Tơlĕch đon pơhnŏng jang tŏk mŭk drăm tŏk truh 2 kơsô̆ đơ̆ng 2026-2030, dêh char Khánh Hòa oei hơtŏk tơdrong sơng iŏk jên jang tơ̆ dôm Tơring jang mŭk drăm, Tơring jang kơmăy kơmŏk vă pơjing jơhngâm pran ăn tơdrong jang tŏk. Ƀât hơtuch khei 5 âu ki, Anih vei lăng tơring jang mŭk drăm păng Tơring jang kơmăy kơmŏk kơ dêh char pơjao hla ar asong tơmât jên jang ăn 13 tơdrong jang, hăm kơsô̆ jên jang vă jê̆ 7.500 ti. Lơ̆m noh, tơdrong jang tơ̆ Tơring jang kơmăy Ninh Thọ lơ̆m teh xă 327ha, jên vă tơmât jang hlŏh 3.800 ti, đei hơmĕng pơjing đei tơring teh jang kơmăy păng sơng đei lơ bơngai tơmât jên jang truh dơ̆ng.

Dơ̆ng tang ăn anih tĕch mơdro đei rơih pơm tơ ‘ngla tơmât jên jang, ƀok Nguyễn Tuấn Anh, Kơdră chĕp kơ̆l Công ty jang hơdoi Tơring jang kơmăy Stavian ăn tơbăt, pơm hla ar tơmât jên jang hrei ‘nâu tôch hrĕnh, pơjing tơdrong ‘lơ̆ng ăn anih tĕch mơdro: “Athei pơma hơdăh ‘nŏh jĭ tôch hrĕnh, nhôn kŭm ưh ê nhôn đei măt tơ̆ âu hrĕnh thoi noh. Lơ̆m dang 4 khei đĕch mă lei hlôi hơlen đang hla ar hô sơ păng pơjao ăn tơ ‘ngla tơmât jên jang ‘nŏh jĭ jơnăr tôch hrĕnh păng pha ƀiơ̆ tơpă.”

Kŭm hăm sơng iŏk dôm tơdrong jang ‘nao, tơdrong hơmet pơ ‘lơ̆ng dôm tơdrong oei tơhlăk găh luơ̆t vă pơdui khei ‘năr bơ̆ jang ăn dôm tơdrong jang hlôi đei kŭm tơgop hơmet kơjăp đon lui đơ̆ng rim anih tĕch mơdro. Lơ anih tĕch mơdro tih tơ̆ Tơring jang mŭk drăm Vân Phong đei hơmet ming khei ‘năr jang xa đơ̆ng 50 sơnăm tŏk truh 70 sơnăm.

Hăm dôm tơdrong jang man anih jang, pơm trong tơ̆ tơring jang kơmăy, khei ‘năr pơm đang hla ar tơmât jên jang tôch gĭt kăl. Hla ar pơm hrĕnh, teh vă jang kơmăy kơmŏk đei roi hrôih ‘nŏh roi ‘lơ̆ng, pơm hiôk hian vă sơng bơngai tơmât jên jang păng pơih xă tơdrong jang xa. Kiơ̆ Anih vei lăng Tơring jang mŭk drăm păng Tơring jang kơmăy dêh char Khánh Hòa, tơdrong ‘nâu gơ̆h đei gơnơm đơ̆ng tơplih ‘nao trong chĕp kơ̆l pơgơ̆r, hơtŏk tơdrong jang hơdoi đơ̆ng dôm anih jang kơpal, păng tơgŭm ăn anih tĕch mơdro đơ̆ng ‘nao chă pơm hla ar hloi.

Ƀok Trần Minh Chiến, Kơdră Anih vei lăng Tơring jang mŭk drăm păng Tơring jang kơmăy kơmŏk dêh char Khánh Hòa ăn tơbăt: “Đơt pơjao ƀât ‘năr 25/5 âu ki, đơ̆ng năr pơm hla ar truh đei drơ̆ng nơ̆r asong tơmât jên jang lăp 4 khei đĕch. Đĭ đăng rim tơdrong đei nhôn kăt tơjur đơ̆ng 30 - 50% hla ar athei pơm”.

Ƀok Lê Huyền, Phŏ Kơdră vei lăng kon pơlei dêh char Khánh Hòa ăn tơbăt, tơring oei pơ ‘nhŏ ăn tơdrong atŏk tơiung anih jang, trong gre tơƀưh dôm tơring jang kơmăy kơmŏk, tơring jang mŭk drăm; atŭm hăm ‘nŏh chă rơih dôm anih tơmât jên jang pran ‘lơ̆ng, jang xa rơgei păng đei kơmăy kơmŏk 'nao vă bơ̆ jang dôm tơdrong jang tih, gĭt kăl: “Găh Anih vei lăng kon pơlei dêh char nhôn đei đon pơhnŏng tôch hơdăh bơih, mă lei tơdăh đei đon adrin ‘nŏh sư roi pran hlŏh dơ̆ng mưh vang yak hơdoi hăm dôm anih tĕch mơdro. ‘Ngoăih kơ krao hơvơn bơngai tơmât jên jang ‘nŏh kŭm hơmet pơ ‘lơ̆ng rim tơdrong hai, mă loi jĭ dôm tơdrong đei ƀơm truh anih jang, trong nơnăm tơƀưh hăm dôm tơring jang kơmăy vă pơm ‘lơ̆ng ăn bơngai tơmât jên jang, mưh tơlĕch tơdrong jang mă mônh ‘nŏh gơ̆h ƀônh hiôk, mă ƀar ‘nŏh đei yoa ‘lơ̆ng, lơ̆m noh đei yoa ăn anih tơmât jên jang tơm hai, đei yoa ăn dôm bơngai tơmât jên jang kiơ̆ hai păng đei yoa ăn dêh char hai”.

Đơ̆ng kăt tơjur ƀiơ̆ tơdrong pơm hla ar tơmât jên jang truh hơmet pơ ‘lơ̆ng dôm tơdrong oei tơhlăk găh trong nơnăm păng chưk pơ ‘ngoăih teh, Khánh Hòa oei dar deh pơjing tơdrong ‘lơ̆ng vă dôm tơdrong jang gơ̆h tơlĕch jang hrôih. ‘Nâu kŭm jing tơdrong tơm gĭt kăl vă dêh char hơnơ̆ng sơng iŏk jên jang ‘nao, năm truh đon pơhnŏng jang tŏk truh 2 kơsô̆ lơ̆m dôm sơnăm truh./.