Truh dang ei, lơ̆m dêh char Khánh Hòa hlôi jang đang rim tơdrong jang pơgơ̆r hơmet ăn ‘măng pôk rơih bơngai tang măt Quốc hội jăl 16 păng pôk rơih bơngai tang măt Jơnŭm pơgơ̆r kon pơlei rim tơring. 65 xăh, phường, tơring gĭt kăl hlôi kĭ ăn 1.123 hơnih tăh kơ phiê̆u, hơtŏ hăm 1.123 grŭp pôk rơih. ‘Nâu jĭ khŭl jang kơtă bơ̆jang dôm tơdrong jang đơ̆ng pơklep hơnăn bơngai tăh hla, hơmet ăn tơmam drăm truh pơgơ̆r tăh kơ phiê̆u, jô̆ hơlen kơphiê̆u, vei sơđơ̆ng ‘măng pôk rơih pơgơ̆r ƀlep tơdrong hơgăt. Kiơ̆ Tơdrong tơchơ̆t đơ̆ng Jơnŭm Pôk rơih teh đak, Khánh Hòa đei pôk 12 ‘nu bơngai tang măt Quốc hội jăl XVI, hăm 20 ‘nu bơngai lĕch pơjei tơ̆ 4 anih pôk rơih. Hăm Jơnŭm pơgơ̆r kon pơlei dêh char jăl jang 2026–2031, đei 108 bơngai lĕch pơjei vă pôk 67 ‘nu tang măt. Tơ̆ xăh, lơ̆m dêh char pôk 1.392 ‘nu tang măt. Truh jơ năr âu, rim tơring hlôi jang đang pơma dơnuh ‘măng mă 3, vei sơđơ̆ng ƀlep trong jang, bơngai păng pơkăp ‘lơ̆ng kiơ̆ tơdrong hơgăt.

Kŭm hăm jang đang tôm tơdrong pơma dơnuh, tơdrong pơjing păng pơklep hơnăn đei tơlĕch jang hrơ̆ch, rơđăh. Tơ̆ xăh Xuân Hải, hơnăn bơngai tăh hla hlôi đei pơklep tơ̆ 17 hơnih tăh kơ phiê̆u. Khŭl kơdră tơring hơnơ̆ng dăr hơlen, roi tơbăt, hơdai hăm kơchăng băt hơdăh tơdrong, tơtom hơmet pơ ‘lơ̆ng dôm tơdrong tơdrong đei ƀôh, vei sơđơ̆ng tơdrong đei yua đơ̆ng bơngai tăh hla. Ƀok Nguyễn Trúc Hòa, Kơdră Anih vei lăng kon pơlei xăh Xuân Hải, dêh char Khánh Hòa tơbăt:

“Xăh tŏk bŏk hơmet ăn pơklep hơnăn dôm bơngai lĕch pơjei tơ̆ đĭ đăng hơnih tăh kơ phiê̆u. Tơ̆ hơnăp kơnh, Anih vei lăng kon pơlei xăh hơnơ̆ng pơgơ̆r dăr hơlen, băt hơdăh tơdrong lơ̆m bơngai tăh hla păng kon pơlei; tơtom hơmet pơ ‘lơ̆ng dôm tơdrong ƀơm truh tơkêng, tơhlâu tơdăh đei; hơdai hăm hơtŏk loi dơ̆ng tơdrong jang vei sơđơ̆ng hơdrol, lơ̆m păng đơ̆ng rŏng năr pôk rơih”.

Ưh khan lăp tơ̆ tơring kơdrơ̆m, tơ̆ dôm tơring tơ ter đak dơsĭ, hơnih đei lơ kon pơlei jang ka hơnơ̆ng jang tơ̆ đak dơsĭ đunh năr, tơdrong jang dăr hơlen bơngai tăh hla đei bơ̆jang hơlen hloh. Dôm kueng kơphô̆ jang hơdai hăm khŭl lĭnh kŏng an tơring năm trŭh tơ̆ rim ŭnh hnam lăng hơlen kơtơ̆ng ang, băt kơsô̆ bơngai jang năm tơ̆ đak dơsĭ, jơ năr năm tơ̆ đak dơsĭ, đơ̆ng noh đei trong jang  krao hơvơn trŏ lăp, vei sơđơ̆ng ưh kơ lê̆ lon bơngai tăh hla. Tơ̆ Kueng kơphô̆ Thành Đạt, phường Nam Nha Trang, hơnih đei hloh 1.600 ‘nu bơngai tăh hla, lơ̆m noh hloh 200 ‘nu jang tơ̆ đak dơsĭ, tơdrong dăr hơlen đei pơgơ̆r hơnơ̆ng, lăng kiơ̆ yan âu kon pơlei oei. Yă Nguyễn Thị Hoa, Bơngai vei lăng Kueng kơphô̆ tơbăt:

“Ba lăng kiơ̆ yan âu kon pơlei tơ̆ tơring. Nhôn truh dăr hơlen rim ŭnh hnam, jang hơdai hăm Kŏng an tơring hơlen lăng hla ar chih răk. Kon pơlei năm tơ̆ đak dơsĭ đơ̆ng 1 giĕng ƀơ̆t lăp truh 1 khei, ŭnh hnam tơroi hơnăn bơngai tăh hla. Nhôn lăng kiơ̆ yan âu tơ̆ tơring vă krao hơvơn bơngai tăh hla năm pôk rơih”.

Hơdai hăm tơdrong dăr hơlen hơnăn bơngai tăh hla, tơdrong jang tơroi tơbăt đei tơlĕch jang jơ̆p jang, tơgop hơtŏk ‘lơ̆ng đon hlôh vao păng đon tơnăp đơ̆ng kon pơlei. Khŭl jang pơre nơ̆r kơ tơring, dôm khŭl grŭp, khŭl lĭnh tơ̆ tơring pơvei roi tơbăt hơnơ̆ng, tơgŭm bơngai tăh hla băt rơđăh jơ năr, hơnih tăh kơphiê̆u, kŭm nhen tơdrong jang đơ̆ng dôm bơngai lĕch pơjei. Đơ̆ng ‘năr 26/2 truh 14/3, dôm anih jang, tơring pơgơ̆r hop akŏm tơƀơ̆p pơma dơnuh hăm bơngai tăh hla, pơm tơdrong hiôk vă bơngai lĕch pơjei bơ̆jang tơdrong gơh krao hơvơn pôk rơih kiơ̆ tơdrong hơgăt, hơdai hăm tơgŭm bơngai tăh hla hlôh rơđăh hloh găh bơngai lĕch pơjei hơdrol kơ pơm kiơ̆ tơdrong gơh rơih iŏk. Ƀok Võ Chí Vương, Kơdră Anih jang Nội vụ dêh char Khánh Hòa tơbăt:

“Roi tơbăt hơnơ̆ng đơ̆ng dang ei truh năr pôk rơih, aloa pơre nơ̆r kơ xăh athei pơih pơre hơnơ̆ng rim năr dôm tơdrong tơroi găh pôk rơih vă kon pơlei ƀlŏk truh tơdrong pôk rơih, ƀlŏk ‘năr 15/3 năm pôk rơih. Đơ̆ng rŏng kơ tơbăt hơdăh hơnăn bơngai lĕch pơjei, athei đŏk hơnơ̆ng hơnăn bơngai lĕch pơjei”.

Kiơ̆ đơ̆ng hơlen lăng tơdrong jang hơmet ăn tơ̆ tơring, kơdră chĕp kơ̆l dêh char Khánh Hòa athei rim tơring hơnơ̆ng lăng kiơ̆ tơdrong yan âu, kơchăng băt hơdăh jơhngơ̆m đon hơ pơi ‘meh vă đơ̆ng bơngai tăh hla, hơdai hăm hơtŏk loi dơ̆ng roi tơbăt, pơm tơdrong drơ̆ng nơ̆r păng drơ̆ng lăp lơ̆m Kon pơlei, tơgop pơgơ̆r jơnei tơdrong pôk rơih. Ƀok Trần Phong, Kơdră Anih vei lăng kon pơlei dêh char Khánh Hòa, pơma hơdăh:

“Hăm tơdrong jang pôk rơih ‘noh roi tơbăt pơm hơnăp jang tôch kơ gĭt kăl, roi tơbăt vă kon pơlei hlôh găh tơdrong ‘lơ̆ng đơ̆ng ‘măng pôk rơih, mĭnh păh vă kon pơlei hlôh găh hơnăp jang, tơdrong đei yua đơ̆ng bơngai tăh hla. Kiơ̆ đơ̆ng noh, vă kon pơlei hlôh, kơchăng tơgŭm, năm pôk rơih”.

Hăm tơdrong hơmet ăn hrơ̆ch, kơjăp, Khánh Hòa tŏk bŏk jang đang dôm tơdrong kiơ̆ ƀlep tơdrong, vei sơđơ̆ng rim bơngai tăh hla tă kơ đei tăh kơphiê̆u ngăl, tơgop lơ̆m jơnei đơ̆ng Năr pôk rơih păng pơjing khŭl kơdră chĕp kơ̆l pran kơjăp.