Ka Huệ (hơdrung K’ho Sre) oei tơ̆ pơlei Pul, tơring Dà Knàng, apŭng Đam Rông, dêh char Lâm Đồng ‘nŏh đảng viên sơnăm mơlô̆h, adoi jing bơngai drŏ kăn jang Bí thư Chi đoàn Hơdrŭh tơdăm hơbĕch hơbal.

Ka Huệ hăm đe hơ iŏh pơlei Pul

Tĭh vơ̆ djơ̆ ‘lơ̆ng lơm ŭnh hnam tơnap tap tơ̆ tơring atăih yăih Dà Knàng, apŭng Dăm Rông, dêh char Lâm Đồng, Ka Huệ măh pơdơ̆h kơ hŏk lơ̆m mă sư hok đang lăm 11, oei tơ hnam jang sa tơgŭm me ƀă. Sơnăm 17 sơnăm, Ka Huệ hơbĕch hơbal, tơyăng chă chŏh jang sa doi nhen lơ̆m vang bơ̆ jang tơdrong tơpôl.

Tơ̆ tơring Dà Knàng groi tĕh, tŏ ‘mi kial tôch lăp ăn chă pơtăm prit gĭt kăl Laba. Pêng sơnăm au ki, Hơp tak xah prit LaBa Đạ K’Nàng hlôi đei pơjing lơ̆m tơring, Ka Huệ ‘măn hlŏh 5 sao tĕh vă pơtăm prit jang hơdoi hăm Hơp tak xah. Jei lơ̆m khei năr au, Ka Huệ mơ̆t jang kŏng nhân tơ̆ Hơp tak xah, hăm sa jên khei 7 trĭu hlak jên lơ̆m 1 khei. Mŏ oei chă hơvơn đei 4 ‘nu hơdruh tơdăm kon kông vang mơ̆t jang lơ̆m hơp tak xah păng jang sa iŏk yua kơ jăp. ‘Ngoăih jơ ‘năr jang lơ̆m hơp tak xah, jĭ Bí thư Chi Đoàn pơlei Pul, Ka Huệ pơgĕnh chă krao akŏm hơdrŭh tơdăm lơ̆m pơlei vă pơtho tơbăt rim trong bơ̆ jang đơ̆ng Đảng, khôi luơ̆t tĕh đak, adoi tơlĕch jang rim trong jang atŏk tơ iung mŭk drăm đei iŏk yua kơ jăp.“Lơ̆m bơ̆ jang chă pơrô̆ pơrôp ‘nŏh nhôn hơnơ̆ng pơm kiơ̆ dôm nơ̆r pơtho khan đơ̆ng đe kră ăn hơdrŭh tơdăm. Đơ̆ng nŏh nhôn hơnơ̆ng pơgơ̆r pơtho khan ăn hơdrŭh tơdăm lơ̆m pơlei kiơ̆ trong “ ‘mi jrăh đak blăh brai”. Pơm lơ liơ vă akŏm đei hơdrŭh tơdăm tơgoăt mĭnh ƀơ̆r đon, hơdrin jang sa, vĕh ver pơm glăi khôi luơ̆t. Truh vă đĭ khei, Đoàn hơdrŭh tơdăm pơgơ̆r hop akom minh ‘măng vă chă pơma dơnŭh, tơgop nơ̆r, tơƀô̆h tơbăt dôm trong jang đei iŏk yua kơ jăp ăn hơdrŭh tơdăm. Nhen kơ dĭh ba jang sa iŏk đei hơdrol ‘mơ̆i kơna mă pơtho tơƀô̆h ăn bôl boăl jang kiơ̆. Tơ̆ au nhôn tŏk bŏk pơrô̆ iung jang pơtăm pơmur rong sơdrông pơm brai păng dang ei lơm 1 sao pơtăm pơmur păng rong sơdrông pơm brai iŏk đei đơ̆ng 7 trŭh 10 trĭu hlak jên lơ̆m 1 khei”.

Ka Huệ vang jang “Năr tơpơ̆h rơgŏh ‘lơ̆ng”

