Tơ̆ xah Tây Khánh Sơn, tơring groi kông đei lơ măt kon pơlei kon kông, dang ei đei 135 bơngai pơtho đĕch. Minh ƀar môn hŏk nhen Nơ̆r teh đak, Tơdra hơri, Tin hŏk... ưh đei bơngai pơtho, athei krao bơngai pơtho đơ̆ng tơring nao truh tơgŭm. Ƀok Phạm Ngọc Hải, Ƀĭ thư Đảng uy xah Tây Khánh Sơn ăn tơbăt, tơring hlôi pơgơ̆r chă iŏk bơngai pơtho mă lei ưh đei bơngai nôp hô sơ mơ̆t jang: "Tơring Tây Khánh Sơn đei 5 hnam trưng tŏk bŏk oei kơƀah 30 bơngai pơtho. Nhôn chă tơroi tơbăt, iŏk bơngai jang kiơ̆ dôm kênh tơbang hơdah vă kĭ pơm jang. Nhen lĕ tơdrong hơvơn bơngai pơtho truh tơring groi kông tam mă kơtang noh chih tơbang chă bơngai pơtho lơ 'măng bơih mă lei ưh đei bơngai ayơ truh pơm jang. Xah nhôn hơpơi 'meh dêh char tơgŭm hăm trong asong bơngai pơtho đơ̆ng tơring tơmăn tŏk pơm jang tơ̆ tơring groi kông".

Tơdrong mă ou ưh hơdrô̆ đei hăm Tây Khánh Sơn mă oei ƀôh hăm lơ tơring groi kông nai kơ Khánh Hòa nhen tơ̆ Khánh Vĩnh, Bác Ái…Hơdrol ki, tơdrong ưh kơ mah bơngai pơtho tơ̆ tơring groi kông đei rim apŭng lơ̆m dêh char hơmet hăm trong asong bơngai pơtho pơlơh băl năm pơtho. Mă lei, đơ̆ng mă iŏk pơm kiơ̆ jơnŭm pơgơ̆r 2 tăl, tơdrong pơkăp pơlơh băl năm pơtho tam mă đei iŏk jang. Kiơ̆ kơ ƀok Lê Đình Thuần, Phŏ Kơdră Hơnih jang Pơtho Pơhrăm dêh char Khánh Hòa akhan, ou jĭ ƀai tuan tơnap tap tam mă gơh sek tơlang tơtom: "Nhôn gô hơnơ̆ng dơ̆ng rim trong jang tơgŭm djru, krao hơvơn ƀok thây kô pơtho năm pơtho tơ̆ tơring tơnap tap. Tơdăh pơtruh ăn mĭnh tơdrong tơchơ̆t lei kăl đei jơ ‘năr, apĭnh hơdrol, kơdră kơpal ăn asong ‘mơ̆i lei mă pơjing tơdrong tơchơ̆t, đơ̆ng noh hơlen găh tơlĕch kon jên tơgŭm ăn dôm yơ,lơ liơ, lơ tơdrong mơmat tat dêh".

Tơ̆ hơnăp tơdrong rim hnam trương tơring groi kông ưh kơ măh ƀok thây kô pơtho mă lei Hơnih vei lăng Hnam trương pơtho pơhrăm dêh char Khánh Hòa tă khan kăl đei jơ ‘năr tơchĕng hơlen ‘mơ̆i, Bí thư Tỉnh ủy Khánh Hòa Trần Phong athei Hơnih vei lăng hnam trương pơtho pơhrăm dêh char tĕnh koăng chă lăng hơlen trong jang đơ̆ng rim tơring anai lơ̆m teh đak, hơdrol kơ vă chă tơchĕng hơlen-tơlĕch trong jang tơgŭm djru: "Tơdăh lơ̆m teh đak pă đei bơih lei lơ̆m mă noh kơnh kơdih bơ̆n chă tơchĕng trong bơ̆ jang tơgŭm. Dang ei, rim tơring boăl đei bơih ‘noh bơ̆n chă lăng, hŏk pơhrăm kiơ̆. Kơ yuơ trong jang tơgŭm djru ou mơ̆ng kiơ̆ lơ̆m kon jên bơ̆ jang kơ tơring, kơ yuơ Jơnŭm vei lăng kon pơlei dêh char gơh tơchơ̆t ăn. Dêh char đei ƀôh ‘noh tơgŭm djru mă lei tơdrong jơhngơ̆m đon lăng ba đơ̆ng dêh char hăm ƀok thây kô pơtho mưh năm pơtho tơ̆ tơring groi kông ‘noh lơ liơ?".

Sek tơlang ưh kơ mah ƀok thây kô pơtho tơring groi kông tơ̆ Khánh Hòa ưh khan lăp găh tơdrong krao tơmơ̆t, mă oei ‘long pơtŏ ăn tơdrong lăng ba, hơnăp jang đơ̆ng khul jang chinh trĭ hăm tơdrong jang pơtho pơhrăm tơring groi kông. Tơdrong mă rim hnam trương tơring groi kông hơpơi ‘meh vă jơ ‘năr ou ‘noh trong iung jang ‘lơ̆ng đơng rim hơnih bơ̆ jang pơchoh trong lơ̆m tơdrong hơvơn ƀok thây kô pơtho. Vă mưh sơnăm hŏk ‘nao truh, rim hnam trương tơring groi kông pă đei chă năm hơvơn ƀok thây kô năm pơtho ăn bơih.