ng adrol kơ têt dang 1 khei hlôi pơ gơ̆r dăr hơ len, chih măt dôm unh hnam đei tơ drong arih xa mơ mat tat kăl đei tơ gŭm vă sơng xa Têt. Têt Nguyên đán Nhâm Dần sơ năm ‘nâu, mă đơ̆ng jĭ COVID-19 tơ̆ dêh char Kon Tum oei đei tôch krê ră, mă lei hăm jơ hngâm đon jang tơ năp, jang kiơ̆ tơ drong ‘nao đei, 10 apŭng, pơ lei tơm kơ dêh char oei pơ gơ̆r năr pơm têt păng pơ gơ̆r lơ tơ drong ngôi pơ chơt tôch hơ iă vă sơng sơ năm ‘nao. Pơ ma găh tơ drong hơ met têt đơ̆ng khul kơ dră tơ ring ăn kon pơ lei, ƀok A Síp, Phŏ Kơ dră chĕp kơ̆l Jơ nŭm pơ gơ̆r kon pơ lei xăh Đăk Ruồng, apŭng Kon Brăih, ăn tơ băt:

“ Hơ drol kơ têt, Khul kơ dră chĕp kơ̆l Jơ nŭm pơ gơ̆r kon pơ lei, Dơ nŏ anih vei lăng kon pơ lei xăh, dôm anih jang, khul tơ pôl chă dăr hơ len rim hnam ưh kơ măh sŏng xa, mơ mat tat vă tơ roi ăn anih jang Đảng, Jơ nŭm pơ gơ̆r kŭm nhen Mặt trận Tổ quốc Việt Nam xăh vă đei trong tơ gŭm phe ƀa tơ tom, tôm măh ăn dôm unh hnam tơ nuh, mơ mat tat, vă rim bơ ngai lơ̆m xăh Đăk Ruồng bu bu kŭm chơt hơ iă sơng Têt Nhâm Dần sơ năm 2022. Hrei ‘nâu, kon pơ lei tơ̆ xăh Đăk Ruồng lơ unh hnam hơ met tôm tơ mam yoa, rim hnam pơ gơ̆r xa têt gơ̆h ‘mơ ‘met păng chơt hơ iă ngăl, khul kơ dră chĕp kơ̆l xăh ưh đei lê̆ unh hnam yơ pơ ngot lơ̆m dôm năr Têt”.

Xăh Đắk N'Drung, apŭng Đắk Song, dêh char Dak Nông đei 4 pơ lei kon kông ( vă đĭ đăng ‘noh bơ ngai M’Nông ngăl) tă kơ đei pơm ‘nhŏng hăm rim anih jang đơ̆ng dêh char truh apŭng. Lơ̆m sơ năm âu ki, ƀơ̆t jĭ hơ buh Covid-19, rim anih jang pơm ‘nhŏng oh adoi jur năm ngôi apĭnh jet gia, asong tơ mam, pơ lung kon pơ lei yak hloh mơ mat tat. Lơ̆m noh, Anih jang sek tơ lang kon pơ lei dêh char Dak Nông hlôi pơ gơ̆r asong 100 tơ pu tơ mam ( đei akŏp kơ jă hloh 30 triệu hlak jên) ăn kon pơ lei tơ̆ plei Bu Boong. Ƀok Điểu Minh – Kơ dră Anih jang Mặt trận tổ quốc xăh Dak N’drung, apŭng Đắk Song tơ băt, ƀlep ƀơ̆t Têt nguyên đán Nhâm Dần, rim anih jang pơm ‘nhŏng oh hơ nơ̆ng năm ngôi apĭnh jet gia kon pơ lei:

             “Têt vih, xăh Dak N’drung ‘noh chơt hloh ‘noh jĭ đei anih pơm ‘nhŏng oh đơ̆ng dêh char, apŭng năm ngôi. Mĭnh anih jang jur truh tơ̆ pơ lei, tơ gop jên răt nhŭng asong ăn kon pơ lei. Mă 2 dơ̆ng, rim anih jang pơm ‘nhŏng oh năm ngôi tơ̆ rim kră pơ lei, bơ ngai pơ gơ̆r pơ lei păng năm ngôi tơ̆ khŭl kơ dră tơ ring. Kiơ̆ đơ̆ng noh oei tơ roi tơ băt, pơ tho kon pơ lei jang sa, hơ tŏk tơ iung mŭk drăm. Gĭt kăl hloh ‘noh tang găn jĭ hơ buh covid, kon pơ lei ưh kơ năm vih vơ̆t lơ ngôi tơ jê̆ bơ ngai hlĭch”.

