Tơ̆ tơring dơsĭ Đầm Bấy, ving Nha Trang, dêh char Khánh Hoà, rim hơdrau rong ka hơdang hăm như̆a HDPE tŏk bŏk oei pơtăl kơ rơkĭ 'long so sơ̆. Hơdrau rong ka hơdang kiơ̆ trong 'nao đei pơm kơjăp 'lơ̆ng, kĕ tơjră hăm rơnglă đak poh yă kơtang, đei hloi camera hơlen lăng cham char păng tơdrong rong ka hơdang. Gơnơm đơ̆ng noh, bơngai rong da ƀiơ̆ huach jên hơpah đe jang, atŭm hăm noh hơtŏk iŏk yua. Dôm tơdrong ưh kơ 'lơ̆ng hăm rơkĭ 'long nhen ưh đei kơjăp, ƀônh răm ah mă 'mi kial đak hơbông, pơm 'mê̆ cham char... dar deh đei hơmet gơnơm đei hơdrau rong pơm hăm như̆a tơguăt hăm kơmăi kơmŏk 'nao. Ƀok Vũ Khắc Mười, bơngai vang jang kiơ̆ pơkăp rong ka hơdang kiơ̆ trong 'nao hơgei tơ̆ Đầm Bấy ăn tơbăt, đơ̆ng tơdrong đei jơnei mă blŭng, kon pơlei lui ngeh pơih să tơdrong jang:  “Tôm đĭ đăng đei hơnih rong ka lơ̆m hơdrau, hơnhuăl, rơkĭ păng camera, jên asong jang pơhlom 281 triu hlj ăn rim hơdrau, lơ̆m noh Jên mong Thiện Tâm tơgŭm tong hơnê̆ jên asong jang. Pơtêng hăm tơdrong rong ka lơ̆m rơkĭ 'long kiơ̆ trong so, trong rong lơ̆m hơdrau HDPE tơgŭm tơjur ƀiơ̆ jên hơpah bơngai jang. Hơdrol ki, minh hơnih rơkĭ rong ka juăt jue minh 'nu jang rong đei pơhlom 10–15 tơ̆n, oei rong hăm hơdrau HDPE gơh rong truh  40–50 tơ̆n hloi”

Trong jang rong ka đak dơsĭ kiơ̆ trong 'nao tŏk bŏk đei dêh char Khánh Hòa pơtơm jang tơ̆ lơ tơring rong ka nhen Vân Phong, Nha Trang, Cam Ranh. Tơpă ăn ƀôh, trong jang ou ưh hơdrô̆ hơtŏk iŏk yua mă oei tơgŭm chă dăr hơlen trong chă rong, hơlen băt tơm a la chă păng vei rơgoh tơmam drăm xa – dôm tơdrong kăp gĭt vă tơdrong jang ka hơdang hơtŏk tơ-iung kơjăp sơđơ̆ng. Atŭm hăm noh, ou adoi jĭ trong jang brư̆ brư̆ tơmơ̆t tơdrong jang rong ka hơdang lĕch tơ̆ đak dơsĭ, tơjur ƀiơ̆ tơdrong lĕch rôp you ka hơdang hơtaih đơ̆ng kông. Hăm teh jih đak dơsĭ kơjung jê̆ 500km, 6 ving tih păng hloh 200 achon tơjê̆ kông, Khánh Hòa đei lơ mŭk drăm vă hơtŏk rong ka đak dơsĭ kơtang hloh. Kiơ̆ Phŏ Giáo sư, Tiến sĩ Nguyễn Chu Hồi, Phŏ Kơdră Jơnŭm juăt rong ka Việt Nam, vă rong ka đak dơsĭ kơjăp sơđơ̆ng kăl pơkăp mă trŏ ƀlep cham char dơsĭ păng sơkơ̆t hơdah tơdrong hiôk kơ rim tơring ving:  “Khánh Hòa đei 6 ving dơsĭ, rim ving đei tơdrong hiôk kơdih. Mưh iŏk yua nhen băl gah sơnong, pơtih nhen hơnih yơ adoi pơm dơnŏk duk, noh gô pơm tơsŭl tơsăl gah tơdrong pơyua păng ưh đei sơđơ̆ng tơring. Yuơ noh athei sơkơ̆t hơdah tơdrong hiôk kơ rim ving. Pơtih nhen ving Nha Trang noh pha hăm ving Vân Phong. Ah iŏk yua trŏ trong păng tơdrong hiôk kơ rim tơring ving noh kơjă hăp gô pơyua kơjung hloh, atŭm hăm noh tang găn ƀiơ̆ tơdrong tơsŭl tơsăl”

