Thủ tướng tơroi rơđăh, Khŭl kơdră teh đak tŏk bŏk hơdrin, akŏm pơgơ̆r hơmet pơ ‘lơ̆ng pơtôch dôm tơdrong jang oei đei pơdui đunh, khŏm hơmet ‘lơ̆ng dôm tơdrong pơmat tat, tơhlăk tơhlĭn, lơ̆m noh đei dôm tơdrong găh tơdrong jang vei lăng đơ̆ng Anih tơm vei lăng jang Pơgang. Hăm tơdrong jang ming man anih jang 2 kơ dôm Hnam pơgang Bạch Mai, Hnam pơgang Việt Đức, Thủ tướng athei dôm Anih tơm vei lăng găh jang Pơgang, Ming man, Khŭl lĭnh, Kŏng an kiơ̆ hơnăp jang, gơh jang athei rim anih jang ƀơm truh akŏm hơvơn tôch ai jên jang, bơ̆jang kiơ̆ hrơ̆ch, kơtang, đei yua vă tơtĕnh hơmet pơ ‘lơ̆ng pơtôch dôm tơdrong oei đei, tơhlăk tơhlĭn, jăh ăn 2 hnam pơgang yak mơ̆t lơ̆m bơ̆jang lơ̆m jăl khei mă II sơnăm 2026.

Thủ tướng Lê Minh Hưng athei Anih tơm vei lăng găh jang Pơgang tơtĕnh chih hơmet pơ ‘lơ̆ng hla ar Luơ̆t vei lăng rơgoh ‘lơ̆ng tơmam sa (hơmet ming) păng jang pơkeh tơdrong jang vei lăng teh đak găh vei lăng rơgoh ‘lơ̆ng tơmam sa; pơjing trong tơlĕch jang, trong  vă khăm jơhngơ̆m pran hơnơ̆ng păng khăm hơlen lăng đĕch tŏ sĕt hloh 1 sơnăm 1 ‘măng ăn kon pơlei, lơ̆m noh đei 1,2 ‘nu bơngai tơgŭm hơdrol hloi lơ̆m sơnăm 2026, mă loi ‘noh tơ̆ tơring hơtăih hơtŏ.