Oei tơ̆ xăh hơ tăih yăih Kông Lơng Khơng, apŭng Kbang, dêh char Gia Lai, jơ hngâm đon chơt hơ iă vă sơng Têt Nhâm Dần hlôi truh. Khul druh dăm jĭ khul jang tơm lơ̆m tơ drong vei lăng rơ gŏh cham char pơ gơ̆r hơ met pơ ‘lơ̆ng râm rĕk vă sơng sơ năm ‘nao. Tơ̆ âu đei cham char tôch rơ gŏh, ‘lơ̆ng rŏ hai, gơ nơm kon pơ lei vang jang kiơ̆ tơ drong krao hơ vơn, pơ jei băl bơ̆ jang pơ jing tơ ring tơ rang ‘nao. ‘Nhŏng Đinh Văn Lộc, Bí thư Đoan xăh Kông Lơng Khơng ăn tơ băt, khei ‘năr âu ki, Đoan xăh jang hơ doi hăm dôm unh hnam kon pơ lei pơ gơ̆r yuih hơ met hlŏh 20 hơ drong kon tơ rong vă pơm ming hơ tăih kơ hnam oei. Sir 5 sơ lŭng mong râm rĕk, pơm 20 hnam hum, hnam chă pơ yơ̆ng. Vă sơng Têt Nhâm Dần, Đoan xăh krao akŏm hlŏh 20 ‘nu đoan viên druh dăm puih hơ met 5 km trong xăh, pơ tăm lơ tơm ‘long vă pơm cham char ‘lơ̆ng rŏ.

 “Hăm hơ năp jang pơm Bí thư Đoan xăh, nhôn hơ nơ̆ng pơ tho ăn chi đoan pơ lei pơ la krao hơ vơn druh dăm bơ̆ jang ‘lơ̆ng tơ drong hơ met ming pơ gar ‘long, vei rơ gŏh trong pơ lei, hnam oei. Hơ pơi ‘mĕh, têt sơ năm ‘nâu đĭ đăng đoan viên chi đoan tơ̆ dôm pơ lei tơ guăt 1 ƀơ̆r đon, chơt hơ iă, huei pơm glăi luơ̆t kiơ. Bơ̆n ƀôh, jĭ Covid-19 oei tôch hơ mơt, nhôn adrin krao hơ vơn druh dăm jang ‘lơ̆ng tơ drong tang găn jĭ Covid-19, mă loi ƀât têt, vă rim bơ ngai, rim unh hnam đei xa têt chơt hơ iă, đei jơ hngâm pran ‘lơ̆ng, jang xa roi đei ƀôh”.

Tơ̆ xăh Đạ Sar, apŭng Lạc Dương, dêh char Lâm Đồng, mă đơ̆ng đei ƀơm ưh kơ ‘lơ̆ng yua đơ̆ng jĭ hơ buh Covid-19 mă lei yua đơ̆ng cheh phe đei kơ jă, kơ na tơ drong arih sa mŭk drăm kơ kon pơ lei kon kông lơ̆m tơ ring adoi vei sơ đơ̆ng păng hơ tŏk ‘lơ̆ng. Hăm tơ drong vang tơ gŭm, 1 jơ hngơ̆m đon đơ̆ng kon pơ lei, tơ drong tơ lĕch jang kiơ̆ tơ drong tơm hơ dai hơ tŏk tơ iung mŭk drăm păng tang găn jĭ hơ buh lơ̆m tơ drong hmă ‘nao âu hlôi iŏk đei jơ nei ‘lơ̆ng hloh, kon pơ lei chơt hơ iă, ‘nă hal sơng chhôk hơ iă pơ yan puih mak ‘nao. Ƀok Liêng Jrang Ha Rô Ky, Kơ dră Anih vei lăng kon pơ lei xăh Đạ Sar tơ roi:

“Pơ yan jang 2020-2021, yua đơ̆ng ƀơm kơ nê̆ đơ̆ng jĭ hơ buh covid-19 atŭm hăm lơ̆m teh đak, xăh Đạ Sar kŭm ƀơm ưh kơ ‘lơ̆ng tôch kơ lơ, mă đơ̆ng thoi noh ră, kon pơ lei oei vei lăng cheh phe bluh jing ‘lơ̆ng hmă. Sơ năm âu ki, plei iŏk đei mă khan đei tơ jur, ‘mong dơ̆ng ‘noh kơ jă cheh phe tŏk lơ ‘măng pơ têng hăm hơ drol, kơ na tơ drong arih sa kơ kon pơ lei hơ nơ̆ng sơ đơ̆ng, mŭk drăm - tơ pôl kơ xăh hơ nơ̆ng hơ tŏk tơ iung, kon pơ lei chhôk hơ iă păng ‘nă hal. Kŭm hăm dôm trong jang kiơ̆ tơ drong tơm hơ dai hơ tŏk tơ iung mŭk drăm hai, tang găn jĭ hơ buh Covid-19 đei yua đơ̆ng kơ dră kơ pal hai, hlôh vao đơ̆ng kon pơ lei găh hơ năp jang atŭm hăm tơ pôl hơ tŏk ‘lơ̆ng, pă jor tơ drong jang kiơ̆ hơ tŏk tơ iung mŭk drăm hơ dai hăm tang găn jĭ hơ buh hơ nhăk ăn đei iŏk yua ‘lơ̆ng, vei sơ đơ̆ng đei dôm tơ drong tơm hlôi tơ lĕch ăn. Đơ̆ng ƀơ̆t pơ yan cheh phe đei kơ jă kơ na tơ drong lơ̆m năr puih mak ‘nao âu jơ hngơ̆m đon kơ kon pơ lei tă kơ tôch chhôk hơ iă ngăl”.

Nhen thoi nŏh mơ̆n, kon pơ lei dôm hơ drĕch hơ drung tơ̆ apŭng Đắk Mil, dêh char Dak Nông sơ năm ‘nâu sơng têt tôch hơ iă gơ nơm đơ̆ng jang xa đei, kơ jă tơ mam tŏk. Tơ̆ Bon Bu Đắk, xăh Thuận An, tơ ring đei hlŏh 315 unh hnam hăm dang 1.200 ‘nu bơ ngai, vă tơ tă bơ ngai M’nông ngăl. Iŏk yoa tơm đơ̆ng kon pơ lei ‘nŏh gơ nơm đơ̆ng jang chĕh phe păng ƀa đak. Ƀok Y Bling Jing, Bí thư Chi ƀô̆ Bon Bu Đắk ăn tơ băt, sơ năm ‘nâu chĕh phe đei plei lơ hai, kơ jă tŏk ƀiơ̆ hai, dơ nâu đak Bu Đắk adrol ki đei hơ met ming kơ na mong măh mai đak ăn dôm jĭt ha ƀa đak 2 pơ yan, tơ drong arih xa kơ kon pơ lei kŭm roi tŏk.

“Sơ năm so đĭ, sơ năm ‘nao truh, kon pơ lei adrin jang xa. Mă đơ̆ng oei mơ mat tat, mă lei kon pơ lei vă adrin. Hơ dai hăm tơ drong tơ gŭm đơ̆ng Đảng, tĕh đak păng khul kơ dră tơ ring nhôn kŭm tơ rĕk truh tơ̆ kon pơ lei. Nhôn tơ roi tơ băt găh tơ drong vei lăng jơ hngâm pran, lơ̆m nŏh athei pơm kiơ̆ tơ drong hơ găt 5K mă ‘lơ̆ng. Ƀât têt thoi nŏh mơ̆n, vă vei lăng ‘lơ̆ng jơ hngâm pran ăn kơ dih păng tơ pôl, kon pơ lei athei 1 jơ hngâm vang tang găn jĭ”.

Thuem hăm Dơ̆ng: Tơ blơ̆ păng pơ re nơ̆r