Sơnăm 2025, ka hơdang kơ Khánh Hòa đei yua hloh 280 rơbou tơ̆n; tĕch ăn teh đak đei yua pơhlom 870 triu đôlar, đei jê̆ 37% kơjă tơmam drăm tĕch ăn teh đak đe kơ dêh char. Lơ̆m 3 khei blŭng sơnăm ou, ka hơdang đei yua pơhlom 60 rơbou tơ̆n, lơ̆m noh rôp you đei 52 rơbou tơ̆n, rong vei hloh 8.100 tơ̆n. Mă lei, lơ̆m khei năr mŭk drăm ka hơdang pă đei oei lơ păng tơdrong tơchơ̆t tơjră hăm rôp you glăi (IUU) roi năr roi kơhret, tơdrong tơplih kơtang đơ̆ng chă rôp you vă rong vei đei lăng jĭ trong jang dơnơm.

Đơ̆ng sơnăm 2025, Khánh Hòa đei Jơnŭm pơgơ̆r teh đak asong jang hơdrol rong ka dơsĭ kiơ̆ trong pơkăp 'nao. Kiơ̆ tơlĕch jang truh sơnăm 2029, tơring dơsĭ hơtaih truh 3 hai lĭ gô pơm jang lơ̆m pơhlom 240 ha, đei yua hloh 3.600 tơ̆n; tơring hơtaih đơ̆ng 3–6 hai lĭ pơhlom 200 ha, hơmŏ đei yua hloh 5.100 tơ̆n. Ƀok Trịnh Minh Hoàng, Phŏ Kơdră Hơnih jang vei lăng kon pơlei dêh char Khánh Hoà ăn tơbăt, tơring hơvơn kon pơlei asong jên răt hơdrau rong 'nao păng iŏk yua trong jang gơh hơgei vă hơtŏk iŏk yua lơ hloh:  “Dang ei dêh char Khánh Hòa tŏk bŏk oei akŏm pơjing dôm pơkăp tơgŭm jang păng hơvơn jên jang đơ̆ng Trung ương, hơvơn jên asong jang đơ̆ng tơring vă hơtŏk kơtang rong ka dơsĭ kiơ̆ trong 'nao. Hăm jên hlôi đei, hơnih jang mŭk drăm, tơchơ̆t tơgŭm gô đei tơguăt hăm dôm unh hnam kon pơlei, hăm hơnih jang hơp tak xah jang thoi yơ vă đei jơnei tơnăp hloh”.

Kiơ̆ kơ dôm bơngai juăt jang, hơnih pơgơ̆r jang, vă hơtŏk rong ka dơsĭ hơgei 'nao kăl pơjing tơdrong jang hơdoi kơjăp đơ̆ng hơnih jang mŭk drăm, hơp tak xah păng kon pơlei jang ka, atŭm hăm noh pơgơ̆r pơm jang kiơ̆ trong pơkăp jang 'nao. Thứ trưởng Hơnih tơm Choh jang xa păng Cham char Phùng Đức Tiến akhan, Khánh Hòa đei mŭk drăm hiôk vă hơtŏk jang ka dơsĭ păng đei sơkơ̆t jĭ tơring yuk hơlou, chơng trong ăn tơdrong jang ka dơsĭ gơh hơgei kơ jơ̆p teh đak:  “Mưh đei tơdrong pơgơ̆r kơjăp đơ̆ng Teh đak, rim hơnih jang yak hơdoi hăm hơnih jang mŭk drăm păng kon pơlei, tơpă Khánh Hòa gô pơjing đei dôm tơdrong hơtŏk tơnăp hloh lơ̆m hơtŏk jang ka hơdang. Ah mă hơvơn đei dôm hơnih jang mŭk drăm tih vang jang, gô pơjing đei hơnih jang ka hơdang, oei dôm hơnih jang mŭk drăm iĕ, hơp tak xah păng kon pơlei jang ka gô vang jang nhen dôm vê̆ tinh, đei tơring rong yŏng, tơplih 'nao trong pơm jang păng pơkăp dơ̆ng tơdrong jang xa”.

Đơ̆ng dôm hơdrau rong ka kiơ̆ trong 'nao tŏk bŏk oei đei yua tơ̆ đak dơsĭ truh dôm pơkăp hơtŏk jang đunh sơnăm, Khánh Hòa tŏk bŏk oei pơih trong rong ka hăm pơkăp tih să, gơh hơgei. 'Nou đei lăng jĭ tơkhuă vă pơgơ̆r jang ka kiơ̆ trong kơjăp sơđơ̆ng, rôp you tơnăp mŭk drăm dơsĭ, vei lăng rah ka hơdang ăn kon sou ning nai kơnh.