VOV4.Bahnar - Atŭm hăm tơdrong jang hơdrin iung tơ jră, phă pơrăm khŭl yoch, rim ‘nu Cảnh sát cơ động, Kŏng ang dêh char Dak Lăk hơnơ̆ng pơgơ̆r rim tơdrong jang lăng trŭh tơ̆ tơring, tơgŭm djru kon pơlei chŏh jang sa, kĕch yoă ƀa, phĕ plei ‘long. Dôm tơdrong jang au hlôi tơgop pơm ‘lơ̆ng hlŏh dơ̆ng ăn tơgoăt tơgoăl kơ jăp kŏng ang kon pơlei, pơm ‘lơ̆ng hlŏh dơ̆ng um rup bơngai kong ang kon pơlei hăm kon pơlei tơ̆ rim pơlei pơla.

Kơ mơjĭt ‘nu Kanh sat cơ động kôch hơmet hơbong thong đak

Tơ̆ buôn Ktơng Drun, tơring Cư Né, apŭng Krông Ƀŭk, dêh char Dak Lăk, 30 ‘nu kŏng ang tŏk bŏk hơ ngŭr chă kôch hơbet hơbong thong đak păng chong hơmet ‘ngiĕt tơƀôt, ming hơmet hơdrơ̆m đak. Thượng úy Nguyễn Thị Khánh Vân, Kơ iĕng bí thư đoàn Hơnĭh Kanh sat cơ động Kŏng ang dêh char Dak Lăk tơbăt, lơ̆m ‘măng iung năm kơ yuơ kon pơlei hơnơ̆ng đei hơnĭh tơlĕch jang vă tơgum djru kon pơlei tơ̆ rim pơlei pơla.“ ‘Nau jing mĭnh lơ̆m dôm tơdrong jang mă nhôn kơrŭn đĭ jơhngơ̆m mơlô̆h lăng trŭh kon pơlei pơla, hơnhăk ba dôm tơdrong jang kơ khul kanh sat kon pơlei, khŭl kŏng ang kon pơlei năm trŭh hăm tơring atăih yăih, tơring tơnap tap hlŏh vă tơgŭm djru ăn kon pơlei”.

        Lơ̆m ‘măng mă au, rim kanh sat gô kôch hơmet pơ ‘lơ̆ng 300met hơbong thong đak, chong kŏh ‘ngiĕt tơƀôt, hơpuih hơmet cham hnam hop akŏm pơlei tơ̆ 2 pơlei buôn Đrao hăm Ktơng Drun, tơring Cư Né; atŭm hăm pơtho tơbăt khôi luơ̆t păng chă hơvơn đơ̆ng au đơ̆ng to pôk ăn 50 tơnô̆ tơmam drăm ăn ŭnh hnam tơnap tap. Kiơ̆ đơ̆ng ƀok Y Bliu Mlô, Kơ iĕng Kơdră chĕp pơgơ̆r Dơnŏ anĭh Mặt trận Tổ quốc tơring Cư Né, ‘nau jing 2 pơlei tơnap tap hlŏh tơ̆ tơring hăm vă jê̆ 500 ŭnh hnam, 2.000 ‘nu măt bơngai, găh lơ bơngai Êđê erĭh sa. Tơdrong tơgŭm djru tơtom đơ̆ng khŭl kang ƀô̆ kŏng ang tơgŭm ăn kon pơlei dă ƀiơ̆ tơnap tap, hơdrin jang sa.“ Tơdrong erĭh sa kơ kon pơlei hrei au ‘nŏh gơnơm lơ̆m jang mir, tôch tơnap tap. Hlŏh đơ̆ng ‘măng pôk ăn tơmam drăm au hơpơi ăn kon pơlei gô hơdrin hlŏh dơ̆ng vă jang mir hlŏh dơ̆ng. tang măt ăn kon pơlei 2 pơlei tôch chơt hơ iă, bơnê hơpơi ‘mĕh gô hơnơ̆ng vei kơ jăp tơgum djru ăn kon pơlei, mă kăl lơ̆m khei năr hrei au”.

Kanh sat cơ động pôk tơmam drăm ăn kon pơlei tơnap tap

Hăm mĭnh ‘nu kanh sat cơ động, rim ‘măng iung năm jang jing mĭnh jơ ‘năr rơvơn vă đe sư đei vĭh hăm pơlei pơla, tơklep hăm kon pơlei, pơhrăm jơhngơ̆m đon chă pơrô̆ pơrôp kon pơlei. Trung sĩ Y Sen Mdrang tơbăt: “Hlŏh đơ̆ng dôm ‘măng năm bơ̆ jang au pơjing ăn kơ nhôn tơgoăt tơgoăl, tơklep hăm kon pơlei hlŏh dơ̆ng. Tơ ƀơ̆p pơma dơnŭh hăm kon pơlei pơm ăn kơ bơ̆n sa roi ‘mêm kơ eng kon pơlei hlŏh dơ̆ng, ‘mĕh vă tơgŭm ăn kon pơlei hăm đĭ jơhngơ̆m đon kơ rim khŭl mơlôh”.

