Tơdrong tơblăh vang tơ̆ Trung Đông gô pơm ăn kơjă đak xăng đak dâu păng jên logistics hơnơ̆ng kơ tŏk, dui ba jên pơm tơlĕch đơ̆ng anih mơdro sa tŏk. Hơmơt pơdơh 1,2 tong duk chơ tơmam trong đak dơsĭ apŭng plĕnh teh kŭm gô ƀơm ưh kơ ‘lơ̆ng truh tơdrong jang răt tơmơ̆t tĕch tơlĕch tơ̆ teh đak đe, ƀơm ưh kơ ‘lơ̆ng kơtă truh rim anih jang mŭk drăm tơm kơ Khánh Hòa nhen pơm duk, pơm tơlĕch ka hơdang, duk thŏng nan kơdâu tơ̆ đak dơsĭ păng tơmang lăng - pơvih pơvăn. Tơ̆ hơnăp tơplih đơ̆ng anih tĕch mơdro apŭng plĕnh teh, lơ anih mơdro sa lơ̆m dêh char tŏk bŏk kơchăng pơm lăp, pơm lơ anih tĕch mơdro păng hơtŏk ‘lơ̆ng kơjă tơmam. Yă Trịnh Thị Hồng Vân, Bí thư Anih jang Đảng, Kơdră Jơnŭm jang lơ̆m khŭl Kŏng ti Yến sào Khánh Hòa tơbăt anih mơdro sa tŏk bŏk tŭn pran pơm tơ jur jên hơlam, pơih să tĕch lơ̆m teh đak păng dôm anih tĕch mơdro tih.

“ ‘Ngoăih kơ tĕch tơ̆ teh đak đe tơpu xem pleng, nhôn gô hơtŏk ‘lơ̆ng tơdrong hơtŏk tơiung dôm tơmam đơ̆ng rŏng kơ pơm tơlĕch, kiơ̆ đơ̆ng noh hơtŏk kơjă tŏk ăn dêh char, ăn anih mơdro sa. Nhôn gô jang hơdai hăm dôm grŭp jang tih păih Trung Quốc vă hơtŏk tơiung.”

Kiơ̆ kơ ƀok Nguyễn Sanh Đương, Phŏ Kơdră Anih vei lăng găh Kơmăy kơmŏk Mơdro sa Khánh Hòa, ưh kơ sơđơ̆ng tơ̆ Trung Đông tŏk bŏk ƀơm ưh kơ ‘lơ̆ng truh tơdrong jang pơm tơlĕch, tĕch mơdro đơ̆ng lơ anih mơdro sa lơ̆m dêh char. Dang ei jên tĕch tơmam tơ̆ teh đak đe kơ Khánh Hòa tơ̆ tơring ‘nâu iŏk đei dang 210 triệu USD, đei vă jê̆ 10% akŏm jên tĕch tơlĕch tơmam tơ̆ teh đak đe, ƀơ̆t mă răt tơmơ̆t đơ̆ng teh đak đe dang 10 triệu USD. Kơjă đak xăng đak dâu tŏk pơm ăn dôm anih jang tŏk pran nhen pơm duk, pơm tơlĕch ka hơdang, tơmang lăng - pơvih pơvăn pŭ kơhret yua đơ̆ng jên pơm tơlĕch păng chơ roi tŏk. Tơ̆ hơnăp tơdrong ‘nâu, anih vei lăng găh kơmăy kơmŏk mơdro sa tŏk bŏk jang hơdai hăm Khŭl vei lăng mŭk drăm păng Hơnih jang kơmăy kơmŏk dêh char Khánh Hòa tơgŭm anih mơdro sa hơmet pơ ‘lơ̆ng mơmat tat, pơtrŭt dôm tơdrong jang ŭnh hơyuh păng kơmăy kơmŏk vă tưk tơiung dơ̆ng jang tŏk. Ƀok Nguyễn Sanh Đương tơbăt:

“Vă ‘mong pơlăp, anih jang akŏm tơgŭm bơngai tơmơ̆t jên jang. Mă loi ‘noh hăm 2 tơdrong jang ŭnh điên măt ‘năr Phước Thái 2, Phước Thái 3, hơdrin bơ̆jang lơ̆m khei 3, hơvơn kơjă tơmam ŭnh điên. Hơdai hăm ‘noh, jang hơdai hăm dôm anih jang tơgŭm dôm bơngai tơmơ̆t jên jang kơmăy kơmŏk, hơmet pơ ‘lơ̆ng mơmat tat, tŭn hrĕnh tơdrong jang”.

Dôm tơdrong tơplih đơ̆ng mŭk drăm apŭng plĕnh teh ăn ƀôh tơdrong gĭt kăl đơ̆ng tơdrong hơtŏk tơiung mŭk drăm đak dơsĭ păng pơvih pơvăn logistics ‘nao. Hăm đei yua tơnŏk đak jrŭ, mă loi ‘noh tơ̆ Vân Phong, Khánh Hòa tŏk bŏk ƀrư̆ ƀrư̆ pơm hơnăp jang tơm chơ chuĕn tơmam tơ̆ đak dơsĭ păng logistics kơ tơring Nam Trung Bộ. Mưh trong jang tĕch mơdro jơ̆p plei đei hơmet ming dơ̆ng, tơdrong tơmơ̆t jên jang hrơ̆ch hơnih tơnŏk đak dơsĭ, hơnih jang kơmăy kơmŏk păng pơvih pơvăn logistics gô tơgŭm tơring hơtŏk ‘lơ̆ng tơdrong pơm lăp tơ̆ hơnăp dôm tơdrong tơplih tơ̆ ‘ngoăih. Ƀok Nguyễn Thanh Hà, Phŏ Kơdră Anih vei lăng kon pơlei dêh char Khánh Hòa tơbăt, vă vei tơdrong hơgăt jang tŏk 2 kơsô̆, dêh char tŏk bŏk dăr hơlen tơdrong pơjao, hơmet pơ ‘lơ̆ng mơmat tat ăn anih mơdro sa păng tŭn hrĕnh dôm tơdrong jang tơm.

“Tơdrong ‘lơ̆ng tơm jang tŏk sơnăm 2026 oei jing tơmơ̆t jên jang kơ teh đak. Nhôn athei răp hơlen lăng, klăih song jên jang, tơlĕch jên jang tơmơ̆t jên jang teh đak iŏk đơ̆ng blŭng sơnăm. ‘Nâu jĭ tơdrong tôch kơ gĭt kăl, tơchơ̆t ăn tơdrong hơgăt jang tŏk 2 kơsô̆ kơ Khánh Hòa lơ̆m sơnăm ‘nâu. Dang ei oei hloh 4.000 ti hlak jên kăl kơ jang đang klăih song hơdăh”.

Lơ̆m 2 khei blŭng sơnăm 2026, dêh char Khánh Hòa oei pơvei jang tŏk ‘lơ̆ng. Thu mong jên jang teh đak đei hloh 11.600 ti hlak jên, hơtŏ dang 30% jên tơchĕng hơdrol Trung ương pơjao păng tŏk 1,7 ‘măng pơting hăm khei ‘nâu sơnăm hơdrol. Lơ̆m khei ‘năr mŭk drăm apŭng plĕnh teh oei ƀôh lơ ưh kơ sơđơ̆ng, tơdrong kơchăng vei lăng, pơm lơ anih tĕch mơdro păng hơtŏkt ơdrong đei yua mŭk drăm đak dơsĭ ‘noh jĭ trong jang vă Khánh Hòa kĕ vei kơjăp tơdrong hơtŏk tơiung, pơm đei tơdrong ‘lơ̆ng bơ̆jang kiơ̆ hơgăt jang tŏk kơjăp lơ̆m sơnăm 2026 păng dôm sơnăm đơ̆ng rŏng dơ̆ng.