Anih chĕp kơ̆l Đảng dêh char Khánh Hòa ‘nao pơgơ̆r hop akŏm pơma nuh đơ̆ng Kơdră chĕp kơ̆l Đảng dêh char hăm kăn ƀô̆ bơngai jang tơ̆ xăh sơnăm 2026. Hop akŏm iŏk đei truh 210 nơ̆r pơma đơ̆ng kăn ƀô̆, bơngai jang tơ̆ 64 xăh, phường. Lơ nơ̆r pơma ƀơm truh tơdrong hơmet ming khul kơdră pơgơ̆r, pơtruh kăn ƀô̆ jang, tơdrong tơgŭm, hơmet ming trong pơm hla ar, tơplih hăm kơmăy sô̆ păng jên bơ̆ jang tơ̆ tơring.

Lơ tơring ră roi truh tơdrong bơ̆ jang tôch lơ, oei kơsô̆ kăn ƀô̆, bơngai jang ăn teh đak ‘nŏh tam mă tơgăl hăm kơsô̆ kon pơlei păng tơdrong ‘mĕh vă đơ̆ng tơdrong jang. Lơ phường kơdrâm kon pơlei, tơring xă, pơjing tơring kơdrâm hrĕnh mă lei ƀiên chê̆ bơngai jang tam mă tơgăl, pơm ăn kăn ƀô̆ athei iŏk jang hloi lơ tơdrong.

Yă Trương Thị Thu Thảo, Phŏ Kơdră Anih tơiung pơjing Đảng phường Nam Nha Trang, dêh char Khánh Hòa ăn tơbăt, tơdrong jang tŏk hrĕnh, mă lei jên khei kơ lơ kăn ƀô̆ ‘nŏh tơtă jur dơ̆ng: “Tơ̆ tơring đei lơ bơngai hlôi pơdơ̆h jang păng tơplih tơdrong jang nai, yoa bơ̆ jang tôch trăp, dang ei ưh pă đei jên tơgŭm 30% hăm Grŭp jang Đảng bơih. Đơ̆ng rŏng 6 khei chĕp vei, dang ei jên khei jur pôm păi, oei tơdrong jang ‘nŏh roi trăp kơna lơ bơngai hlôi tơplih tơdrong jang vă lăp hăm tơdrong jang, lăp hăm tơdrong arih xa kơ unh hnam”.

Hrei ‘nâu, Khánh Hòa đei 4 phường đei kon pơlei lơ hlŏh 100.000 ‘nu bơngai păng hlŏh 10 xăh, phường đei kon pơlei lơ hlŏh 50.000 ‘nu bơngai. Lơ tơring athei dêh char asong dơ̆ng ƀiên chê̆ ăn dôm tơring đei lơ kon pơlei; atŭm hăm ‘nŏh jăh hơmet tơdrong jang păng pơgơ̆r iŏk bơngai jang vă pơm tơjur ƀiơ̆ pơmat tat ăn xăh. Ƀok Phạm Ngọc Hải, Bí thư Đảng xăh Tây Khánh Sơn ăn tơbăt, mưh tơdrong jang lơ, bơngai tŏ sĕt, tơring athei tơmât yoa kơmăy kơmŏk vă hơtŏk tơdrong đei yoa mưh bơ̆ jang. Mă lei, pơmat tat hloh hrei ‘nâu ‘nŏh jĭ ưh kơmăh jên jang:

“Tơdăh kăn ƀô̆, bơngai jang nhôn đei jang kiơ̆ dôm phần mềm âu ‘nŏh tôch đei yoa, gô ‘mơ ‘met đei jơnăr, roi đei yoa mưh chă roi tơƀôh, tơdrong pơvih ăn kon pơlei păng anih tĕch mơdro roi ‘lơ̆ng ƀiơ̆. Tơdrong kăl hlŏh jĭ jên vă răt kơmăy phần mềm, apinh Anih vei lăng kon pơlei dêh char tơlĕch jên vă tơring răt kơmăy, tơdăh ưh ‘nŏh dêh char răt ăn bưh, đơ̆ng rŏng kơ ‘nŏh ƀơk ăn, pơjao ăn kăn ƀô̆ đơ̆ng dêh char truh tơ̆ tơring lê̆ nhôn jang kiơ̆”.

Đơ̆ng rŏng kơ chă mơ̆ng nơ̆r pơtho tơ̆ hop akŏm, ƀok Trần Phong, Bí thư Đảng dêh char Khánh Hòa athei dôm anih jang kơpal jăh hơmet pơ ‘lơ̆ng pơmat tat, hơlen năng hơnăp jang, atŭm hăm ‘nŏh chih akŏm mă tôm nơ̆r pơma vă tơroi ăn Trung ương set hơlen, sek tơlang ăn: “Athei dôm anih jang kơpal hơtŏk tơdrong jang hơdoi, roi kơchăng ƀiơ̆, klăih song kăn ƀô̆ bơ̆ jang vei lăng kiơ̆ rim tơring, hlôh vao kơjăp rim tơdrong, mưh đei tơdrong tơhlăk ‘nŏh jăh tơroi ăn Anih chĕp kơ̆l Đảng, Anih vei lăng kon pơlei dêh char mă tơtom. Đĭ đăng dôm jĭt nơ̆r tơl tơblang âu athei chih hơmet dơ̆ng, gơih ăn 64 xăh, phường, athei đei nơ̆r tơl mă rơđăh, gơ̆h dăh mă ưh? Mưh gô ‘nŏh athei gô bu?”.

Pơtôch hop akŏm pơma nuh, lơ tơdrong đei đơ̆ng yăn âu tơ̆ tơring tơ̆ Khánh Hòa hlôi đei pơma tơlĕch tôch rơđăh, đơ̆ng tơdrong pơmat yoa tơdrong jang lơ, ưh kơmăh ƀiên chê̆, jên khei roi jur truh pơmat tat găh jên vă tơplih hăm kơmăy sô̆. Lơ nơ̆r pơma, apinh đơ̆ng kăn ƀô̆, bơngai jang ăn teh đak tơ̆ 64 xăh, phường ưh lăp roi tơƀôh tơdrong hơpơi ‘mĕh đơ̆ng khul kăn ƀô̆ tơ̆ tơring đĕch mă oei ăn ƀôh tơdrong athei tôch gĭt kăl vă hơmet pơ ‘lơ̆ng trong pơgơ̆r jang, tơdrong tơgŭm mă lăp hăm yăn âu kiơ̆ kơsô̆ kon pơlei tơ̆ tơring, kiơ̆ tơdrong jang pơjing tơring kơdrâm păng tơdrong jang đei pơjao jang hrei ‘nâu. Tơdrong dêh char athei hơlen năng, tơl tơblang rim nơ̆r pơma apinh kŭm đei hơmĕng vang tơgop hơmet pơ ‘lơ̆ng pơmat tat, pơjing tơdrong ‘lơ̆ng vă khul kăn ƀô̆ bơ̆ jang tơ̆ tơring hơđơ̆ng jơhngâm bơ̆ jang, hơtŏk tơdrong đei yoa mưh pơvih ăn kon pơlei păng anih tĕch mơdro tơ̆ dêh char Khánh Hòa.