Truh dang ei, lơ̆m dêh char hlôi pơjing 66 Hơnih pơrô̆ pôk rơih; 66 Hơnih chĕp pơgơ̆r Pôk rơih atŭm hăm rim khul pơvih pơvăn; 4 Hơnih pôk rơih kơdră tang măt Kuô̆k hô̆i, 19 Hơnih pôk rơih kơdră tang măt Jơnŭm vei lăng kon pơlei dêh char păng 387 Hơnih pôk rơ̆ih Jơnŭm vei lăng kon pơlei rim kâp. Đei 65 tơring, phương, tơring kăl tơchơ̆t pơjing 1.123 hơnih tăh hla hơtŏ hăm 1.123 khul pôk rơih. Atŭm hăm tơdrong dăr lăng hơlen hơnăn kon pơlei năm tăh hla, bơngai jang pơrô̆ tơbăt đei tơlĕch jang jơ̆p jang ‘moi kiơ̆ aloa tơring păng rim hơnih bơ̆ jang, tơgŭm ăn bơngai tăh hla băt hơdăh jơ ‘năr, hơnih năm tăh hla păng tơdrong bơ̆ jang kơ bơngai đei hơnăn ăn pôk tơmơ̆t. Lơ̆m giĕng bơ̆ jang blŭng a đơ̆ng rŏng Têt Bính Ngọ 2026, Sở Nội vụ hlôi pơjao kơthŭng tăh hla ăn rim tơring. Đơ̆ng năr 26/2 truh năr 14/3, rim ‘măng hop akŏm tơƀơ̆p bơngai tăh hla đei pơgơ̆r kiơ̆ ƀlep tơdrong tơchơ̆t.