        Thiếu tá Hoàng Thị Kim Phượng, Kơdră chĕp pơgơ̆r Khŭl jang Chĭnh trĭ, Hơnĭh Kanh sat cơ động tơbăt, jang kiơ̆ tơdrong jang “Kŏng ang Dak Lăk lăng trŭh tơring, tơ iung pơjing tơgoăt tơgoăl ‘lơ̆ng liĕm hăm kon pơlei”, rim sơnăm hơnĭh au pơgơ̆r lơ ‘măng iung jang lăng trŭh tơring, iung jang kơ yuơ kon pơlei pơla. Rim ‘măng năm đĕi ‘măng đunh trŭh kơ giĕng, rim kanh sat cơ động sơnăm mơlô̆h gô vĭh oei sa hơdoi hăm kon pơlei, chă chŏh jang tơgŭm djru ăn kon pơlei. Nhen lơ̆m sơnăm 2021, mă đơ̆ng tơdrong jĭ hơbuh Covid-19 pơrăm kơtang, hơnĭh au oei pơgơ̆r đei 7 ‘măng iung jang, chă hơvơn đei hlŏh 320 trĭu hlak jên vă tơgŭm tơmam drăm ăn kon pơlei. Hơdrô̆ đơ̆ng blŭng sơnăm au trŭh dang ei, hơnih au hlôi pơgơ̆r 5 ‘măng iung jang năm tơ̆ pơlei pơla tơring atăih yăih, tơnap tap hlŏh.“Lăng trŭh tơdrong gĭt kăl vă tơ iung pơjing tơgoăt tơgoăl ƀar păh khŭl kŏng ang păng kon pơlei lơ̆m dêh char ‘nŏh rim sơnăm Hơnĭh Kanh sát cơ động hlôi pơrô̆ athei rim kang ƀô̆, kŏng ang tơlĕch rim tơdrong jang năm iung jang tơgŭm djru lăng trŭh năm tơ̆ tơring chŏh jang, tơgŭm ăn kon pơlei, mă kăl ‘nŏh tơring kon kông, tơring atăih yăih. Hlŏh đơ̆ng rim tơdrong jang au ‘nŏh gei kơ jăp lơ̆m rim kang ƀô̆, kŏng ang nhôn, lăng ƀô̆h tơdrong tơnap tap, glĕh hrat kơ kon pơlei păng khŭl jei đei tơgop tŏ sĕt hơmet pơ ‘lơ̆ng tơdrong erĭh sa, mŭk drăm kơ kon pơlei”.

Hơdrol kơ ‘nŏh, 50 kŏng ang Hơnĭh Kanh sat cơ động, dêh char Dak Lăk jei hlôi jang kiơ̆ “Iung năm jang” tơ̆ tơring Yang Tao, apŭng Lăk. Atŭm hăm pơgơ̆r năm pơtrui, dăr lăng vei lăng sơđơ̆ng tơpôl, sơđơ̆ng trong nơnăm lơ̆m tơring, khŭl kanh sat cơ động hlôi pơgơ̆r pơrô̆ pơtho khan ăn kon pơlei pơm kiơ kơ jăp trong bơ̆ jang đơ̆ng Đảng, Khôi luơ̆t Tĕh đak păng rim tơdrong tơchơ̆t kơ tơring. Tơ̆ au, rim Kanh sat cơ động hlôi choong chŏh hơpuih hơmet pơ ‘lơ̆ng rim trong nơnăm; năm tơ̆ chŭn na vang yô̆ prĕh ƀa ăn kon pơlei.

Lơ̆m khei ‘năr kơ đeh, khŭl iung jang hlôi vĭh trŭh hăm kon pơlei, rim kanh sat cơ động hơnơ̆ng pơkăp ư̆h kơ ‘nhoen tơnap tap glĕh hrat vă vang iung jang tơgŭm djru ăn kon pơlei kon kông oei tơnap tap lơ tơdrong.

        Rim ‘măng iung năm jang vĭh tơ̆ pơlei pơla đơ̆ng rim kanh sat cơ động tơ Dak Lăk hlôi tơgum vei lăng sơđơ̆ng pơlei pơla, tơgoăt kơ jăp hlŏh dơ̆ng jơhngơ̆m đon ‘mêm kơ eng dĭh băl kŏng ang hăm kon pơlei, tơ iung pơjing um rup ‘lơ̆ng hơ iă kơ khŭl kŏng ang kon pơlei “Kơ yuơ tĕh đak plang akau jăn, kơ yuơ kon pơlei năm iung jang”.

Bơngai chĭh: H’Xĭu

Tơblơ̆ nơ̆r: Amazưt