VOV4.Bahnar - Jĭ kang ƀô̆ xăh đĭ pơ dơh hưu, păng sơ năm đĭ hloh 70 sơ năm bơih, mă lei ƀok Đinh Hyưn oei tơ̆ plei Đak Mông, xăh Đak Krong, apŭng Đăk Đoa, dêh char Gia Lai đei rim bơ ngai gĭt ‘mêm, lui ngeh yua kơ kơ tĭnh iơ̆m dim, arih yua kơ rim bơ ngai. ‘Ngoăih kơ ‘noh, hăm hơ năp jang ‘noh Phŏ kơ dră vei lăng Hơp tak xăh Choh jang sa păng Tơ mang lăng Đăk Krong, ƀok kŭm hăm dôm bơ ngai jang lơ̆m khŭl vei lăng Hơp tak xăh hlôi tơ mơ̆t kơ măy kơ mŏk pơm tơ lĕch cheh phe 4C lơ̆m tơ ring, tơ gŭm ăn chĕh phe hơ nhăk ăn ‘lơ̆ng, kŭm nhen plei lơ hloh pơ têng hăm hơ drol sơ̆. Blŭng sơ năm ‘nao âu, kon pơ lei chơt hơ iă yua kơ pơ yan cheh phe đei plei lơ, kơ jă măk, vang hơ dai băl hơ met ăn sơng Têt joăt joe kơ hơ drĕch hơ drŭng lơ̆m jơ hngơ̆m đon chhôk ‘nă.

Lơ̆m pơ yan jang tơm, mă đơ̆ng hlôi vă jê̆ 11 jơ ‘năr dơ̆ng, mă lei ‘nhŏng Đinh Uy oei tơ̆ plei Đak Mông oei tŏk bŏk hơ ngŭr kŭm hăm 3 ‘nu buăl sư tơ gĕch phĕ dôm găr cheh phe đum ngui tơ̆ tơm. ‘Nhŏng Đinh uy tơ roi, ŭnh hnam sư đei hloh 1300 tơ nơm cheh phe, hơ drol sơ̆ plei iŏk păh lăp đei 15 truh 16 tấn  hơ drih 1 pơ yan. Mă lei, đơ̆ng sơ năm 2019, pơ gar ‘long kơ ŭnh hnam đei tơ gŭm jang pơ long lăng tơ drong jang 4C kơ na kơ jă tĕch păng plei lơ hloh. ‘Nhŏng Đinh Uy tơ chĕng hơ drol hăm kơ jă tĕch đei nhen sơ năm ‘nâu, đơ̆ng rŏng kơ jô̆ đĭ jên jang, sư đei iŏk yua dang 80 triệu hlak jên. Tơ roi găh tơ drong pơ tăm cheh phe kiơ̆ tơ drong jang 4C, ‘nhŏng Đinh Uy vang tơ roi: 

“Sơ̆ pơ tăm cheh phe tam mă đei ki thuơ̆t kơ na iŏk yua đơ̆ng kon pơ lei tôch tŏ sĕt, iŏk đơ̆ng pơ tăm cheh phe 4c, cheh phe rơ goh ‘noh đei ƀok Hyưn pơ tho tơ plih phŏng hoă hŏk hăm mơ̆r rơ goh. Ƀok Hyưn đei kon pơ lei tôch kơ gĭt ‘mêm, yua kơ ƀok tơ tho ăn kon pơ lei pơ tăm cheh phe kiơ̆ hơ găt ‘lơ̆ng 4c, plei ‘yăl, tơ mam iŏk yua đei lơ, tơ gŭm kon pơ lei ƀrư̆ ƀrư̆ hơ tŏk tơ iung mŭk drăm.”

Hăm tơ drong krao hơ vơn hơ gei, đơ̆ng khei 9/2018 Hơp tak xăh lăp ‘nao đei 13 ‘nu vang jang ‘noh truh dang ei ƀok Đinh Hyưn hlôi krao hơ vơn đei 64 ŭnh hnam bơ ngai Bahnar vang jang, hơ tŏk akŏp kơ sô̆ dôm bơ ngai jang lơ̆m hơp tak xăh ‘noh 185, hăm hơ găt teh pơ tăm tŏk truh 320 hek tar. Sơ năm 2020, anih jang kĭ hla ar jang hơ dai hăm Kŏng ti TNHH Vĩnh Hiệp răt iŏk 500 tấn cheh phe găr. Hơ dai hăm ‘noh, Hơp tak xăh jang hơ dai hăm Kŏng ti TNHH Vĩnh Hiệp pơ tho kon pơ lei jang chŭn mir tơ mơ̆t yua trong jang pơm tơ lĕch cheh phe rơ goh kiơ̆ hơ găt ‘lơ̆ng 4C, vă yak truh pơm tơ lĕch kơ jăp. Kiơ̆ đơ̆ng noh, ‘long cheh phe đei hơ tŏk plei ‘yăl, ‘lơ̆ng păng tĕch măk. Ƀok Trịnh Khắc Dương, kơ dră vei lăng Hơp tak xăh Choh jang sa păng pơ vih pơ văn Đăk Krong tơ roi, đơ̆ng tơ drong tơ roi tơ băt krao hơ vơn đơ̆ng ƀok Đinh Hyưn, kon pơ lei hlôi hŭt lê̆ tơ drong pơ tăm cheh phe thoi so sơ̆ jing pơ tăm cheh phe rơ goh, mă lei đei ki thuơ̆t.

