Kiơ̆ hla ar chih tơroi đơ̆ng Anih vei lăng kon pơlei dêh char Khánh Hòa, 9 khei sơnăm ‘nâu, mŭk drăm kơ dêh char tŏk sơđơ̆ng ‘lơ̆ng, GRDP đei dang 7%. Dôm tơdrong choh jang xa, jang kơmăy, pơvih pơvăn adoi jang tŏk ‘lơ̆ng. Thu mong jên ăn teh đak lơ hlŏh kơsô̆ pơjao. Dôm anih jang xa, chă tơmang lăng păng pơvih pơvăn oei vă tŏk hơlơ̆k dơ̆ng tôch ‘lơ̆ng. Anih tĕch mơdro lơ̆m dêh char kŭm roi kơchăng ƀiơ̆ lơ̆m tơdrong pơm tơlĕch, tĕch mơdro kơtă tơ̆ tơring, tơjur ƀiơ̆ tơdrong gơnang đơ̆ng răt iŏk tơmam đơ̆ng teh đak đe. Khánh Hòa hlôi sut đĭ hnam hiah hiok, pơih xă tơdrong asong tŏk iŏk jên răt hnam oei tơpôl ăn bơngai đei jên khei tŏ sĕt păng đe công nhân. 3 tơdrong jang tơm kơ teh đak jang đei ‘lơ̆ng ngăl, vang tơgop hơmet pơ ‘lơ̆ng anih jang, trong nơnăm păng tơdrong arih xa tơ̆ tơring hơtăih yăih.

Kiơ̆ ƀok Nguyễn Khắc Toàn, Kơdră vei lăng kon pơlei dêh char Khánh Hòa, hơdai hăm dôm tơdrong ‘lơ̆ng jang đei, tơring kŭm oei đei lơ tơdrong tơhlăk. Lơ̆m noh, tơlĕch jên jang đơ̆ng teh đak ‘nao đei lăp hlŏh 44%, yoa tơhlăk găh teh păng tơdrong chĕng hơmet, tơproh trong jang đơ̆ng rŏng kơ tơmât hơdai tơring. ‘Nâu kŭm jing tơdrong dêh char oei akŏm jơhngâm hơmet pơ ‘lơ̆ng:

“Nhôn tơrek truh tơdrong hơmet pơ ‘lơ̆ng dôm tơdrong oei tơhlăk tơ̆ dôm tơdrong jang oei tơƀâp pơmat tat, nhôn pơjao ăn dôm kơdră jang lơ̆m Anih vei lăng kon pơlei dêh char iŏk jang kiơ̆ rim tơdrong. Pơgơ̆r hôp hơnơ̆ng, athei jang mă tơnăp, jăh hơmet pơ ‘lơ̆ng tơ̆ hơnăp kơnh. Hơmĕng hăm dôm tơdrong ‘nŏh, adrin hơmet pơ ‘lơ̆ng pơmat tat, pơm ‘lơ̆ng ăn tơdrong jang tŏk”.

Ƀok kơdră Nguyễn Hải Ninh tơchĕng ‘lơ̆ng tơdrong adrin đơ̆ng dêh char Khánh Hòa lơ̆m tơdrong chĕp kơ̆l, pơgơ̆r bơ̆ jang, tưk tơiung ming tơdrong jang xa, hơtŏk tơdrong tơplih hăm kơmăy sô̆ lơ̆m tơdrong vei lăng teh đak păng jang kiơ̆ KPI vă hơlen năng, vei lăng kăn ƀô̆.

Ƀok Nguyễn Hải Ninh pơma hơdăh, đơ̆ng rŏng kơ tơmât hơdai, Khánh Hòa đei lơ tơdrong ‘lơ̆ng vă jang tŏk mă hui tơring nai đei, nhen jih đak dơsĭ kơjung hlŏh lơ̆m teh đak, trong gre kơdâu hrĕnh, cham gre păr, anih jang unh hơyuh păng chă tơmang ‘lơ̆ng kơ teh đak. Yoa thoi noh, Khánh Hòa athei hơmet pơ ‘lơ̆ng dôm tơdrong oei tơhlăk vă gơ̆h jang tŏk truh 8,1% lơ̆m sơnăm 2025, vă jang đei yoa ‘lơ̆ng dôm tơdrong tơchơ̆t găh trong tơgŭm hơdrô̆, vă pơjing tơdrong pran ‘lơ̆ng ăn tơdrong jang tŏk đĭ jăl jang.

Ƀok Kơdră Nguyễn Hải Ninh pơma: “Hlôi đei anih tơmât jên jang tih truh hăm Khánh Hòa bơih. Mă lei athei ngôi lăi dơ̆ng vă lăng năng dôm tơdrong jang tơ̆ Tơring kơdrâm, tơring ưh đei iŏk thuê̆ thoi yơ? Athei đei tơdrong tơgŭm yă kiơ? Tơring tĕch mơdro hiôk hian lơ liơ? Jang tŏk thoi yơ? Tơdăh ưh ‘nŏh dôm anih tơmât jên jang bơ̆ jang kiơ̆ trong hmă, ưh kĕ jang tŏk, trong jang đơ̆ng dêh char athei tơklep hăm trong jang đơ̆ng teh đak”.

Hăm lơ tơdrong pran ‘lơ̆ng hlôi đei păng tơdrong vang jang tôch pơneh đơ̆ng rim anih jang chinh trĭ, Khánh Hòa oei dơ̆ng ƀât hơnăp tơdrong ‘lơ̆ng vă jang tŏk pran, jing anih tơm jang mŭk drăm đak dơsĭ, chă tơmang lăng păng pơvih pơvăn ‘nao tơ̆ tơring găh Pơbăh kơ Tơring tŏk bŏk. Dôm nơ̆r pơkăp tơgŭm, hơmet pơ ‘lơ̆ng pơmat tat đơ̆ng dôm anih tơm, anih jang kơpal kơ Trung ương đei hơmĕng gô pơjing dơ̆ng jơhngâm pran vă Khánh Hòa bơ̆ jang đei đon pơhnŏng jang tŏk truh 8,1% lơ̆m sơnăm 2025.