Hloh 3.400 tong duk hlôi đei asong dơ̆ng sơđơ̆ng ah 7 anih dơ̆ng, khul juăt jang hơtŏk chă hơlen păng athei tôm bơngai jang lơ̆m duk jăk đơ̆ng duk hơdrol kơ 6 jơ kơmăng năr 28/11; atŭm hăm noh hơlen lăng jê̆ 180 hơnih hơlih, đak lip jrŭ vă vei sơđơ̆ng tơdrong hơrih kon pơlei. Kiơ̆ tơchơ̆t kơ̆m đơ̆ng Anih jang vei lăng kon pơlei dêh char Khánh Hoà, đơ̆ng 7 jơ năr 28/11, tôm duk tơmang pơhiơ̆, duk chơ tơmam, duk rôp you ka vih vơ̆t tơ̆ đak dơsĭ athei pơdơh pơm jang; đơ̆ng rŏng 6 jơ kơmăng năr 28/11 rim bơngai jang lơ̆m duk athei tŏk tơ̆ kông; bơngai jang rong ka hơdang ưh gơh năm tơ̆ hơnih rong ka hơdang.

Dêh char Khánh Hòa hlôi vei sơđơ̆ng kơtơ̆ng ang tơroi tơbăt vă tôm duk pơm jang tơ̆ đak dơsĭ băt hơdah gah 'mi kial hơbŭt kơsô̆ 15 păng kơchăng tang găn tơnăp. Hơlen lăng dơ̆ng tơ̆ dôm anih ăn duk dơ̆ng păng hơnih kăl, ƀok Trần Phong, Kơdră Anih jang vei lăng kon pơlei dêh char Khánh Hòa pơgơ̆r hăm rim tơring păng khul juăt jang tơtenh pơtho ăn kon pơlei băt, khŏm mă pơđep hăm dôm bơngai mă ưh kơ 'meh pơm kiơ̆ trŏ trong tơlĕch jang.