 “ Hăm ƀok Đinh Hyưn jĭ phŏ kơ dră vei lăng Hơp tak xăh, hăm bơ ngai kon kông ‘noh hăm trong tơ roi tơ băt krao hơ vơn đe sư jang kiơ̆ ‘lơ̆ng dôm trong jang vei lăng cheh phe, tiu păng 1,2 ‘long sa plei. Lơ̆m kơ plăh jang kiơ̆ ‘noh ƀok Hyưn bơ̆ jang kiơ̆ tôch kơ ‘lơ̆ng tơ drong jang tơ roi tơ băt krao hơ vơn. Dôm sơ năm hơ drol bơ ngai kon kông đe sư đa jang kiơ̆ mơ̆ng kơ đe, mă lei iŏk đơ̆ng ƀok  Hyưn đei khŭl vei lăng klăih song jang ‘noh sư kŭm jang tôch kơ ‘lơ̆ng tơ drong jang tơ roi tơ băt păng tơ blang hơ dăh ăn kon pơ lei. Truh dang ei, hăm 64 ŭnh hnam kon kông đe sư jang kiơ̆ tôch kơ ‘lơ̆ng trong bơ̆ jang kiơ̆ vei lăng cheh phe.”

Hăm hloh 40 sơ năm bơ̆ jang păng pơ đĭ hloi vă jê̆ 1 jơ hnơr arih tơ̆ pơ lei pơ la sư, ƀok Đinh Hyưn jĭ bơ ngai ling lang hơ drin đĭ jơ hngơ̆m sư yua kơ tơ drong jang. Jĭ gơng tơ ƀưh hơ nhăk dôm trong jang đơ̆ng Đảng, tơ drong jang tơ gŭm, khôi luơ̆t Teh đak, dôm tơ drong hơ găt đơ̆ng khôi luơ̆t găh lui khop truh rim kon pơ lei lơ̆m pơ lei. Dang ei, đĭ hloh 70 sơ năm, ƀok oei jang tơ năp, ling lang ‘meh vă tơ gop lơ hloh ăn tơ drong hơ tŏk tơ iung pơ lei pơ la, kon pơ lei đei tơ drong arih sa roi ‘năr roi phĭ tơ nŏ, hiôk hian. Hăm kon pơ lei lơ̆m pơ lei, ƀok ling lang tơ jê̆, rơ hâu pơ lung dôm ŭnh hnam mơ mat tat, ŭnh hnam dơ nuh hin hơ drin tŏk klăih đơ̆ng dơ nuh hin, krao hơ vơn kon pơ lei tơ plih hơ drĕch ‘long pơ tăm, rong kon tơ rong, tơ mơ̆t yua khoa hŏk ki thuơ̆t hơ gei lơ̆m tơ drong arih sa.

“Ƀơ̆t pơ dơh hưu ĭnh hơ nơ̆ng ‘meh jang vă hơ tŏk tơ drong jang mŭk drăm ŭnh hnam, tơ gŭm kon pơ lei tŏk bŏk đei tơ drong arih sa mơ mat tat pơ tăm cheh phe, pơ tăm ƀa phang hơ tŏk tơ iung mŭk drăm. Sơ̆ yua ưh kơ hlôh vao, ưh kơ đei kon jên kơ na iŏk yua ưh kơ lơ. Ĭnh năm hŏk, đei pơ hrăm vih kŭm tơ roi tơ băt dơ̆ng ăn rim bơ ngai. Ĭnh kŭm krao hơ vơn kon pơ lei ‘noh athei jang kiơ̆ ‘lơ̆ng trong jang đơ̆ng Đảng, Teh đak vă ƀrư̆ ƀrư̆ yak klăih đơ̆ng dơ nuh hin pơ ngot.”

Ƀok Vũ Đăng Tuấn, Kơ dră Anih vei lăng kon pơ lei xăh Đăk Krong hơ len lăng:

“ Ƀok Đinh Hyưn jĭ 1 Đảng viên 30 sơ năm Đảng, sơ̆ sư hlôi vang jang tơ drong jang kơ dră chĕp kơ̆l kơ Anih vei lăng kon pơ lei, anih jang Đảng. Ƀơ̆t đei pơ dơh hưu vih hăm ŭnh hnam ‘noh sư hơ tŏk tôch kơ ‘lơ̆ng jĭ 1 Đảng viên jang hơ drol, sư vang hăm Hơp tak xăh tơ roi tơ băt krao hơ vơn kon pơ lei, mă loi ‘noh jĭ tơ ring kon pơ lei kon kông vă vang jang sa, pơm tơ drong hiôk ăn kon pơ lei đei tơ drong jang.”

 Hăm jơ hngơ̆m đon jang tơ năp ‘lơ̆ng, ƀok Đinh Hyưn hlôi jang đang ‘lơ̆ng dôm hơ năp jang đei tơ ring pơ jao. Mă loi ‘noh ƀok ling lang kơ chăng tơ lĕch ăn dôm trong jang vă hơ dai hăm khŭl kơ dră, anih jang Đảng xăh hơ met pơ ‘lơ̆ng dôm tơ drong oei đei, ưh kơ ‘lơ̆ng lơ̆m pơ lei hăm ‘meh vă hơ nhăk kon pơ lei plei Đăk Mông hơ tŏk tơ iung hloh dơ̆ng./.

Hoàng Qui: Chih

Thuem: Tơ blơ̆