Jĭ bơngai drŏ kăn jang Bí thư Chi Đoàn hơdrŭh tơdăm hơbĕch hơbal, Ka Huệ oei jing bơngai jang pơgang lơ̆m pơlei, adoi vang jang hloi găh vei lăng măt bơngai, dôm tơdrong jang jei tơnăp ngăl. Pơlei Pul, tơring Dà Knàng đei 120 ŭnh hnam hăm dang 80% ‘nŏh bơngai K’Ho. Kơ yuơ oei tơ̆ tơring atăih yăih kơna oei đei lơ tơdrong joăt joe kơ̆m kang kơnang giĕng ư̆h kơ ‘lơ̆ng hơ iă. Ka Huệ hlôi tơnăp chă pơrô̆ pơtho tơbăt vă kon pơlei hŭt dôm tơdrong joăt ư̆h kơ ‘lơ̆ng hơ iă nhen: Iŏk ŭnh om đơ̆ng ‘lơ̆p, iŏk ŭnh om hơgăm, atŏk kơtang jơhngơ̆m đon kơchăng tang găn jĭ jăn, sŏng sa pai sĭn, nhă đak tŏ, vei lăng cham char rơgŏh.“Ĭnh Bí thư Chi đoàn pơlei Pul, jang hloi bơ̆ jang tơdrong anai. Lơ̆m mă tim mă vang jang găh vei lăng măt bơngai, tim đei pơtho tơbăt, tơdrong iŏk ŭnh om đơ̆ng hrôih, iŏk hơgăm tơ̆ au tôch kơ lơ. Mă lei đơ̆ng mă đei pơtho tơbăt ăn ‘nŏh tơdrong au hlôi vă dă ƀiơ̆ bơih. Hơdrŭh tơdăm iŏk klo akăn hơdrung anai nhen bơngai Yuăn, bơngai Chil păng rim hơdrung anai...pă đei rơnĕh kon hơ ‘lơp mă 3, mă 4 nhen sơ̆ bơih, dang ei kon pơlei hlôi băt pơm kiơ̆ lăp rơnĕh đei 2 ‘nu kon đĕch, vă vei lăng năng tông đe hăp ‘lơ̆ng hơ iă hlŏh ƀiơ̆. Mư̆h đei jĭ jăn, chă pơrô̆ hơvơn kon pơlei vang năm ƀet bơ̆ng ‘nŏh kon pơlei pơm kiơ̆ hloi”.

Hăm tơdrong hơdrin kơtang, jơhngơ̆m đon kơ jăp, blŭng sơnăm au, Ka Huệ hlôi đei pôk tơmơ̆t jang lơ̆m Đảng Cộng sản Việt Nam. Yă Mbon K’Thơm, Kơ iĕng Kơdră chĕp pơgơ̆r tơring Dà Knàng, apŭng Dăm Rông, dêh char Lâm Đồng tơbăt, lơ̆m dôm sơnăm au ki, Ka Huệ hlôi iung jang hơdoi hăm rim hơnĭh bơ̆ jang tơ̆ pơlei, tơring atŏk kơtang pơrô̆ pơrôp, pơtho tơbăt ăn kon pơlei trong jang sa hle, oei sa hle, tơplĭh dôm tơdrong so ư̆h kơ tro lăp. Mă kăl chă pơrô̆ hơvơn kon pơlei hŭt hloi tơdrong joăt iŏk oei hơgăm. Tơlĕch jang kiơ̆ trong vă jang tơ iung pơjing tơring tơrang ‘nao lơ̆m tơring, kơdĭh Ka Huệ adoi nhen pơlei Pul hlôi tơgop kơtang ba tơring Dà Knàng jang keh đang trong tơlĕch jang Tơring tơrang ‘nao.“Ka Huệ ‘nŏh mĭnh ‘nu Đảng viên mơlôh, hơbĕch hơbal, pơnam hŏk pơhrăm, jĭ Bí thư Chi đoàn ‘nŏh Ka Huệ ling lang pơm jŭk yuk trong hơlau lơ̆m jang sa vă hơdrŭh tơdăm lơ̆m pơlei, tơring pơm kiơ̆. Lơ̆m tơlĕch jang rim tơdrong jang kơ tơring ‘nŏh Ka Huệ jei jang ‘lơ̆ng ngăl. Kơdră tơring jei sơkơ̆t hơdăh, drŏ kăn đoàn viên ‘lơ̆ng vă hơnơ̆ng pơtho pơhrăm ming vă atŏk tơ iung hlŏh dơ̆ng lơm drŏ kăn jang đoàn pơma atŭm păng drŏ kăn đoàn viên kon kông pơma hơdrô̆”.

“Tơ̆ yơ vă, tơ̆ noh ƀô̆h hơdrŭh tơdăm”. Nơ̆r pơtho khan đơ̆ng Ƀok Hô hlôi đei hơdrŭh tơdăm tơring atăih yăih Dà Knàng, apŭng Dăm Rông, dêh char Lâm Đồng ƀlŏk hơdơ̆r vă jang kiơ̆. Lơ̆m au, kơdĭh Ka Huệ - Bí thư Chi Đoàn hơdrŭh tơdăm pơlei Pul, tơring Dà Knàng jĭ mĭnh ‘nu bơngai jang tơnăp. Dôm tơdrong jang hơdrin đơ̆ng mŏ hlôi tơgop gĭt kăl pơm tơllĭh jơhngơ̆m đon tơchĕng, trong jang sa kơ hơdrŭh tơdăm lơ̆m tơring atăih yăih.